المساعد الشخصي الرقمي

مشاهدة النسخة كاملة : مكتبة الشاعر والمسرحي عمر الطيب الدوش



عادل الخضر
11-05-2008, 09:05 PM
سؤال


جِيتْ أسألِك
يا طفلَة الألم الرضيع
تدِّينى خاطْرِك شان أضيع
فى شوق موزّع فى الزحام
يا عذاب الريح للخيام
يا صهيل كَسر اللِّجام
يا خِتَام قبل البدايَهْ
يا بدايّهْ بدون خِتَام
جيتْ أسألِك مين علّمِك
إنّو الزمن فى مرَّهْ ناقِص
ومرّهْ تــــــام
جيت أسألك
الشوق مكتّف فى الطريق
والخوف مداخل للفريق
جيت أسألِك
مين علّمِك لُغة الزهور
مين علمك غضب الحريق
وانت باحَهْ
وانت واحًهْ
وانتِ ذاتِك سكَّة الزول للمضيق
فارْدَهَ السواعد
للزوابع والمطر
للْهَم يَولْوِل للشّجر
عايز أسألِك
مين علّمِك
!لَمّ السلامــَهْ مع الخــطــر

عادل الخضر
11-05-2008, 09:07 PM
ضل الضحى

شمس المغرب الممحوق تميل فوق وشك المحروق
تبين صفرة سنيناتك
بين ضل الكلام مقلوب
تميل يا صالح الأيام ولا عاشرت هدما زين
ولا حتيت تراب السوق .. تفضل
تفضل يا خفيف الضل ورش جرجيرك البايت
وعد ليمونك الفضل وكوم حزنك الباير
وبيع من غير تشاور زول تواريخ دمك الفاير
وتفرش فى الضحى الأعلى تبيع سام العمر كيمان
ولا لافتات ولا أوزان ولا اتمان
تشد تركب قفا الأيا م
زهج خيلك يلد تيمان
فرس شوقك دوام مسبوق
تميل يا صالح الأحلام
أهو القدامك البتبيعو
أشواق الصبا الأيتام
وبرضك ما تبيع لى زول
أسف ربيتو على كتفك
ولا عشتا شبع أوهام
أهى الطاحونة يا صالح أهو السوق الصبح ألغام
تفضل يا خفيف الضل ورشرش صبرك الفاير
وارفع صوتك الحنضل وألعن وما يهمك زول
أبوك يا سوق سليل الغم
أبو الطورية والمنجل
وخال الرجلة ، عم الدنيا
جد الفجلة والفلفل وشكل القفة
والكرتونة والجردل
وألعن ما يفوتك زول
من الشارين من البايعين
وجنس البرضا والبزعل
واشتم ياخى ايه فضل
وايه يحصل وهل تقبل
تميل يا صالح النجمات
مع القمر الخصى واهبل
متين يا صالح الآمال
تميل ترقص وتتعدل ؟!
واضحك لا يشيلك هم
على النيل الصبح مبهول
صحى الأمواج بتتبهدال
صحى الاحلام بتتبهدال
برضو سعاد حتتحول
لا ... لا يمكن
دى ما شمس الضحا الأعلى
ومشية حنينة تحت الضل
وتكية ضرية فوق رمله
دى أحلام جارية متبهله
وماممكن تقيف إلا
وليد العمدة يلعب بى
يدردق فى الحرير كرشو
يعاين فى النعال وشو
ويقدل فى الفريق تمساح
ينادى سعاد تلم الكون
تحت ضل الضحى البواح
تصور يا خفيف الضل
دا عندو الهمسه .. أمر مباح
وتقطع من لحمنا الحى
وتعقد فوق شحمنا الساح
ونهتف ونحنا مشويين ومقليين :
ده يا عمدتنا هو الصاح
وياهو الصاح
وياهو الصاح
ويا عزة نفس بركت متين بتسوى لينا جناح ؟
واشيلك يا سعاد وامرق
من الزمن الدتى ونباح .

عادل الخضر
11-05-2008, 09:09 PM
ســــــُـــــعاد

دقت الدلوكة
قُلنا الدنيا ما زالت بخير
اهو ناس تعرس
وتنبسط
تككت فى الراكوبة
بالحنقوقة سروالى
الطويل
سويتلو رقعات فى
الوسط
فى خشمى ختيت
القميص
اجرى وأزبد شوق وانط
لا من دخلت الحفلة
فجيت الخلوق
وركزت
شان البت سُعاد
ما أصلى عارف جنها
فى زول بيركز وينستر
لكنى عارف انها
لو كلو زول فى الحلة
بالسُترة انجلد
يانى الازاها وجنها
وركزت عاد
وركزت للحُرقة المشت
فوق الضلوع
تحت الجلد
لميت مشاعرى مرقت عن
طرف البلد
ووقفت جد
وانا جايي راجع مُنتهى
لاقتنى هى
قات لى (تعال)
كبرت كراعى من الفرح
نص فى الارض نص فى
النعال
الله اكبر
يا مُعافرة يا مُدافرة يا جهاد
( هيي يا سُعاد
على ود سكينة الكلتى
فى خشمو الرماد
هى يا سعاد على ود
سكينة المات اسف
هيي يا سعاد
وانا بت بلاك ملعون
هواك ان كنت ارضى
اعرسها
وانا يا سعاد
آه يا سعاد
وكتين تطلى سحابة
رقصت الدعاش
اه يا سعاد
بفرش على روحى
واجيك
زولا قلق تعبان وطاش
وكتين اشوفك ببقى زول
فرشولو فرش الموت
وعاش )
وكتين تطلى سحابة
ترقصى للدعاش
اه يا سعاد
اه يا السعاد
قالت سعاد
بطل كلام الجرسة
وانجض يا ولد
طقيت مشاعرى مرقت عن
طرف البلد
وودرت جد
اذنت فى الشوك والسلم
ووقفت للامل البكر
ورقدت فى الالم الحكر
وحلمت زى شايلنى وسط
الزحمة
نبى الله الخضر
صحانى صوت العمدة قال
( مسئول كبير زاير البلد)
قبال يهل قبال يصل
( لازم تقيفوا صفوف
صفوف
وتهيجوا الخلا بالكفوف
وتقولوا عاش..يحيا
البطل)
سامعنى ولا اقول كمان
قُت ليهو يا عمدة اختشى
مسئول كبير فى الحلة غير
الله انعدم
ما شُفنا زول سكت جهال
ما شفنا زول رضع بهم
ما شفنا زول لتخ تيابو
وجانا من طرف البلد
فكيت مشاعرى مرقت عن
طرف البلد
وودرت جد
وانا جايي راجع اجهجهو
لاقانى هو
سايق العساكر بالحراب
ضاقت نعالى من الزعل
من تحتها اتململ تُراب
وضراعى زى داير يجن
والجوف يطقطق بالكلام
قبال يقولوا لى سلام
ختونى فى قعر السجن
ان شاء الله ما تضوقو
السجن
حصلنى قبل اليوم يتم
جارنا المدرس ود خدوم
قال لى
لا زول هتف
ولا كف مشت بتلاقى كف .

عادل الخضر
11-05-2008, 09:12 PM
طه المدرس ود خدوم






يا تلاميذى العُزاز
بسم الله
بسم المجد
فى أحضان سُعاد
اكتبوا التاريخ
خمستاشر ربيع أول
والمُوافِق
موِلد الايقاع على خطوات سُعاد
والمُرافِق للصباحات ، المناحات
واخضرار الغيم وفقدان الشُعاع
ارتفاع الموجهْ لى صدر الشراع
اكتبوا ارتفاع الموج إلى صدر الشراع
يا تلاميذى العُزاز
خلِّى بينك وبين زميلك
زى مسافَهْ
قَدْر أيه؟
قَدْر المسافَهْ البين عيونى وبين سُعاد
قَدْرِ آلاف الفواجع فى انهيارات الحصاد
قدْرِ مسحوق الأنين فى تواريخ البُعاد
اكتبوا
ودَيَّه أيه يا اْستاذ يكون؟
دا المُجنن طه اسألأوا ودْ سكِينَهْ
اسألوا الريح المسافر فى تجاعيد السكينَهْ
شاوِرِوا الموج اللِّى ساكِن فى مسافات السفينَهْ
تسألونى عن سُعاد
اكتبوا العنوان بخط ممشوق وواضح
احذروا اللحظ البيضحك وهو جارِح
مُرْكَب على الله ويلأّ نجتاز الحدود
اكتبوا العنوان بِخَط مستور وفاضح
(رقصة الموج الأخيرَهْ جُموح نُهودِك يا سُعاد)
عنوان طويل
يا تلاميذى العزاز
كِلمَهْ..كِلمَهْ على مهلْكُم واكتبوا
والصيف طويل لمْلَم العُشاق مواعين الرحيل
نجمَهْ شاردَهْ وغيمَهْ هاجدَهْ
ضَمَّهْ ضَمَّهْ ضَموا شرف المستحيل
جَوهَرُوا الحزن الكحيل
مُركَب على الله ويلأّ نجتاز العويل
بانت سُعاد
غامت ملامح السكَّهْ وانكتم المكان
رَقَصتْ سُعاد
فى خانَة الأصفار وميلاد الزمان
جمّعتْ من كل زهرَهْ مواجع الحُب المُهان
مُركب على الله ويلأّ نجتاز الدّثخان
يا تلاميذى العزاز
خلّوا بينكم وبين رنين الضحكة صرخَهْ
حُب مُهان والصبر أولىَ
خلُّوا بينى وبين جنون الخيبَهْ شَوْلَهْ
واكتبوا عاشَ فى زمن المذلًهْ المدعو طه ودْ خدوم
باع تفاصيل الكآبَهْ عشان يفرِّغ وتانى يمْلاَ
جاع وخيرِك يا سُعاد مرْدُوم رَدوم
عاش المدرِّس ود خدوم
كأنو نكْبَهْ -كأنو شُوم
عاش المدرِّس ود خدوم
تسْقُط حكايات الهموم
الأزاهِر والدفاتِر والمتاجِر والمقابِر
والخافر والمشاعر والنجوم
عاش المدرِّس ود خدوم
يا تلاميذى العُزاز
من كانَ حاضِر أو تَوَلَى
يقفِل الكرّاس ويلأّ
نشوف بداية المهزلَهْ
***
يا تلاميذى العُزاز
فى صيف طويل مبطوح على صدر الزمن
منظُلمَة الشوق ابتدا
فى حضرَة الحُب اندَفن
والنيل مدامِع للنجوم
والصبر مُفتاح للشجن
والحِلَّهْ مبتورَهْ وكسيحَهْ ومُهْملَهْ
بانت بداية المهزلًهْ
بانت سعاد بانت تفاصيل الشجون
والجنون والمقصلَهْ
بانت سُعاد
وقفتْ على خِصر الجبل
فتَحت مشارع للظنون والأسئلَهْ
رقدَت على شَعَر السهل
ضفَرت ملايين القُبل
"والجو صفا والنيل هَدَا
وغاب الأتر"
وأنا يا سُعاد
فى الحِلَّهْ معجون من رماد من حسرَهْ
مقطوع من شَدَر
يا تلاميذى العُزاز
لا زوايَهْ لا قوس لا وتَر
وأنا يا سُعاد
فتّشتَ ساحات الأمانى
ناصيهْ ناصيهْ
حجر حجر ، ما لقيتْ إلاّك زمن
مالقيت إلا بِلاد
وأنا يا سُعاد
يا شهوَة الحُب للعِناد
يا شهقَة الفرح المُعَاد
خلِّينى فى بالك نغم
وأنا يا تلاميذى العُزاز
مخلوق بسيط من شوق وغَم
وأنا يا سُعاد مخلوق بسيط من شوق وغم
قامت سُعاد من رقدتهْا
الكون جميع كان انحصر مابين
قيامَهْا ووقفتَهْا
النخلَهْ والهجليجَه والسيّالَهْ
والشوق والمطر
الغابَهْ والهم القديم
الفرحَهْ والذُّل والخطر
كلُّو انْجَمَع فى كفّتهْا
قامت سُعاد من رقدتهْا
قامت قيامة العُمْدهْ مليون اتجاه
اشتَّتتْ كل الجموع
من كلِّ أنَّهْ وكلِّ آه
ومشيتْ عليكْ أنا يا سُعاد
حتَّة مُعلَّم مُبتدىء
غاوِى وبسيط
ولو ما خَدوم
كان من زمان محْسوب لقيط
ما آصلى مولود لللَقِيط
أو مُغفّل أو مبهدَل أو عبيط
يا زعيطاً يا معيط
ومشيت عليك أنا يا سُعاد
شُبّاك على النار انفتَح
درويش نحيل
فى صُرَّهْ شال حزنو وسَرَح
سيلاً تقيل
وسَّع خطاويهو وكَسَخ
ومشيت عليك أنا يا سُعاد
مربوطهْ عينى على خُطاك
فى عيونك اتجمّع كلام
فى صوِتك اتجمّع ظلام
حسيتو فى الحَشَا والعِظام
وقريتو فى سعف النخيل
ولمحتو فى طوق الحمام
فى العفهْ والخُصْلهْ الحنِينَهْ
اللفْتهْ والتوب والحِزام
بارَت مواعيد الغرام
ونزرْتُو حُبِّك للزنازين
والمساجين والهوام
والعُمدهْ فوق راس الفرح
جمّع جريوْاتو ونبح
(مسئول كبير زاير البلد)
قُتْ ليهو يا عمدهْ اختشى
مسئولك الزاير الكبير
يا ريتو بس لو شاف سُعاد
كان رسم للعفَّهْ
أوصافا وتقاطيعا ومقاسا
كان دخل للحِلَهْ من بابا وشبابيكا وأساسا
كان اتْوَلد برَّهْ المُتاجرهْ
والمحاورَهْ والمصاهرَهْ والخساسَهْ
كان تاب
وباع للصدقِ مجدو وذمّتو
يمرُق جديد
من حَر دهاليز النِخاسَهْ
من هدومِك يا مرازِل
يا مزابِل
يا مباخر للتعاسَهْ
يا مناكر
يا عساكر
يا ، سُعـــــاد
......
فِك علَى كلب الحراسَهْ
.....
يا تلاميذى العُزاز
فى يوم طويل مبطوح على صدر الزمن
اتلمّت الحِلَهْ
الحنينْه عشان وداعَك يا غروب
حُزن فارس
وكيف يصير فى لحظَهْ مولَى
كيف يجوز
يا عمدَهْ كيف؟
الذُّل مُصان
والحّثب مُهان
والسجن أولى؟
كيف لقيت يا عُمدهْ كيف
للمجازر والخنازير والخناجر
فى رموش الغيم مَحَلَّهْ؟
كيف بنيت يا عُمدهْ كيف
من رماد حزن المآتم
من تُراب غضب المآتم
ليكْ ولى ضيفَك مَظلَّهْ
حِلَّهّ حادَّه
وإنتَ تزْرع فوق ضُوع الوادي حفْلَهْ؟
كيف يجوز؟
قد يجوز وقد يجوز
يا تلاميذى العُزاز
ضَلّض مَن قَد لا يحوز
من تبتّلْ أو تيَمَمْ
أو تيتَم أو ترمّل
يا تلاميذى العُزاز
اكتبوا التاريخ
خمِستاشر سُعاد أوّل

عادل الخضر
11-05-2008, 09:13 PM
العمدة جابر ود خف الفيل





العُمْدَهْ جابِر
والصباح نَديان رطيب
فى اِيدو كان مَاسْك الشروق
فى جيبو كان طاوي الغروب
فى كرْشُو قَاعِد منْبَسِط
فى الكُرسي كان
مَاهِل خصيب
ما عُمْدَهْ يَاخْ
والفرَح أِْكَال يطِيب
الشَيَّهْ والجمر الشَّهي
الشِيشَهْ والشَّنَب المولِّع حُمَّى
قِفْ
العُمْدَهْ جابر - الكرسى طَقْطَق تِحْتُو-
مَدَّ ايدو على الأوامرِ
والأوامِر ما بتطْلَع بَسْ كلام
مِن جسمو بِتْنِز
مِن حَشَاهو
مِن صلَف مَعْمور وعامر
مِن قبور أجدادو تزحف
للأصاغِر ..والأكابِر
مِن منابِت شَعَرو تَطْلَع
مِن نهايات الأظافر
دَه الصباح
العُمدهْ جابِر
نَادَى صالِح وَدْ قِنِعْنَا
الله ..الله على الأوامِر:
إسْتَلِم يا وَدْ قِنعْنَا
تسْتَلِم أَمْر الأوائل
تَلْقَى طالِع للأواخِر
تَسْتَلِم أمْر اللِّى عايش
تلْقَى من أهل المقابِر
واوْعَىَ من فضلك تَغَالِط
دِى الأوامِر ودِى الدفاتِر
ودِى العساكِر
وافتَح السِّكهْ اليَمُر
سيدنا آمر ابن جابر
واسْتَلِم يا وَدْ قِنِعْنَا :
إنتَ عارِف بيت سُعاد
وعارف إنَّك من قَبيلَهْ
لا رأينَا ولا سِمِعنْا
ولا عِشمْنَا ولا طِمعْنَا
وانت مُرْسَال يا ..بَجَم
تدخل البيت زى كأنّك..
مارِق الآن من جهنم
ولمَّا تَطْلَع ليكْ سُعاد
كُون خفيف زي الأمل
ومرَّه أتْقَل زي جَبَل :
أوْعَىَ تَفْرَح أوْعَى تزْعَل
واقْصِر ايدك من سلام
خلّى نَظَركْ يِكُون كفيف
ومَشِيكْ يكون ناعم مُغرْبَل
ولما تَطْلع ليك سُعاد
زي حلم فى توب رهيف
أدّيهَا ضَهَركْ يا مُغفّل
وبكُلِّ ما علّمْتُو ليكْ
من طاعَهْ من ذُّل من وجل
أمْرُق حشاي قِدَّامهْا يلْمَع بالوجع..
قُول ليهَا لمَّا الشوق يبين
مابين ..شجيرات الأراك
والفرحَه تغْسِل طرْحتهْا
والبدر يمشى على الهلاك
والخوف يكون لسَّع جَنين
فى رُكْنِ من ساحة الوَّلَه
فى زاويَهْ من ساعة الحنين
ما بين دِى ارْضَك ودَاكْ سَمَاك
العُمْدهْ منْتظْرِك هِناك
ومِن هِناك درْبَك عديل
نادِى المُدرِّس وَدْ خَدوم
والمديرِس وَدْ خدوم
العُمْر مربوط بالجرَس
والصبْرِ مشْنوق الضُحى
والخوف نَزَل من غير حَرَس
والعُمْدهْ فوق كل الأصول
لمْلًم جِرايواتُو وجَلَس
عُمدةْ فوق كل الفصول
فى التلاميذ فى الطباشير
فى التعابير فى النَّفَس
يا طه يا
يا إنتَ يا يا ودْ خدوم
ملعون أوهو الكان ده يوم
الإنتَ عريان وقَّفَك
والعمدهْ قدَّامك رَفَس
وعليكَ إنتَ براك تخمّن
هل تكّلم أم تنَحْنَح أم عَطَس
والعُمدهْ قال:
يا إنت يا ..
يا طه يا
يا ودْ خدوم
أنا عندي إنتَ براكَ كوم والحِلَّهْ كوم..
يَاخ ديل بَقَر فى أحْسن الأحوال غجَر.
أنْسَانى من كومَة هدوم
مشْرورَهْ فى الطين والهموم
ما حاتَنْشَف حتى لو نِشِف البحر
والنساوين والغيوم
ما حاتَنْشَف ..ما حاتَنْضَف ما..
والعمدَهْ فوق راسك هتف:
(مسئول كبير زاير البلَد
وانتَ يا طه العِماد..
إنتَ الفهَم إنتَ السنَد
لِمَّ الصغار
وزِّع عليُهم كلِّ واحد فَرْد ..فَرْد
الفرحَهْوافرُش سِكّتْهم مرات طراوَهْ و..
مرّهْ وَرْد
ولمَّا يهتفوا فى الفصول
يحيا ويدوم عاش البطل
ما يكون هُتاف
من أىِّ فَم يطْلَع زَخم يطْلَع زبَد
تنْهدَّ حيشان البيوت
والفرحَهْ فى أحسَن مزاج
لا تْخَلِّى دابَهْ..ولا تُرابَهْ ولا أحد)
هل انتهى يا ربى زيَّاك العَمَد
يا ود خدوم
وانت سايس للعقول
دَه عليكَ إنت بَراك بعْرِف:
هل تقدّم أم تزحْزَح أم جَمَد
والمديرِس ودْ خدوم
مع إنّو فى حلْقُو مو عَلّق
كُلَّ أجراس المدارِس
كلَّ صوت فى الدنيا عابِس
بِرَجْفَهْ لصَقَت فى سُنونو
كلُّ رجفات المساكين والعواجيز والعوانِس
صوت بيتْعرَى ويضِيع ويلمُّو صوت تَرْيان.
ولابِس..

***
وصرخْتَ يا طه وصرَخ
ضُل المشاوير فى الأصيل
فى الساحَهْ رفَعَت مُقْنَعهْا
الذِّلَهْ ... والصبر الطويل
رقَصَت مع الكلمات شُجون
وجَرَت ورا الأحرف خُيول :
"يا عُمْدهْ هوي"
حامت على الناس القَماري
وزّعَتْ سَعَف النخيل..
" !! يا عُمدهْ هوي"
مَشَت سحابَهْ
وجات ربابَهْ وزفَّهْ قامت
فى الطبول
"!!يا عمدة هوي"
الغافى فارق غَمْدَتُو
والصاحى تَمْتَم فى ذُهول
قام ودْ خدوم
"يا عُمْدهْ هوي"
يا عُمْدهْ بالله إخْتَشِى..
للعوْرَه ما بِنْفَع هُتاف
للسوسَهْ ما بْفِيدَك حَشِى
علّمْتَنا الجري فوق جروحنا
وقلتَ:أبداً دَه المَشِي
خَتْيتْنَا فى قلب المشاكل
وصِحنا كُلّنا
" مافى شِي كلمَهْ واحدَهْ
جناب سعادتَك
من ضمير ما مُرتَشِى
الحِلَّهْ يا .."
والعُمدَهْ ..أو سلطانو قام:
"الحِلَّهْ أيه..؟
حتَّه مُعلم مُبتدىء..
الحِلَّهْ أيه
مسئول كبير زاير البلد
لا ودْ خَدوم ولا ألفِ شُوم
أو ألأف بوم
!!حيَعَلِّم الوِّز كيف يعوم"
والعُمدَهْ جابِر..
دَه الصباح
مدَّ إيدو على الدفاتر
وقبلما ما ينْصَر جبينو
كان شطب كلَّ المساخِر
اللِّى حاضِر من مساخِر
والمُسافِر
ما عدا السجن العُمومي

عادل الخضر
11-05-2008, 09:19 PM
ليل المــُــغنين


إنتَ يا ليل المغُنين
فى صباحات اليتامى
فى البشيل فوق كتفو يمْشِى
لمَّا ترْخِى الخيل لِجامهْا
يا حمامَهْ
ودِّعينى
ودِّعى الارض البتزْرَع
فى جروف الحُب ضلامهْا
ارْخِى كتفِكةواحْضِنينى
وارْمِى فوق كتفى الملامه
صدِّقينى
صدَّقى البرْق البيبْرق
من ظنوننى
يدْخُل المُدُن الغريبَهْ
يغشى أيامهْا ودروبهْا
إنتِ ما الوهم البيغْسِل
كل أوهامى وشحوبهْا
تسْمَعَ الأرض ابتسامِك
تحْفَحظ الأنجم كلامِك
وانت روح النيل وِ سامِك
يا حمامَهْ يا غمامَهْ
مين حيدِّيك السلامَهْ؟

عادل الخضر
11-05-2008, 09:21 PM
الحزن القديم

ولا الحزن القديم إنتِ
ولا لون الفرح إنتِ
ولا الشوق المشيتْ بيهو
وغلبْنى أقيف
وما بِنْتِ ولا التذكار ولا كُنْتِ
بتطْلَعِى إنتِ من غابات
ومن وديان و منى أنا
ومِن صحْيَة جروف النيل
مع الموجَهْ الصباحيَّه
ومن شهقَة زهور عطشانَهْ
فوق أحزانهْا متْكَّيهْ
بتَطْلَعى إنتِ من صوت طِفلَهْ
وسط اللمَّهْ منْسيَّهْ
تَجينى معاكْ يجينى زمن
أمتِّع نفسى بالدهشَهْ
طبول بتْدُق وساحات لى فرح نَوّر
وجمّل للحُزن ممْشى
وتمشي معاي
خُطانا الإلفَهْ والوحشَهْ
وتمشى معاي... وتْرُوحى
وتمشى معاي وسط روحى
ولا البلْقاهو بِعْرِفنى
ولا بعرِف معاكْ ..روحى

عادل الخضر
11-05-2008, 09:44 PM
حـكــــــــــــــاية



في الزمن الموشّح بي سكين
وحربَهْ
والغيم المسافر
لَمّ دموعي خَبَّ

طلَّ الخوف ملفّح
بى حُزن الغلابَهْ
خلَّى الشوق مهاجِر
بين صمتي و
عذابْها
اتْلاشَت مسافَهْ
مابين سيل وغابَهْ
مابين ضُل سحابَهْ
وبين وتر الربابَهْ
اتلاشت مسافَهْ
بين صمتي و
عذابْها
فوق ايام حنيِنَهْ
مالتْ بي ضفيرَهْ
صَحّتْ موجَهْ نايمَهْ
زاد النيل دميرَهْ
مالت نخلَهْ
تهمس
لي موجات حسيرَهْ
عن أشواق أسيرَه
مامعروف مصيرهْا
يا غيـــم وين مسافــر؟

عادل الخضر
11-05-2008, 09:49 PM
مشوار


سوّاح
سوّاح دخلتَ معاكْ
فى ليل..
صَبى .. وظالِم
وسرَحتَ فى أحضان ظنِّي الجميل..
واهِم
إنّو البصيبنى معاكْ..
لازِم يكون راحِم..
من أوّل المشوار..
حسّيتْ بأنِّى معاكْ
حفيانَهْ منِّى الروح
ولا مجنون.. ولا سالِم
***
تقدّم سكّتَك مرَّهْ..
تأخِّر سكَّتى ..مرّات
وتظهر فى القمر أشكال..
لإحساس مرَّهْ جانى وفات
أقول يمْكِن سراب باللّيل
أقول جايز نُحول خافِت..
وادخُل فى ظِلال أنَّات
بقيتْ أحسِب حساب الشوق
واحِس بالجايى زى الراح
سوّاح دخلتَ معاكْ..
براي ،
أرحَم أكون سوّاح
بدونَك يا حبيب الروح..
بعْرِف أشيل الكون..
فوق راحتين .. وجناح
وأقْدَر أكون مجنون
حتى الزمن لو صاح
سوّاح دخلتَ معاكْ
وفيكْ غلبان .. وبيكْ مُرْتاح
(2)
حأفْتَح فى الجدار تاني
مكان على قَدْرِ أحزانى

أعاين فى جروف الليل
وأكتب فوق سروج الخيل
وبى سعف النخيل
تفصيل
حكايَة فقْدِى عنواني
وافتَح فى الجدار تاني
مكاناً لى حلم أخضر
ولا شُفْتو .. ولا جانى
الله.. وليه يا ليل
الله.. وليه يا ليل
تسافِر موجَهْ شتويَّهْ
تفتِّش فى ضواحي الكون
مراسيهَا النهائيَّهْ
وافتَح فى الجدار تاني
مكان ما بشيلا أحزاني

الله .. وآه يا نيل
أمامى رِحال..
ورَاي وادي
أحبَّك فى جروف الليل..
ضلامى .. وعُدتى .. وزادى
واحبَّك تاني..
وتاني ..تاني .. واتي..
وافتح فى الجدار تانى
مكاناً لى صباح وضُحَى
وارسم فى النهار وامْحَى
أماني ولا دليل .. لا حيل
وأ{سم فوق منابع النيل
شجونى الضاحكَهْ مُنْشرحَهْ
وأحبَّك تانى .. تانى .. وتانى
وافتح فى الجدار أشواق
مواعيد لى فرح حانى
(3)
وقفتَ على أمل شارِد
ونازِل من شعاع الروح
واقف فوق أمل ناهِد
وقفتَ معاكْ ظلال أشجار
على كل الحَصَل شاهِد
بأنّكْ إنتَ روح الكون
وانتَ الماشي والصاعِد

دوام بتلمِّى فى المغبون
وفى المحزون
وفى الغلبو الزمن قاعِد
وقفتَ على أمل مشبوك..
بأطراف الندى
ومحبوك..
على غُرَّة جبين نادِر
وفوق صهوَة فرح عامِر

إنتَ الغامِر الغامر
وإنت الآمِر .. الآمِر
وإنتَ المخفِِِِِي والظاهِر

وإنتَ فَرَح
جنوني
ومنْتَشى وآمِر
يا نجمَة صباح طَلعَتْ
على كون فى الدجى مسافر
إذا كان لُقياك
أنا الربحان وأنا الخاسِر
ويا غيمَة زمان آسِر
إنتَ الفيكْ أصيل مخزون
من بهجَهْ وطلاوَة رُوح
يودِّى الزول مَحَلْ ما يُروح

عادل الخضر
11-06-2008, 08:28 PM
سحابات الهموم

سحابات الهموم يا ليل
بَكَن
بين السُكات والقول
وباقات النجوم الجَّن
يعزَّن فى المطر
فاتِن عزاكْ
رَجعَن
وشوق رؤياكْ
زمان مشدود على أكتاف خيول
هَجَعَنَ
وصت ذكراكْ
مكان يجرى
يلاقِى السيل
وسِر مدفون بصدْر النيل
ولوا الذكرى
مافى أسف
ولا كان التجنِّي وقَف
وصوت ذكراكْ
رذاذ صفّق على خطوَة بنات
سَجَعَن
وشوق رؤياكْ
حنين لى غيبَهْ فى المجهول
ولولا الذكرى مافى وصول
ولولا الذكرى مافى أصول
ولوا الذكرى مافى شجن

عادل الخضر
11-06-2008, 08:37 PM
مرســـــــــــــى النجـــــــــوم



وجيتْ يا حِلوَهْ
زي زولاً قَضَى الايام
بُكا ومنفَى
وجيتِك من بلاد باتت
على نار زيفهْا
تِتْدَفا
أنا المسجون زمن يا حلوَهْ
فيها مداين الكُلْفَهْ
ولا قيتِك
سلام عينيك
رماني على سلام وصفَا
أماناً فيكي فتَّح ليْ
على مرسى النجوم ، شُرفَهْ
ولا قيتِك
هموك من هموم الغير
وفي حال البلد
والريف
وفي النايمين على الأحزان
وفي الصاحين
مآسي وخوف
في التاهين مع الأشواق
متين تنْزَاح سموم الصيف
ولاقيتِك
غصناً مال على الأمواج
وهفْهَف
فوق خُضُرْة القيف
أحبِّك بى مشاعر جيل
رفَع للشمس رايَهْ وسيف
وثبّت في الأرِض أقداموا
في أعماق تُراب الريف

عادل الخضر
11-06-2008, 08:41 PM
وطـــــــــن



حأسأل عن بلد رايح
وافتِّش عن بلد سايح
واسأل عن امانينا
الِّي ما بتدِّينا
صوت صايِح
وأسأل وين مخابينا
إذا جانا الزمن...
لا فِح
واسأل عن بلد مجروح
وعارف الجارحو ليه جارِح
وابكى على بلد ممدوح
وعارف المادحو
ما مادِح
واحْلم بي حلم مسروق
لا هو الليَلهْ
لا امْبارِح
أعلِّق في جناح سَفَري
خطابات لي زمن فجْري
وادْخُل من درِب سرِّي
لِكُلِّ مضاجع الأحزان
واضفِّر من شجر بلدي
بروقاً مارْقَهْ من صدري
حأسأل عن بلد غاطٍ
لحدِّ الليلهْ في الوجْعَهْ
أَنُط فوق سرْجي واتْحزَّم
أقوم من وقْعَةْ
لي وقعًهْ
أخُتْ ايدي البتوجِعْني
على السأم البِراجِعْني
واسأل..
يا وطن يا بيتنا
ليه شوقك مواجِهْني
ليه حُبّك مُجهْجِهني
وليه تاريخ زمن خسران
موكّر لسَّه في شجني؟
حأكْتب لي شجر مقطوع
مسادير
يمْكِن يتْحرك
خطابات لي طِفِل مجْدوع
يقُوم
يجرى
يَقَع
يبْرُك
رسالَهْ لكلِّ قُمْريّه
إذا دم الشقا اتوزّع
على كل البيوت
ما تْرِك
واسأل..
عن وطن رايِح
وادّيكم خبر جارح:
بأنّو جميع جُموع الناس
حيفْضَلوا لا كُراع
لا راس
ونشترى في الدكاكين يوم
مسابِح من دموع الناس
مساحيق من هموم الناس
زَهَج
يتْعَبّا في الأكياس
ونعْلن في المزاد علناً
وترْغي الجوقَهْ والأجراس:
"!نبيع الطِفلَهْ والكرّاس"

واصْرَخ
! ياوطن! يا بيتنا
ليه ما تبقى لينا الساس
قَدُر ما تجري فيك
أفكار...
يزيدوا الحَبْس والحُرّاس
قَدُر ما تجري فيكْ الخيل
تَدُوس الهيبَهْ
والإحساس
واسأل
يا وطن رايح
اذا كل القبور دَخَلت
بيوت الناس
بلا اسئذان
بلا صلوات
بلا أكفان

جريمَهْ اسائل الدّفَان؟
حريمَهْ طَلَب تَمَن قبري
من البايع في أيِّ مكان؟
واقولكَ يا وطن
رايح
واقولك يا وطن
آمر
سلام النّفْسِ ما كافر
ولا كافر
ولا كافر

عادل الخضر
11-06-2008, 08:47 PM
ضـلــــَّمــــــــــت



أقـــول
والشمْسِ في عِزّ الامل
تُهْتَ ومشيتْ
أقول يا نحن يا انتو و
بكيتْ
يا مواعيد
يا صباح من غير وسِم
تُهْتَ ومشيت
ما ضَلّمَتْ
ما بْتَعْرِف الزول البِجِيك
ولا البِجيكَ
بيعْرِفَك
حتى الشبابيك
والزوايا الكان بِتَجْمَع
في حنايا الشكوك


ضلّمتْ
أغْشاكِ يا نفسي الغريبَهْ
من همومي اطلِّعِك
القاكِ واقْفَهْ على الطريق
أحزان بِتفْرح
وتشْتبِك
أفراح بِتحْزَن
وترْتَبِك
لمّنْ رحلتَ مع الغُنا
عِز الأماني و
ضلّمـــــت
مَدّيتْ على الأمل القريب
أشواق كتيرَه و
قَصّرَتْ
في زاويهْ من ضُل الشجون
جابتْ ظُنونا و
قيّلَتْ
كلّمتَ أشجار الخريف
عن شوق نَمَا
في الوحشَهْ والزمن الأسيف
دلّتني اْفتِّش
في المغارِب
والمشارِق
عَن علامات
أو رصيف
ترقُد الأزهار عليهو
يا بنفسج
كُحْلي غالي
وبُرتقالي
امشوا انتو
أنا البقِيف
ما ضلّمَـــتْ

عادل الخضر
11-06-2008, 08:54 PM
إتخـــيلي



إتخيّلي
إتخيّلي الأنهار
ماصابْها أيّ مَرَض
وإتخيلي الأكون
في مهرجان مسْحور
هَدَتْ النجوم للأرْض
واتخيليني وحيد
و أنا فاتني يوم العَرْض
يا نيل صبي وممْشوق
من بهجَة الأمواج
في زفّهْ مُنْسابَهْ
طارت سحابات شوق
لِمْسَت حَشَا الغابَهْ
طارت طيور بِ الكوم
طافت على الاشجار
لِقَتْ النخيل محْموم
غنّت مع الساهرين
غنّت غُنا العاشقين
" يا ماشي فوق النيل
هاكْ الجمال منديل
يا جايي من النيل
هاكْ النخيل اكليل"
واتْخيّليني وحيــــد
أنا والجروف
والسيــــل