المساعد الشخصي الرقمي

مشاهدة النسخة كاملة : مكتبة الشاعر عزمى احمد خليل



ام صبا
11-02-2010, 02:56 PM
صحى يا حياة


صحى يا حياة ؟ ضىء الشباب في عينيك مات
وكل الحكايا الحلوه ديك الليله صبحت ذكريات

***
يا قلبي أغرق في الأسى ويا عيوني شيلي الليل دموع
وأبكيها يا عمري الحزين ما مات خلاص ضىء الشموع
الآهه تحرق في الحشا والنار بتوقد في الضلوع
والحلوه عدت لي بلاد ما فيها أصلو درب رجوع
والناس بتسأل وين حياة؟

***
مليتي دنيا الناس خلاص وعدمتي حيله مع الزمن
شوفي الزمن غدار وكيف ما راضى غير عمرك تمن
كم من قليب حزنان وراك وكم من عيون بعدك بكن
وحياتنا بيك كانت فرح والليله دايبه عليك حزن
وواحشاها عينيك يا حياه

***
الليله بختك يا تراب جاتك حياة بي طيبتها
ما تقسى إنت عليها يوم بي طيبه اسمع قصتها
العزه في عالمنا داك كانت زمان من عزتها
ولا من لقت ظلم الزمان الدنيا فاتت خلتها
واهي ليكا جات
***
يا الله يا واهب العمر يا الديمه للطيبين وفي
أديها من عندك حنان وهو أحن منك إنت في
خليها تنسى الدنيا ديك ما البي جوارك مكتفى
والرحمه عندك إنت بس يا عالم السر الخفي
وفي ذكرتك عزّ الممات
***
دايرانا بعدك نحيا كيف ما كنت نورنا وضينا
والكان بيفرحوا بي لقاك الليله فاقدينك هنا
ولو جيتي لعيوني الحنان الليله مات فيهن سنا
والليله كل زول وألفك دنياهو صبحت محزن
بيبكي وبيسأل وين حياة؟؟؟

اركمانيه
11-03-2010, 09:19 AM
فى انتظار الباقي
ام صبا
تسلمي

ام صبا
11-03-2010, 11:39 AM
فى انتظار الباقي
ام صبا
تسلمي


اركمانيه يا احلى صباح
تسلمى ياغاليه تشجيعك دائما بيخلينا
نبحث عن الجميل

ام صبا
11-03-2010, 11:45 AM
في بعادك

كنا دايرينك معانا إلا أبيت طريقنا
ولسه ما قادرين نسيبك وانت سبته الريح تسوقنا
وقالوا يوم سألوك علينا لألأ في خدك شروقنا
وقالوا زي داريتو شوقك وشوف غلبنا نداري شوقنا
وشوف نجمنا كمان ظلمتو ولسه نجمك ضاوي فوقنا

***
الصباح كان بيك مندى وجيتك في دارنا تحلى
والغريب الطال غايبو عاد معاك بالفرحه طله
ياما غنت ليك بيوتنا وشالت اسمك حله حله
الغيوم ضحكت عشانك والفراشه جناحه ظله
الفرح فاتك معانا والحزن قال لينا يلا

***
ياما فيك نحن انظلمنا وفرقتك بكتنا ياما
ولسه برضو بندعي ليك تلقى في دربك سلامه
وتلقى ناس يدوك حنانهم واصلو ما يدوك ملامه
مافي عاشق عادي عاشق كان بشيل الابتسامه
بدل القاسيات محنه وظلل الساحات غمامه

***
قسمه غايتو تفوت دروبنا وتمشي مننا دون مرادك
نحن نسهر ليلنا كلو وانت تغرق في سهادك
فيك عيون بتحن لينا ما الحنان حتى في عنادك
انت ما بتحمل فراقنا ونحن ما بنحمل بعادك
وريدنا كان قصرته عمرو يبقى ليك في السكه زادك

***
اصلو ما تشيل لينا هم نحن اتعودنا نشقى
كم ندمنا وراك ليالي وفجاءه تاني فرحنا بقه
وبرضو ما بيكمل عشمنا مهما تبكى قلوبنا فرقه
ونحن على نياتنا دائماً والبنتمناه نلقى
والسعاده هي كان أبتنا البتبقى علينا تبقى

ام صبا
11-05-2010, 01:17 PM
حبة فرقه

أنا برجاك وعارفك جايه وما بتتأخري عني كتير
آسرك حبي وغالي عليكي وقلبي كمان في هواك أسير
ما العنقود لو جافي خمايلو نسمه تبكى ويشقى عبير
***
أنا ما ندمته على البيناتنا ولا جرحته مشاعرك يوم
وإنتِ هواي لو قايله ظلمتي ما تفتكري بعيش مظلوم
أن دنياي يا ستي محبه وعمرو الحزن على ما بيدوم
والدمعات لو مره بكيتها ما بتعيش في خاطري هموم
والأفراح ما بتجفى دياري مهما حبيابي يجيبوا اللوم
***
جابك درب الريده عشاني وبرضى لقيت في هواك دنيايا
وهسع فتى لناساً غيري وعايشه بقلبك لسه معايا
وقالوا بعد مرات بتغني وتبكي كمان يوم تطري غنايا
عارفك ما بتتهنى بدوني وأنا غيرك ما بلقى هنايا
ومهما تلاقي حنان عند غيري عمرك ما بتنسيهو هوايا
الأغصان بتعيش متشابكه ومره الغصن يجافي حبايبو
***
ولما الغيم ما يمر بي عندو يرجعوا ليهو وتاني يطايبو
وإنتِ بترجعي زي ما كنتِ وقلبك قلبي احن قرابيو
وما بتلقيني في اصلكِ وحبك إنتِ محال ما سايبو
اصلو البينا هي حبة فرقه وشاطيء هوانا بترسي مراكبو

ام صبا
11-10-2010, 12:11 AM
وعــــد الحـــــر

لا لا ما بحزن عشانك لو صحى اتبدلته خنت
إلا لسع ما مصدق وانت في أعماقي إنت
*********************
قالوا عنك ناس قرايبك إنت عندك غيري غايه
وبرضو ليك ميعاد معاهم زي ميعادك داك معايا
الرسائل هي ذاتها وحرقة الشوق والوصايا
وبرضى صدق ما ظلمتك وقلته ما بتخون هوايا
وقلته مهما أغيب عليك إنت برضك في رجايا
******************
ما بصدق مهما قالوا ريدي في عينيك هان
اصلى عارفك ما بتلقى غيري سكه أمان
والحنان الشفتو مني زيو مين يديك حنان
وبرضى عازرك لو نسيتني وبي ورأي حبيت كمان
ما البيخون في يوم حبيبو بكره بيخونو الزمان
يلا قول وريني آخرك في قليبك غيري مين
والمحبه العشنا فيها ورحلة الشوق بالسنين
وكل حاجه جميله بينا روحت الليله وين
لا لا ما أظنك بتنسى وكنت طول عمرك حنين
إلا وين وعدك معايا ما قالوا وعد الحر هو دين

ام صبا
12-05-2010, 05:18 PM
طرونـــي ليـــك

طروني ليك وأنا كنت قايل أصلى ما بطراكا تاني
وكنت قايل طول فراقك بيمحي ريدك من زماني
إلا تاري البينا لسع لا نسيتو ولا نساني
***
وفجاءه اتذكرته ريدنا والزمان الكان معاكا
المشاوير والأماني والفرح ساعة لقاكا
حتى قلبي الكان نساك ما لو زي الما نساكا
صحه جرح الماضى تاني ومن جديد هسع بكاكا
رغم ظلمك وطول جفاكا حنّ لي أياما هواكا
***
وابتديت من تاني أندم زي كأني الكنت ظالمك
لمته نفسي وقلته يا ريت لو ظروفنا تلم وأكالمك
وأحكي ليك أنا كيف ظلمتك لما جيت غلطان ولا يمك
ورغم طول الفرقه بينا اشتهيت لو بس اسالمك
وأسألك لو طاري ريدنا ولا سارح في عوالمك
***
كان لقيت ليك قدره تنسى عاد منو البديني قدره
أنسى زي ما نسيتني إنت وبرضى أرجع تاني أطرى
الليالي البينا كانت من جمالك شايله نضره
ياما بتذكرني بيكا وياما بتبكيني ذكرى
وانت لو هناك زمانك برضى راح أتهنى بكره