المساعد الشخصي الرقمي

مشاهدة النسخة كاملة : تعريف المغترب



Abdelazim
11-27-2008, 07:45 PM
تعريف المغترب:
هو كائن حي :

- مقهور إعلامياً
- مظلومدولياً
- مشتت ذهنياً
- متهم فكرياً
- مجبور عملياً
- منكوب شهرياً
- محكومغيابياً
- مقصر اسرياً
- مافي اجازة سنوياً
محروم من أعز الناس يوميا .



وللسادة الأعضاء المغتربين اضافة ما يرونه مناسبا.
والموجودين في السودان لهم الحق في الضحك علينا

عادل القاسم
11-28-2008, 12:01 AM
هو اسم علي جواز...
الكفيل هو صاحب القرار
لا وجود له في الحياة الجميلة
عمل نوم عمل.... لا راحة ولا متعة... وكمان نهي موني...
واحدة قالت لودها العاطل في الغربة ليه زمن اكتر من سنة
قالت ليه ياولدي ماترسل الدولارات
قال ليها..
ياامي انا في بلد العيش بقولو ليه روتي
والجزمة بقولو ليها جوتي
والمكوة بقولو ليها اوتي
ولو مارجعت ليك بعد اسبوع ابقي......

ابراهيم العمده
11-28-2008, 03:19 PM
التحية لأخ عبدالعظيم والعزيز عادل القاسم
وسلام خاص لكل مغترب أُجبر علي ترك الوطن
ليبحث عن لُقمة عيش شريفة في أرضُ الله الواسعة

وفي إعتقادي أن المغترب هو
محرومٌ من تراب ونيل ورائحة دعاش بلدي الحبيب
ومن ونسة العصاري وضُل الضُحي ولقاء الأحبة والأصدقاء
أصدقاء الطفولة وزيارات الأهل والجيران
وهذا قليلٌ من كثير
ودمتم

Abdelazim
11-28-2008, 05:21 PM
فعلا والله يا ود العمدة المغترب محروم من كل الذي ذكرته
وللأسف الشديد أولادنا يدفعون ضريبة الغربة

jazzazi
11-29-2008, 09:09 AM
يا ابو مصطفى ليش بتقلب المواجع علينا
يا اخي خلينا متناسين الوضع
وضاحكين على انفسنا
وراضيين
صدق المثل الي بقول:
من بعد العز واصبحت راعي

Abdelazim
11-29-2008, 09:44 AM
تقول ايه يا أبومالك
والله وردتني في الايميل واجببت أن اشارككم فيها

ابراهيم العمده
12-01-2008, 08:57 AM
فعلا والله يا ود العمدة المغترب محروم من كل الذي ذكرته
وللأسف الشديد أولادنا يدفعون ضريبة الغربة

الغربة مابعد المسافة ولا السحاب الطش جافا
الغربة في الموية البتنزل وتحرم الناس من ضفافا

أم مصطفي
12-01-2008, 01:48 PM
الغربه كمان قهر وفراق اهل
حليلي الغربه قسايه ابت ما تبقي رضايه
عيون في الغربه بكايه دموع ماشه ودموع جايه

ابو ذر حسن طه
12-01-2008, 02:40 PM
تعرف انا نسيت اني مغترب وفقعتها ضحكة لمن بكيت
وحقيقة شر البلية ما يضحك
معي واحد من عشاق كرة التنس
وقال لي المغترب زي كورة التنس
لمن تقع في الطين يقومو يضربو بيها الحيطة تتنفض وترجع فاضية
واضف الي المغترب انو زول بكاي بكل ماتحمل الكلمة من معني ان مجازي او تشبية
وزي النمل يقعد يلم السنة كلها ويجي فيل اي كان صغير ولا كبير ادمي او حيواني
ويقوم يطاها ( يعفصا )
ولكن قالو الغريب عن وطنو مهما طال غيابو مصيرو يرجع تاني لاهلو وصحابو
المغترب

Rahal
12-04-2008, 12:16 PM
(تعرف انا نسيت اني مغترب وفقعتها ضحكة لمن بكيت)

غريب
07-10-2009, 10:03 PM
المغترب شخص.. خرج فى رحله .. استقر في جنباتها .. بعدما عصفت به الرياح .. وضاقت به الأرض .. ففارق الأهل والأوطان .. وسكن في شاسع البلدان .. وهو في شرق الأرض .. وأخوه في غربها .. وأخته في شمالها .. وابنه في جنوبها .. أما ابن عمه فقد انقطعت عنه أخباره فلا يدري إذا ذكره .. هل يقول : حفظه الله ! أم يقول : رحمه الله ؟!!
المغتربون كل واحد منهم له قصة .. وكل أبٍ كسير في صدره مأساة .. وفي وجه كل واحد منهم حكاية .. ولعلنا نقف في هذا الكتاب على شيء من واقعهم .. ونجلس معهم .. نفيدهم ونستفيد منهم ..

ياسر صلاح
07-10-2009, 10:23 PM
الله يعينكم ويرجعكم سالمين ................... بالمناسبة هسة المطرة صابة فى شمبات والجو جميل عشان كده نتخارج من البوست بتاعكم ونشوف لينا شيشة

عادل القاسم
07-10-2009, 11:51 PM
الله يعينكم ويرجعكم سالمين ................... بالمناسبة هسة المطرة صابة فى شمبات والجو جميل عشان كده نتخارج من البوست بتاعكم ونشوف لينا شيشة

انت ما كنت مغترب ومطحون ذينا....
نسيت ايام لها ايقاع...

غريب
07-11-2009, 06:46 AM
انت ما كنت مغترب ومطحون ذينا....
نسيت ايام لها ايقاع...
معليش اصلوا من لقى احبابوا نسى اصحابه ..............