المساعد الشخصي الرقمي

مشاهدة النسخة كاملة : مكتبة الشاعرة د. عفاف الصادق حمد النيل



عادل الخضر
10-28-2008, 12:27 AM
ثمار دمى


بريق الصحو فى النجمات
جانى الليلة شايل منك الكلمات
قايل لى
انك انت جاينى
ومعدى لى
منو القال ليك انت الليلة
جايى يادوب
منو القال ليك
مهاجر هسة جوة قلوب
ومين قال ليك
ليك زمان تفتش لى
مدن ودروب
ما انت معايا فى جواى
غرستك من ثمار دمى
وبنيت منك جمال دنياى
واحبك انت فجراً طلّ
فرّح ناس
وخطّ بدمو كلمة ريد
بقت تاريخ
بنى وشيد عليها الساس
واريدك
انت مطراً جاء وسقى التيراب
وصبحت بيك حياتو خريف
وجدول فرحة فيك منساب
يناغم قلبى فيك ويقول
تعال نفرش دروب الريدة للاحباب
بزهرة حب جذورها حنان
غصونا امان
ثمارا بتدى طعم الريد
وريد بيسعد الانسان
مادام ما انت باقى معايا
فى جواى
غرستك من ثمار دمى
وبنيت منك جمال دنياى
حأبنى الدنيا جنة ريد
واعطر بيها ديما غناى

عادل الخضر
10-28-2008, 12:30 AM
حكاية فاطنة السمحة


كم ايام يا بت الزين
تقول هى سنين
كتيرة خلاص
تطول وتطول
واشتاق ليك وافكرفيك
يجينى دعاش سمح بلحيل
شايل لى سماح امى
وحنين امى و يطرينى
صوت امى وكت ما تصيح تنادينى
تعالى ضناى
وجيبى معاك فنجان شاى
واقعدى حداى
تحكينى وتهبش لىّ فى شعرى
وتجر التوب تغطينى
احس بالنسمة هابة على
لامة الدنيا بين إيديا
واقول يايمة حجينى
تقول فرحانة ليك حاج بات
خيراً جانا خيراً جاك
قالوا زمان
في بتاً سمحة عاد بلحيل
عيونها جميلة
زى القمرة فوق النيل
وسبايب راسها متل السيل
طويلة عديلة بس البانة
قط ما ليها تانى مسيل
وزى ما قالوا بتاً واحدة وإيداً لاحقة
وأى انسان داير
فاطنة ليهو عروس
وعاد بى وين ؟
وفاطنة ابوها ما بديها راجلاً شين
وفاطنة اماتا بيضاروها فى العينين
وكان لى فاطنة عم محمول
بسبع بنات
فات فوات عليهن وحول
قالن مرة كان دى الحالة
ما بنرتاح
ما دام ما فاطنة ماسكة الدنيا
ليل وصباح
شبت واحدة
لازم فاطنة بس تنزاح

عادل الخضر
10-28-2008, 12:38 AM
حكاية فاطنة السمحة (2)


وفاتو عديل بوش البيت
يا ابو فاطنة جايين ليك
طلبنا يا عمى ماهو كتير
دايرين فاطنة نمرق بيها
نمشى نسير
قال ابو فاطنة
شورة فاطنة يا بنوتى
عند اماتا
يا أماتا خلن فاطنة تمشى وحاتا
قالت اماتا
شورة فاطنة يا بنوتى
عند اعماما
يا اعماما فاطنة نسوقها بينا امانة
قالوا اعماما
شورة فاطنة عند خيلانا
يا خيلانا دايرين فاطنة
تمشى معانا
عاد ما فاطنة بت محبوبة
واصلوا الشورة عند حبوبة
يا حبوبة جايين ليك
وقولاً خير صباح عينيك
تمرق فاطنة بس ساعات
معانا تسير نجيك صادات
مرقة فاطنة صعبة خلاص
وفاطنة الساس وفاطنة الراس
ومرقة فاطنة بالحراس
وكان دا القول
بشتت ليكن شوال عيش
وواحداً سمسم وأردب فول
كان اتلمى تجنى دغيش
تسوقن فاطنة
وإن ما تلمى عاد معليش
تف تف تف وقعن ليك السبع بنات
يلمن فى الحبوب ساعات
ملن فى لحظة شوالات
وقالت ليهن الحبوبة:
ها بنوت بقيت مغلوبة
سوقن فاطنة
بس غنوا با
عاد يا ستى فرحوا كتير
لا ناموا الليل كبير وصغير
ودغشاً طلّ ليك يالله
مرقن يناغمن
هوى يا فاطنة ارحكى صباح
بتملى دربنا كلو سماح
وجاتن فاطنة ...كدى كدى
جاتن فاطنة لابسة زماما
دارعة الشف تقيل قداما
كاسية حجولا فوق اقداما
داك ياسوار
قصيص سيموتا ورىّ تماما
مرت فاطنة زى قمرة
تضوى سماحة تضوى وسامة
وماشات ليك فى درب طويل
قالت فاطنة:
وعاد ما فاطنة بت العز
تهز وترز
شن قدر قديماتا على المشى
الكتير وطويل
قالت ليهن :
ها بنوت إخير نرتاح تعبنا كتير
اجى يا فاطنةهو نحنا مشينا دابنا متين
قومى ارح هداك النيل
وجنب النيل شافوا نخيل
تمرو جميل
عاد بطلع لو فيكم مين؟
وتأتى الاجابة

عادل الخضر
10-28-2008, 12:40 AM
حكاية فاطنة السمحة (3)



شبت فاطنة انا البطلع
عاد ما ابوى بدورنى ارجع
إن ما خفت شفى يقع
عمى بدقو ما فى وجع
وكان ما خفت خاتمى يطير
خالى بجيبو ما هو كتير
كمان كان خفتّ حجلى يروح
بدقو ابوى وبفدى الروح
وطلعت فاطنة الدهب الاحمر
تشبه قمراً هلّ ونوّر
وصلت فاطنة الشجر العالى
وبين ورتابو تبق وتلالى
وديلك قالن ووب وانارى
وهزت ليك الشجر الاثمر
ونزل التمر الاحمر وأخضر
وشالن هن التمر الطاعم
وختوا لفاطمة التمر الاخضر
ولامن فاطمة شافت الفوق
فرحت وقالت
عاد يا خواتى سمح الذوق
هوى يا فاطنة دربنا عديل
نوصل أهلنا قبل الليل

عادل الخضر
10-28-2008, 12:42 AM
حكاية فاطنة السمحة (4)


وفوق السكة قالت التانية
الما رمت حفلتها
تموت حبوبتها
وهن دسنها رَمَنَ الطين
وشالت فاطنة كل دهباتها
هاك يانيل
قالت التالتة
الما نفضت ريكتها
تموت حبوبتها
ونفضن ليك التمر الأحمر
ونفضت فاطنة
وطع الاخضر
وضحكوا عليها ضحكة شر

قالت الرابعة الما مرقت
حفلتها تموت حبوبتها
ومرقن ليك الدهب الاحمر
وخلن فاطنة تنوح تتحسر
وعرفت فاطنة ضحكوا عليها
ابت ماتمشي
فاضية ايديها
وديلك فرحوا وفاتو خلاص
خلن فاطنة بت الناس
قاعده براها
دون حراس
وقعدت تبكي جنب النيل
ومتل النيل
دموعها تسيل
وهبت ليها هبوباً حمره
قالت فاطنة ووباً لي
قالت ليها
ووباً ليك من الجاييك
وهبت ليها هبوباً خضرة
قالت فاطنة ووباً لي
قالت ليها ووباً ليك
من الجاييك
وهبت ليها هبوباً زرقة
قالت فاطنة ووباً لي
قالت ليها ووباً ليك من الجاييك
وجاها الغول
كبير وسمين
وصرخت فاطنة من الخوف
وضحك الغول
لقيت لى عروس تبرد الجوف
وعرف الغول
وقال لي فاطنة
قول معسول
بطلّع دهبك شف وحجول
وقفلت ليهو فاطنة اضنينو
وسدت ليهو كمان نخرينو
وشرب الغول موية النيل
لامن كملت
وفضل الطين
وجاب لي فاطنة الدهب البلمع
وماهو خمج
من النيل
بس قال ليها
دايرك لي تبقي عروس
وان مادرتي
لحمك مني بملى ضروس
قالت فاطنة اخت ليك
هي ضى عينيك
قام قال ليها
أخواتي مية
قالت فاطنة
اماً ليك
حنينة عليك
قام قال ليها
أماتي مية
دايرك لي
تبقي عروس
وان مادرتي لحمك مني
بملا ضروس
قالت فاطنة
حي رضيت
ووباً لي من دي حالة
فيها بقيت
وشال الغول فاطنة في ضهرو
وقام مشى بيها
مشى مشى بيها
ومشى وداها
لي عند قصرو
وعرسّ فاطنة بت الناس
فاطنة الساس..وفاطنة الراس
وشعرك ليهو سوّ فراش

عادل الخضر
10-28-2008, 12:44 AM
حكاية فاطنة السمحة الأخيرة


ونام الغول
ونومة الغول
عاد ماحول
وقمة الغول
عاد ماحول
وامات فاطنة
يبكوا دهور
وابوات فاطنة
عدموا الزول
وكان فى الحله فارساً اصم
قال اّ فاطنة
ليك ود عم
شال السيف وركب الخيل
وماشي وماشي
فات بو عديل
لاقي عجوز
قالت ليهو
صُد بي دربك ارجِع فوت
درب لي فاطنة
فوقة الموت
قام قال ليها
أفّو أفو
ارجع افوت انا
كيف خيبان
قسمت يمين اخو الأُخوان
لا خواف ولاني جبان
قالت ليهو خير ياجناي
كل الدايرا ليك أقول
نومة الغول
عاد ما حول
قومة الغول
عاد ما حول
وهسة الغول نايم ليهو شهور
قلب الفارس خفّ كتير
دقّ حصانة
قرب يطير
درب للسمحة بمشي بسير
جَد جِد ليك جد ياغول
فراشك من شعر مجدول
ونَفَسك من عطر وبخور
نوم ياغول
نوتك لسة ناقصة شهور
قام بالطول
لاتحزم لمّ لجام جواده
يصول و يجول
حصل فاطنة عند الغول
ناغم ليها قام صاح ليها
هوي يا السمحة
جيتك ازور
أهلك انتي شالوا نذور
زولاً يجيبك من الغول
يبقي عريسا
بيك مسرور
والشعر الليل الكان
متوسد فيهو الغول
قصّاه الفارس
خلى عقابة
وخطف السمحة بيها لي احبابة
وعفش الغول
يبكي ويناغم ليهو يقول
الغول اب نومة سنة
اب قومة سنة
نوارة البيت شالوها
وعاج الغول
نايم ليهو شهور
أما الفارس دق حصانة
حوافره تغني
خطف السمحة
وبقي متهني
وفي دار فاطنة اتلموا الناس
شيوخ الحله
دقوا نحاس
شباب الحله
سووا اعراس
وناس الحله شالوا صباح
كرامات فاطنة
بالتيرن وبالداح
وسط الفرحة
عرس فاطنة
فارس الكر
وملت الفرحة الحلة دهر
وعاشوا سلام
وعاشوا امان
وجابوا اولاد
وجابوا بنات
لُطاف وحُنان

ابراهيم العمده
10-28-2008, 06:20 AM
تسلم أيها الرجل السمح بقدر سماحة بلادي

عادل الخضر
10-28-2008, 09:41 PM
تسلم أيها الرجل السمح بقدر سماحة بلادي




دوماً يخجلني حرفك يا عزيز

لك ملء ما يسع قلبي من محبة

عادل الخضر
10-28-2008, 09:42 PM
لحظة سفر



لحظة سفر وقف الزمن
والليل اسدل ستايرو على
حسيت بانو الكون ملبد بالغيوم
نزل المطر حزنان على
ورغم المطر بنزل
عشان فرح الاحبة
انا كنت فاكرو
ببكى لى
فى كل مقبض باب
بحس نبضك عفاف
وف كل همسة ناى
بحس صوتك معاى
يا منبع الطيبة الحنون
يا سر وجودى وكون هناى




لحظة سفر
كلمات عفاف

اقسى لحظة تمر على
لما انت تكون مسافر
تبقى هى المر الحقيقة
وبحسب الزمن البعدى
بينا بالثانية ودقيقة
ولما انت تكون مسافر
بسـتـِّــف الحب بين ملابسك
شان يلامسك
كل هدماً ترتديهو
تلاقى فيهو قليبى حارسك
ولما تهدأ فوق وساتك
تلقى روحى ملت جوانحك
ولما تغمض رمش عينك
ابقى فى نومك ازاحمك
ولما تبقى امام مرايتك
تلقى صورتى كست ملامحك
ولما تزعل من قرايبك
امحو زعلك يوم امازحك
وكل موقف من مواقفك
ابقى قدرك
وابقى فيهو انا البشابهك
ولما تمرق لى صحابك
وكل زول بى شوق يسالمك
تلقى فى إيديهو إيدى
ولما بالاحضان يصافحك
تلقى فى احضانو حضنى
ولمحة من عينى تصابحك
حتى فى نغمة سلامو
تلقى صوتى مزج كلامو
وتحس بىً انا البصارحك
وين تسافر منى تمشى
وين تقبل منى تبرا
يانى فيك انا امتزجتّ
بمزج النفس البيطلع
مرة شهقة ومرة زفرة
اكوّن الدم فى عروقك
وامشى فى شريانك ابرى
مسلك الحب فى وريدك
منو بغرف ومنو بروى
يانى ندك وليك نديدك
عنك اكتب ومنك اقرأ
والتزاماً بالقضية
والتمسك بالمبادىْ
والمبادى هىّ الحقيقة
والحقيقة العندى هىّ
لا مساومة لا مسالمة
فى المقاومة بى مداومة
والتزاماً حق تماماً
انا البريدك
انا البريدك
وين بتمشى بلايا درباً
كل درباً تمشى فيهو
لى بودى
وكل حدود الدنيا عندك
هى حدى
واينما قبلت تلقى
انك انت منى لىّ
وانك انت كل ما عندى

عادل الخضر
10-28-2008, 09:52 PM
بـــــُـــــعدَك إنت


بـُعدك انت علىّ هين
ولاّ قايل إنى حِملو
مالى حيلة ولا قُدرة ً
فى بعادك كلو كلو
هدَّ حيلى وجسمى يتقل
مانى بقدر اقوم اقِلو
والموازين تختل فينى
وكل شيتًا ما محلو
لو عمرنا فضل دقيقة
اقضى فى جنبك اقلو
مانى بعرف
اتنى للريح ضهرى
تمشى
ولا ابقى اقيف قصادها
خوفى من خاطرًا تكسرو
تلقى فينى قدر مرادها
ولا اهّوم من حداها
ولا ابقى اقيف حواها
ولا ابعد افوت قفاها
واختَّ دربا
مانى قدروا
كل زول واقف قصادك
صدَّ ليك
ودقَّ صدروا
لو هى بيض النوق نجيبا
لو لبن طيرا نحلبو
حتى النجم ان درتوا انت
نجيبوا ليك
ولما تقعد انت جنبو
تطفى نورة
وتبقى بدرو
كلو هين شان رضاك
فرحنا نحنا البرضى قلبو
انت طلباتك اوامر
نوفى ليك الغالى نذرو
الا بس حاجةً وحيدة
بعدك
انت
مانى
قدرو

ابراهيم العمده
10-29-2008, 06:20 PM
دُم فينا أيها الرائع دوماً
ود الخدر لأنك مبدع دائماً ماتتحفنا بالمبدعين
أن شمعةُ الضياءِ لنا

عادل الخضر
10-29-2008, 10:40 PM
دُم فينا أيها الرائع دوماً

ود الخدر لأنك مبدع دائماً ماتتحفنا بالمبدعين

أن شمعةُ الضياءِ لنا




الحبيب ود العمدة

أسعد بك جداً يا صديق وأنت بيني

كتير من المحبة .... كتير من الأشواق