المساعد الشخصي الرقمي

مشاهدة النسخة كاملة : ياحبيبة بخاف عليك....



تينه
07-15-2010, 03:50 PM
(1)





ياحبيبه بخاف عليك من زمنا الجاي بي همو....

الوشوش ماهي الوشوش والقريب بقي مابهمو

يقطع الرحم اللي وصي ربي بيها كمان نلمو...

زولا" يسرق زولا" ينهب الحرام عشش في دمو

مابخاف من الله يقتل لي اخوهو بي سم يسمو

لبنات الحله غازل دا الزمان عرضو بيلمو....

كيف بقينا زمنا صار الولد يلعن في امو....

ياجماعه تعالو نسرع نلفا للباقي ونرمو....

ننشر الخير في بلادنا والصلاح بالجد نعمو......

كل واحدا" يبدا بي اولادو هو ثم تانيا ود عمو.....

ينصح البقدر عليهم واللي فرا كمان يضمو...

الصور مقلوبه ياما وبكره سودانا البينمو.....

يبقي رايد ويبقي قدوه والشباب يقوي عزمو...

راجيه ردا من جنابكم وكل زولا يدي اسمو....

تينه
07-15-2010, 03:52 PM
(2)

ياحبيبة الدنيا غابه والغزال من طبعو لين...
الاسود العايشا فيها تاكلو بالساهل وهين...

حاسبي من الجاي بكره راعي دينك راعي ربك
امشي في دربك عديييل تحمي نفسك ما بغلبك

صدي كل القال اكشفي و لحجابك اسدليهو
صلي وكتك..اقري حرفك..بالعلم كدي تغلبيهو

الزمن ياحلوه قاسي دايراو منك اجتهاد
ختي بالك في كتابك دا العلم فرض وجهاد

برجع اذكر لي وصايا...مره مره واقبليها
يا بتاخدي بي زمنكم يا بتعملي باللي فيها

تينه
07-15-2010, 03:53 PM
(3)

ياحبيبه استري حالك بالقليل ابنيهو عشك...
لو بحبك قدريهو..سيبي لو حاول يغشك...

مافي عرسا بالجبر كان استمرا....
مره صايب والقسم بتخيب في مره...

شيلي بكره في عيونك احفظي الامل اللي جاي...
لولي لي اولادنا باكر غني ليهم من غناي...

غنوه عن وطنا بفتش لي ولادو الهجو سابوو...
دايرهم يجو جوه تاني يبنوو ليهو يعمروو...

يسقوو تيرابو البهفهف في ربوعو وفي قراهم...
يرمو بذره...يسدوا حفره تقوم سنابل بي وراهم

تينه
07-15-2010, 03:57 PM
الخربشات دي كتبتها لي بتي..وبالجد كنت بشوف حاجات وبتخوفني من الزمن.. قمت كتبتها ليها قبال سنتين وشويه

او اكتر ما متذكرة جد...وكل مرة كنت بضيف جزء حسب الحاصل...اتمني تعجبكم ياارب هي تقريبا 13 جزء حا انزل ليكم 10 والباقي خاص بي احداث في منتديات اخري او نصايح اخري..واخرهم اتعمل للكلية بتاعتي لانهم ادوني جايزة شعرية بالمرتبة الاولي للشعر العامي مشكورين

اركمانيه
07-15-2010, 09:46 PM
تسلمي تينه
وحاجه جميله
وفى انتظار الباقي

بسطاوى
07-16-2010, 02:20 AM
كنت اعلم انك جديره بكل هذا الاحترام وما خاب ظنى فيك
القصيدة جميلة ومعبره , برغم ثقل الرساله التى فى جوف القصيدة
إلا انها لم تنزع عنها صفة الجمال فكانت كالعذراء خلف حجاب
لا يرى جمالها بالعين ولكنه يدرك بكل الحواس ,, هكذا ادركت جمال حرفك
اكملى القصيدة ونحن انتظار ,,

تينه
07-16-2010, 12:59 PM
تسلمي تينه
وحاجه جميله
وفى انتظار الباقي

مشكورة اركمانية تسلمي انتي ...باذن الله:36_3_15[1]:

تينه
07-16-2010, 01:00 PM
كنت اعلم انك جديره بكل هذا الاحترام وما خاب ظنى فيك
القصيدة جميلة ومعبره , برغم ثقل الرساله التى فى جوف القصيدة
إلا انها لم تنزع عنها صفة الجمال فكانت كالعذراء خلف حجاب
لا يرى جمالها بالعين ولكنه يدرك بكل الحواس ,, هكذا ادركت جمال حرفك
اكملى القصيدة ونحن انتظار ,,

ياااخ رووح ربنا يفتحا في وشك محل تقبل.....والاحترام هو شال صفتو منكم اخونا القدير بسطاوي...

بتشجيعكم القدير بسطاوي ...ربنا يسلمكم يااارب

تينه
07-16-2010, 01:06 PM
(4)


ياحبيبه...جنوبنا غالي..والغرب في القلب جوا....
مافي عميل بشيلو منا...نحمي طيب نحمي قوة...

نجمع الشمل اللي فرق بين حبايب بين اهل...
ننشر العلم البضوي نمحي للجوع للكسل......

انتي من جانبك شويه..واحنا بالكد والعمل
نبني سودانا الجديد ندحر الخوف والفشل

تينه
07-16-2010, 01:08 PM
(5)


ياحبيبه رجالنا قدوه ضربوا في امدرمان مثال
لعدوهم وقفوا وقفة ديل رجالا من رجال...

لخليل الكلب صدوا وللي زيوا كمان ابوو
لعميلا يخش بلادهم للشهاده كمان سعوو

ياحبيبه تشوفي ليهم ديل رجال بالجد وجد
لاعيونم لحظة زاغت لاهزيمة تقل عدد..

اسمع النضم البقولو ياخليل الغازي لينا
طالما ديل هم ولادنا مافي كلب بقدر علينا

تينه
07-16-2010, 01:11 PM
(6)

ياحبيبه الكل تغير حتي للصاحب تنكر...

ابقي عشرة علي صحابك حتي لو ماءك تعكر

الصديق ياهو البتلقي وكتن انتي تدوري شورتو...
ماتقولي اسيبو لحظه عقلك ينسي يمحي صورتو...

الصديق ياهو الاخو...هو البحس بالجوه قلبك
هو البينصح هو البوري هو البيعدل ليك دربك

اوعي تنسي كلامي ديا زي حلق يبقي ف اضانك
امك الدايراهو ليك بكره علمك يعلي شانك

تينه
07-19-2010, 08:37 AM
(7)
ياحبيبة الحزن عشش جوا في قليبنا الحزين
لي فراق احبابنا يبكي يملا جوفو حزن دفين
الصحاب الباعو عشرة كان بحافظ ديما ليها
خانو لي عهودا بنوها ياحليل الوثقو فيها

بالرخيص باعوها عشرة بالرخيص خانو العهود
كيف يقولو معاك ديمه وين نجيب ليهم شهود

تينه
07-19-2010, 08:38 AM
(8)


يا حبيبه العلم ضوا لي ضلام الجهل نور
اوعي تكسلي بكره منو..العلم اصبح مطور

كمبيوتر مره يلزم حتي موبايل كمان
العلم والله ماشي احسن احسن من زمان

وقبل علمك خلي اخلاقك جميله ودين مكمل
شوفي والله الصور تبقي احلي وتبقي اجمل

تينه
07-19-2010, 08:39 AM
(9)

ياحبيبه ليه تخلي زول اقول عنك كلام
ليه بتدي وليه تخلي فرصه يتلسن عليك
ديمه خليك في سماك عاليه ماتجيبي الملام
يضربوبأدبك مثل.. ويحكوا بي عيلتك وبيك
زيدي في هيبة ابوك.. جيبي ليهو الاحترام
فرحي الام بي نجاحك بي ادب زرعهو فيك
اصلو بت الاصل تطلع من بيوت فيها الكرام

وقيع الله
07-19-2010, 09:45 AM
يا حبيبه العلم ضوا لي ضلام الجهل نور
اوعي تكسلي بكره منو..العلم اصبح مطور

كمبيوتر مره يلزم حتي موبايل كمان
العلم والله ماشي احسن احسن من زمان

وقبل علمك خلي اخلاقك جميله ودين مكمل
شوفي والله الصور تبقي احلي وتبقي اجمل



تينه ماشاء الله كلام جميل وبيعبر عن مكنونه ودى نصائخ غاليه ياريت لو نزرع فى اطفالنا وابنائا مثل هذه القيم الجميله
تسلمى تينه فخر الامومه
مزيد من الخربشات

تينه
07-19-2010, 10:27 AM
مشكور يا وقيع الله علي مرورك الجميل ...ياريت نزرع فيهم كل جميل والله...انا بحاول ومرات بتعب جيل متعب جد

تينه
07-30-2010, 03:55 PM
(10)

ياحبيبة صديقنا خاين كل يوم لابس قناع

اخدي بالك احذريهو بالبعد والامتناع

امحي لدروب الخيانة.. الكذب عمانا شاع

الصدق مابعلموهو الصدق خلقة وطباع

واللي خانك ادي ضهرك واللي اتنازل وباع

ماتكبي عليو دموعك اصلو رايح وعمرو ضاع

تينه
07-30-2010, 03:58 PM
(11)

ياحبيبة بناتنا جنن شوفي لابسات كيف وكيف
الخلق بالجد عجيبه واللبس ضيق شفيف
والعجب لو شفتي سوسو الشكل مقلوب مخيف
ابيض احمر بني واخدر الخمار فوق الكتيف
غتي راسك ياحبيبة شوفي بحترمك ويقيف
يحكي بيكي وعن جمالك بي قلب طيب نضيف
وسعي الاسكيرتي حبه طوليو يصل الرصيف
الاسم مره الشريعه واخرهم شطيف وحيف
مش كدا العيب ليك طايل؟ تقلي العقل الرهيف

أم الأولاد
10-06-2010, 08:57 AM
الله يديك العافية
واحساس الامومة يذيدك جمال وعمق ودف
حقيقي نقلتي افكارنا (في هذا الزمان ) وعبرتي بلساننا عن كل الهواجس
يا تينة ربنا يخلي ليكي بنتك ويحفظها من كل سؤ ويقدرنا علي تربية جيل فقد الهوية :36_3_19[1]:

تينه
10-06-2010, 05:56 PM
اميين يا ام الوليدات امييين
تشكري علي المرور يا راقية ومن ذوقك...

لاقاك عنكبوت هنا؟؟؟