المساعد الشخصي الرقمي

مشاهدة النسخة كاملة : من روائع اهلنا الشايقيه واسال الله ان تنال اعجاااابكم



ابو مازن
07-22-2008, 05:09 AM
من روائع اهلنا الشايقيه واسال الله ان تنال اعجاااابكم

زمن كان الدريب واحد حلينا بقينا فى دربين
خلاص اتفرقو القلبين واتيتم غرام وحنين
قبل كشح الوصال ماروق والشيل التقيل وقع
قدرما شهد المسيوق ولا الفطن التراب لسع
يا حليلك يا زمان الشوق ويا اروع حلم ودع
..........
حرام ما الريده بين سنين ومن زمن الصغار شفع
وقت اتصفح الايام بخصم قلبى لا يدمع
واقولو اصلو الزمان قدار والراح تانى وين يرجع
.........
رحل ما خلى غير تزكار مكتوب بى السواد صفحه
ضميرك خدروهو الناس بعد فوت الاوان يصحه
انت حاتل فى بطون الصى يجيك محل الندم نفحه
تقبل وين يتاورك ماضى مهما حنتو ما بتمحه
..........
حليلنا بقينا فى دربين وخلينا الحنين مزهول
احتار كيف يدارى البينه ونمرق من مصير مجهول
لكن يا حنين الحاجى فى دابنا الدريب بيطول
ولا تضهب وحاتك بينه نحن البينه مات مقتول
..........
خلاص اصبحنا فى دربين ويقن حادى الدريب يوم مات
بعد ضاق المراير كيف يتلمو انتصار وشتات
سعادتك لو تمن للفرقه بدفع عمرى لى الشمات
وليك اتمارى وين ما تبقى ياظالم حقيق ما مات
وقصيده اخري
عـــافــيـــة مــنــك وراضــيــة عنــك سـو رضايـا
ومـــا بـيــخــــيـــــب الـرضــا والـدتــو يـا جــنـايـا
أنت مـن يـا دوب صـغــيـــر مـن زمان دايماً مـعايا
أنــت ديـمـه أمـامـي سـايـــر مـا بخـليـك بـي قـفايـا
ما بتغيب من عيني لحــظـة ولا حصـل سبتك ورايا
لا من الله يشيـل أمانتوا أنا بـبـقي خاصاك بالرعـاية
ليَ يــرعــاك الـبـيـــرعـي لـيَ بـيــك يبـــرد حشايـا
أصــلـك أنــت هـديــه مـنـو والله بـيـك أجزل عطايا
جيـتــنـي واحـد مـالـي تــانى رحمـه في آخر صبايا
قـبــل مــا أفــقــد قــدرتـي وقـبــل مـا تنـهـار قـوايـا
جيـتـنـي ذي بــدر منـور وفجـأة طلـيــت فـي سمـايا
انـت لــمـا خـلاص كـبـرتـا دار تسيبني أعيش برايا
دار تـفـارقـني وتـسـافــر والـحــزن يصـبــح جـزايا
كيف يـهـون لك تحـزن أمـك شـان تحـقـق ليـك غاية
كان مسـافـر شـان عـلاجي بـلـقي في شـوفتـك دوايا
وكان عشـان تـســقـيــنـا نهـلك نحـن بي حنـك روايا
كان عشـان كــرعــيــنـا راحـل نحن بي بـعدك حفايا
كان مهاجـر شــان تـعـرس خـيـر أبـوك مالي التكايا
خـيـرو وافـر أبــوك يحـمـدوا مراحو مليـان بالسعايا
وبالـقروش الجـيــب مـجكن ولسه برضو الجايا جايا
بـرضـي مــنــك مـا بـقـصـر بـحـفــر أديـــك المعـايا
كــان ده كـلــو كـمــان شُـويّ بـتلقي في دهبي الكفايا
أصـلـي مـن ســويـتــو نــاذرا إبـقـي لــي أيـام قسـايا
خـاتـــا للــزمــن البـعــانـد لـي سعــادتــك يــا عشـايا
أنـت مـن شبـيـت صـغـيــر راسـي مـا بتحتاج وصايا
مـا حـصـل خيـبـتــا ظـني ولا فشــل فيـك زين غنـايا
لا تسـيـب أمــك تـهـاجــر يـمـه محـتـــاجــي الحـمايا
لا تسـيـبـني وراك تـرحـل إنـت يـاك ضُـلـي وضرايا
أنـت فـوق الـحـوبــة مـقـنــع إنـت للـمـكشـوف غطايا
دايري مـنـك تـبــقـي جنـبي . جنبي في فـرحي وبلايا
دايـري كـان قحـيـت اتـبـنـك ارفـع اقـســمـلـك غـتـايا
أنت سـاعـة تـبـقي جنـبـي تـبـقـي ضُـلــي وتـوب قفايا
ومـا بخــاف ظـلـم الـلــيــالي وأنـت يــاك عكاز عمايا
دايـري أقـضـي عـمـيـري جنـبـك أصـلو قارب للنهايا
خـايـفـي كـان ســافرتـا ترجع تلقي فـاضي البيت بلايا
حـيـنــا مـا بتـنـفـع قـروشـك وما تجـيــب لك أم سـوايا
مـاني عــارفـي سـبــب رحـيلك يـا وليدي شنو الحكاية
إلا تبـقي بـــراك شــايـف فـي فــــراق الــوالــدة غـايـه
ما بعاتبك وما بلومك لو رحلت بلـقي في الأمثال عذايا
عـلـي حـجــر دايـمـاً قليـبـك وقليـبـي كـله عليـك جنـايا
.................................................. .................................................. ..........................


سامحني وأصفح يا حبيب
ساقوني منك بالغصب
ندماني ليه سبتك براك
تتباكى في نص الدرب
طمني حالك إنتا كيفك
والبي ضمة ما صِعِب
أنا أصلي زول إحساسو مات
من بدري معتاد على الضربِ

كم مرة شانك يا مناي
من حنضل الآمال شِرِب
من خشمي تتقاطر دماي
لو ينطق إسمك بالكضب

لفوني من نص الديار
يوم عرفوا إني ليك بحِب
لكن كلما زاد بعادي
لقيتو شخصك لي قِرِب

سجنوني بين أربع حيط
زربوني من جيهتك زرِب
لكني شايفاك كل يوم
هل طيف خيالك يحتجب ؟

طالوني بالإيد واللسان
مافيّ شيتاً ما سِلِب
غير حبك الما قدروا يوم
يصلوهو ، ما ساكن القلب

أغرب شئ إني بي وراك
إنزلّ وإتهان وإنضرب
لكني في لحظة لقاك
بنساهو زي الكان لعِب

وريتهم إني لي حبيب
لو خنتو بشعر بالذنب
ساقيني راويني المحبة
ومن حنانه كمان شِرِب

يا أخوي زي ريدك ولادك
برضي للمريود بحِب
والله لو حاس بالعلي
ما بترضى بيتي أنا يتخرِب

زي ما بتدورلهم السمِح
لي برضو خير الدنيا حِب
لكني ألقى الدايرة وين
من ناس ماعون خيرهم نِضِب

دون شورة زي بيعة المِلِح
باعوني في السوق بالجلِب
وما راعوا لي أمي الدوام
تتباكى شاني وتحتجِب

باريت لي زول بالجتة بس
بارنك الروح والقلِب
أنا قلبي لو فارق ضراك
ما أضنو من بعدك بحِب

متحملي الآلام براي
شايلي الهموم ما بتتحسب
وما لقيت زول حتى العلي
قاسمني همي معاي تِعِب

عرفت صِح ألم الضرِب
ما بحسو زول غير الضِرِب
الغربة كيف
وعذابها ما بيطراهو إلا المغترب

فوضت لي الله الأمُر
وكتين من التحنيس غِلِب
مظلومة والمظلوم دعيتو
من الإله ما بتتتجِب

بكتبلك أسع يا الحبيب
متصبري وماسكي القلم
بكتبلك هسي والقليب
مجروح يعاني من الأم

مكتوبلي من شهر العسل
شهر المرض وشهر السجم
ملفوفة بي كفن الزفاف
والحني في إيديّ دم

مرقت من سجن الطغاة
ووقعت في الذُل والوهم
قبلت بالواقع المرير
آمنت بي أمر القِسم
قبلت بالدايرنو لي
كم قبلي مظلوم وإنظلم
ويئست من عيشة عذاب
راماني في زول ما رحم

إنسانة صرت بلا طموح
بلا مبادئ بلا قيّم
قنعت من الرحمة تب
بس فيك ما إنقطع العشم

مازلت ياك مالك القليب
رغم إنو أنا أمري إتحسم
ما زلت بفخر بيك وأقول
إنتا الحبيب في كل ملم

ما زلت بي إسمك بصيح
لو حتى ساكت إتهجم
وبقولها قدام أي زول
ما خايفي أصلو الموت هو كم

آخر رسالتي بطمنك
أرجوك لا تشيل لي هم
خليك في عهدك معاي
أرجاني لا يطول بيك سأم

أحفظني في جواك فرح
بلسم تداويبو الألم
زي حفظي أنا ليك بين الضلوع
إنتا وقليبي أنا جم جم

أخواني سيبهم يفرحوا
أنا جرحي لسع ما إلتأم
يمكن ضميرهم يوم يحب
ويعرفوا إني أنا إنظلم
ويعودوا شان يبنوا الوقع
كيفن بيبنوا الإتهدم

ديل ناس هوايتهم الظنون
ديل خلوا عيشتي بلا طعم
ما سووا بي حكم العقل
ما بيندم الليهو احتكم

الناس بتتقاس بالعقول
ما بي الجلاليب والعِمم
وأنا ماسكي في حبل الصبر
في الله أملي أنا ما اتعدم

سامحني وأصفح يا حبيب
ساقوني منك بالغصب
ندماني ليه سبتك براك
تتباكى في نص الدرب

ابو مازن
07-22-2008, 05:10 AM
محمد نصيبك أبا))
الفنان/عيسى بروي
ـــــــــــــــــــــــــــــــــــ
قسمتا شالا غيرك والإله كتبا
يا محمد نصيبك أبا
منو القبال دا خالف قسمتو وغلبا
قدر غير طريقا وبدلا وقلبا
المقسومة حارة شديدة في لهبا
لكن الصبر يهدي ويطول يغبا
صحيح فرقة ولف بعد السنين صعبا
أصلو الريد موهبة والإله وهبا
لو كان القسم بالريدة محتسبا
كنا نحقق الآمال زمن طلبا
ياما عنتر أمثال في الغرام ضربا
وراك للسنين الرايحي ما حسبا
مسكين منو ضاعت وضحوا في دربا
وبكت سحب الخريف والبادية بي عربا
قبلك قيس علي ليلى الدموع سكبا
أرض الريد سقاها وحوشا وزربا
ضاق المر تعب لم استوت رطبا
لا جنى للثمار لا ضاق حلات تعبا
كتير من زول دخل روض الغرام خربا
يا قطف الزهور إما سرق عنبا
اتأخرت ما اتقدمت في طلبا
تراها جبال من الشنقول كمل دهبا
لو كان النصيب بينكم وقف عقبا
دي قسمة ربنا تاباها شن ضربا
جاها الفي النصيب العجبتو وعجبا
اختارت براها ومافي زول غصبا
كتار المعجبين بدلها وأدبا
تاجوج في القرير فازت هي بي لقبا
كان القسمة ودتا لي بعاد غربا
برضها بتنا وإنت آبتدور كعبا
.............................. كان زادي
الشاعر/ علاء الدين أبو سير
الفنان/ عبد الرحيم ارقى
حبى أنا ليك كان زادى وكان جـوة الحنايـا دفيـن
كتّ بضارى من الناس وخايفة عليهو مـن العيـن
عليهو أنا كت بصوم وأفطر عليهو بكابـد الناريـن
كت بحسب سنين الغربة لما تعـود تجينـى متيـن
وكت برجاك فوق النار لمـا وكـت لقانـا يحيـن

نونس فى براءة أطفال وفى الحب نروى ننهل زين
وكلما يوم يزيد البينـا لمـل بقينـا قـاب قوسيـن
اتارى أنا كت فيك مخدوعة وكم من زيى مخدوعين
ما قايلاك بتلعب بى تعيش اللحظـة بـس والحيـن
وما قايلاك حبيـب آلاف وقلبـك قبلـة للضاليـن
وما قايلاك بتنسى حبيب صبر راجيك ستـة سنيـن
وساهر كم ليالـى طـوال يتقلـب شمـال ويميـن


كيفن هان عليك تنساهو زولاً كـان عليـك حنيـن
وتشغـل بالـك الأشـواك لمّـن تزبـل الياسميـن
كت دايراك بسمة عريضة فى وجه الزمان الشيـن
وكت دايراك ساعة الحاجة تبقى لىّ دخرى خزين
كت دايراك مقنع حوبة وكتيـن المضـارى يبيـن
وكت دايراك فارس أحلام تشاركنـى ونتـم الديـن
وكت دايراك أمل بسّام يزيل ألـم البعـاد والبيـن
كت دايراك شريك الروح واخدمك حافية القدميـن

وكت بحلم بك إنت معاى مجرتق بالعديـل والزيـن
جنبك فى يمينك قاعدة نسمع فـى دقـر يـا عيـن
تبشر زين مع الأصحـاب وتتشبـل مـن الوزيـن
أنا الأبحرت راكبة الموجة أكيد مرسايا بين موجتين

وداعاً يـا زمـن ظالـم وبالأفـرح علـىّ ضنيـن
وداعـاً يـا قلـب قاسـى لا بيحـن ولا بيلـيـن
وداعاً يا سراب خداع محال مابيـروى عطشانيـن
وداعا يا كلام معسـول حـدو ومكمنـو الشفتيـن
وداعاً يا سحابة صيف شايلى مطر ضليـلا رهيـن

تبشر بى خريف جايينا ياما النّاس رجوهـو سنيـن
كل زولاً يفكـر فيهـا مـا معروفـة تنـزل ويـن
وألف سلام عليك ياقلبى المسالم وديمة طبعو حنيـن
يتاورو الشوق ويلعب بيهو تنحر فى حشا السكيـن
تعاودو الذكرى تنتر جوا حالـو يحنـن المسكيـن

أخيراً منى ليك سلام وقبل ماتجف دمـوع العيـن
وقبال منّـى ماتعـدى وقبـال الفـراق مـا يحيـن
بخيت وسعيد عليك ان شا الله يبقالك عمـار وبنيـن

وقلبى أنا خلى فى أناتو بعدك يامـا راجـى أنيـن
ولو كان يا قلب حبيت بعـدو بعـد قسمـت يميـن
ما ينتمّ ليك مـراد لا تضـوق لا حلـو ولا زيـن
وتفضل طول حياتك تبكى طول عمرك تعيشو حزين
وعمرك ما تجيك سعـادة مـا تتهنـا قـول آميـن
وتانى الحب عليك حرمان ووعد الحر أمانة وديـن.................................

ابو مازن
07-22-2008, 05:10 AM
لا شوفة تبل الشوق ولا ردا يطمن

لا شوفة تبل الشوق ولا ردا يطمّن

أريتك تبقى طيب إنت ، أنا البي كلو هين

قليبا لي رهيّف عارفو ماب يحمل حنيّن

إنت ماب يغباك حالو الفيهو كل البيهو بيّن

بقيت مالي غير أشعاري أكتبه فيك وأدوّن

أقول يمكن تزيل ما بي ولاّ قليل تهوّن

ومالكن يا قماري بتشدن إيش لازمة تغنّن

نغيماتكن تهيج أشواقي للعينين يبكّن

بدّيكن وصية أمانة لي سيد روحي طيرن

ترا الحال العي شفتنو قولن ليهو أحكن

قوليلو السحب في روضو ما عادن يكبّن

وأضحى محل خراب ما فيهو غير زهرا مضبلن

قولن ليهو ليلو طويل .. طويل.. طولا يجنّن

لا قمرا ظهر في سماهو ، لا نجمات يضوّن

وكل ماليهو يتصبّر يقول أيام يعدن

يمنّي لنفسو بي لقياك ولاّترد لو يمكن ترد لو يمكن
.................................................. ..................................................

ابو مازن
07-22-2008, 05:11 AM
انا الماساتي ما بتتقال بقيت احسب عميري الفات

عذب لا حفلة لا شبال لقيت الفات كتير وكتير

مرق لا زوجة لا اطفال

تراني فى مهب الريح مريكب لا فحها الشلال

بقيت مسحور عيونك ديل اتحجر بقيت تمثال

وافتش فى مكانك وين لقيتك فى قليبى هنا ....

انا الجرب مآسي الغي تعال شوف كيف حفن كرعي

وانا اتبشتنتا يا خلاي فوق درب الفريع الني

بقت لى مع العيون قصة مخلفة فوق جروحى الكي

خيالن مادوام نافر يحلق فى خلاهو الصي

ولا قادر افيق وارجع ولا قادر ادارى البي

واشوف غيمك انا العطشان واقول هسع يجيني الري

وفكر فى امور الحب وادور في ساقية غير معني ...

يا حليلى انا حليل ايام سعادتي معاك وكت

كان الزمن بسام يشاور لى دوام ضحاك

يضمنا كان هدوء الليل هو لا حس همسة لا كوراك

لقيت يا قلب زولك بعد وجعك لقيتو دواك

اتاريهو الزمن دولاب قسي ورجعني الف سنه ...

طريتا انا طريت السمحة بين اهلها

وكت تنزل وكت تطلع مع الحوب يجتمع شمِلها

تمد ايديها للمنقة تداعب للجريد قبلها

وماهماها زولا فات يقاسي الغربة من اجلها

ماخلاني ابتليت بي ريدها افتل فى حبال رمله

كمان خايف الجنون يحصل تفوت عقليتي بى قبلها

بوريكم مآسي غرامي عشتها وعمرى كان تمنها .

ابو مازن
07-22-2008, 05:12 AM
ياخوي بلادي انا بلد ناسا مواريثم

في أول شي ..كتاب الله

وحصان مسروج، وسيف مسنون حداه درع

كتاتيبم تسرج الليل مع الحيران

وشيخا في الخلاوي ورع

بلادي انا بلد الصفقة والطنبور وجاراتن تنق بالليل

وبنوتن تحاكي الخيل

يشابن زي جدي الريل

بلدي أمان ، بلدي حنان وناسا حُنان

يكفكفوا دمعة المفجوع

ويبدّوا الغير على زاتم

يقسموا اللقمة بيناتم

ويدّوا الزاد حتن كان مصيرم جوع

يحبّوا الجار

يموتوا عشان حقوق الجار

يضوقوا النار عشان فد دمعة

وكيف الحال لو شافوها سايلة دموع!

ديل أهلي .. واللــــــــــه ديل أهلي

البقيف في الدار في نص الدار

وأقول لي الدنيا. كل الدنيا ديل أهلي

عرب ممزوجة بي دم الزنوج الحارّة

ديل أهلي .. ديل قبيلتي لمّن أدور أفصل للبدور فصلي

ديل فصلي

أقول بعضي

ألاقيهم تسرّبوا في مسارب الروح

بقوا كولي

ألاقي قلبي والإحساس

وسافر في بحار شوقم زمــــان عقلي

أنا محل قبّلت ألقاهم معاي ، معاي زي ضليّ

أنا لو ما جيت من زي ديل كان وا أسافاي ، وا مأساتي وا زّلي

تصوّر كيف يكون الحال لو ما كنت سودان...

وأهل الحارّة ما أهلي تصوّر
.................................................. ..................................................

ابو مازن
07-22-2008, 05:12 AM
الطييييييييييييييييييف

حتى الطيف رحل خلاني ما طيّب لي خاطر

أما النوم أبا وجافاني .. وأصبح داجّي ساهر
*
قليل يا طيف أقيف وأرجاني .. وين فايتني عابر

شن حارس وراك أنا تاني.. ياني معاك مسافر
*
لا لا .. لا تقول لي .. كدي استناني.. أمشي وأجيك باكر

يبقى أنا ما ألم فيك تاني.. مين عارف المصاير
*
هاك اسمع رنين ألحاني .. وأبقى معاي سامر

خفف لي قليل أحزاني .. ياما أنا عشت صابر
*
شوف كيفن يسوي زماني .. ديمة علي جاير

آه مر العذاب وراني .. سهمو في قلبي غاير
*
شوف الليلة كيف بستاني .. دا الكان باشّي ناضر

من حر السموم بيعاني .. طيرو يفر يهاجر
*
جفّ يبس صبح صناني .. لافح حرو كافر

عدمان الضليل سواني .. مجنون قالوا شاعر
*
كل ما تمر تعدي ثواني .. منو اسراب تغادر

رحلوا الفيهو صر وحداني .. نازل ومرة سادر
*
أحوم .. أرجع .. أصد لبكاني .. مقطوع راسي حاير

وين أحبابي وين خلاني .. آه يا الله قادر
*
ما عارف العلي تراني .. فوق كرعي ساير

وأسكت أسوي في أوزاني.. أشعار مالا آخر
*
وإت ياطيف عليك أحزاني .. ليّ شوية كابر

عشان خاطر قليبي عشاني.. لحظات بس تخاطر

ابو مازن
07-22-2008, 05:13 AM
مُنادي الشوق

السر عثمان الطيب
ــــــــــــــــــــــــــــــــــ
مُنادي الشوق ينادي داير أرجع لي بلادي

أحكي للطيبين وأغني أنسى ألامي وسُهادي

أصلي ما كان في مُرادي يوم أفارق داري غادي

أهجُر الأوطان وأسافر بالسنين يبقى إبتعادي

بلدي طيبة وما بتعادي وفي الكرم غنالها شادي

دوزن الألحان وأبدع راح يطوف كل البوادي

حبي ليها وريدها زادي شايلو في عيوني وفؤادي

ليها برسل كل حروفي ودمعة الأشواق مدادي

شوقي ليها ولي ضِفافها وطهرها ونورا وعفافا

سلسبيل نيلها البيجري بالسنين خدّر جفافا

أي زول لو مرة شافها زاهية في حُلة زفافا

تاني يحلم ما يفوتا لو زمان الوصل صافَ

شوقي لي ذرات ترابها ولي سهولها ولي هِضابا

زهرة الياسمين تضاحك خُضرة الصفصاف في غابا

طفلة من الزاندي دابا عنفوان القاش شبابا

راقصت في عبري رنة حلوة من وتر الربابة

شوقي ليها ولي نعيما وفوقنا دايماً راشة غيمة

روحي من الغربة ضاقت دايرة ترجع لي قديمة

كل ما نطرى بلدنا ديمة تنهمر دمعات أليمة

نحن إخلاصنا ووفانا لي بلدنا بقالنا شيمة.............................................. .... ..................................................

ابو مازن
07-22-2008, 05:13 AM
ود حمد احمد

الفاتح إبراهيم بشير

جعفر السقيد
ــــــــــــــــــــــــــــــ
زول في وضوحو بلا الشمس ود حمد احمد يارفاق

من شب قام درفون صغير سوالو جو الناس عرش

يا هو الركيزة الفي الفريق زول حوبة شقيش ما يمش

تلقاهو قدام الرجال حاشاهو كلمتو ما بتطش

من شب قام زولا قنوع ما زك يوم درب القرش

وما شالو حق زول بالغلط وما بيرضي سمعتو تنهبش

في ليلة كان راقد حزين وسارح في الزمن الوحش

كيفن بعد كان حالو زين والسوق مفرهد ومنتعش

مرت عليهو سنين عجاف خلت ضماير الناس تطش

بس فجأة سمع الباب يدق ويا الله قام من الفرش

بي سرو قال إن شاء الله خير واطرافو كلها ترتعش

فتح البوابة بلا نفس وقدامو كان ود الفتح

قال ليهو ادخل قالو لا انا حالي ما داير شرح

قال ليهو جيت والعشم سايقني يا اب رايا سمح

وقفت قصاد بيتي الظروف حلفت يمين ما تزح

البيت معاهو المدرسة خلني بي ايدي ازح

والنخلة هادي قدر تشيل ياخدوهو قبال يصطبح

قال ليهو بس نقع البنوك سلفية والحال ينصلح

قلبة وقلبتين يا رفيق وبعدين نشيل نحن الربح

يا إمة نقع الفتل ما الدنيا اصلو فرندقس

يوم انت طاير في السماء ويوم تحبو في جمر الفلس

بس قوي قلبك يا رفيق ونضمك يكون عجوة محس

من بعدو كان درت النجوم تلقاها في شهقة نفس

قبال كمان تصحى الشمس مشى للخزين ود العوض

قال ليهو إلا تمشي معاي اولادي ديك اكلو القرض

اتماسكو الاتنين سوا ودحمد احمد داير يطير

مرات يجك ومرات يخب ومرات تحسبو زي عزير

بس فجاء في لمح البصر لقى نفسو قدام المدير

نفذلهم كل الشروط وفيهم شرط قاسي وعسير

كان الشرط إيه الضمان ما البنك منهجو برمكي

صاحبنا قام رهن الارض الشاربة من دمو الزكي

مداهو معنى الانتماء والضحكة في الزمن البكي

ذرات ترابة تقولو لا والدنيا غرقت في البكى

وين تاني تلقالك حضن ياويك وكتين تشتكي

مين السواي البفهمك يا حمد احمد غير حكي

انا ياني امك يا جناي من قمت زي تمر الفكي

يومو اليشيل فوقك تعب لا بد فوق انا تتكي

لا بد ترجع لي صاد لو حتى في اخر العمر

ربيت اعمامك وابوك وما احتاجو لاعند القبر

يا ابني لا ترهني هو يا ابني عضي الصبر

ود حمد احمد بي اختصار خلط البيصلح بالبضر

ما همو ايه باكر يكون ما طالا حقق للغرض

شال القريشات وانطلق وفي جيبو شيك سمو السند

مبسوط ويضحك منشي وصاحبك يخوجل في البلد

اولادو دايرين يابا جيب صاحبنا يدي بلا عدد

البت تجيهو المدرسة صاحبنا يدي بلا عدد

الحاجة همها توب سمح صاحبنا يدي بلا عدد

لامن شهور الجن مضن لقى نفسو مخنوق بالمسد

الشيكا باقي وقيتا جا اقصاهو لا يوم الاحد

ودحمد احمد انضرب بقى يجري زي القنقرد

مرات يفوتك في السلام مرات يسوى بكى وحرد

بس فجاة صاحبك اختفى همل عقابتو وشرد

ما راعي احساس الورا وما راعي لى البت والولد

ولي زوجتو الممكن تضيع في زحمة الزمن النكد
.................................................. ..................................................

ابو مازن
07-22-2008, 05:14 AM
بحر الموده

كلمات/ السر عثمان الطيب

غناء/ محمد جباره
ــــــــــــــــــــــــــــــــــــــــــــ

شوفي الزمن يا يمه ساقني بعيد خلاص

در درني واتغربت واتبهدلت وريني الخلاص

ساقني القدر منك بعيد لآذيا كاس جرعني كاس

يا يمه يا فيض الحنان الما كمل

يا يمه يا بدري البشع دايماً يهل

يا يمه يا نور الصباح وكتين يطل

وآشري يا زينوبة ولدك في بحور الشوق كتل

محروم من الحب والمحنة وراك همل

يا يمة يا بحر المودة وكتين يفيض

يا يمة يا شعلة أمل زادت وميض

يا يمة يا عنقود كلام منظوم قصيد

يا يمه يا نغماً حنين بالشوق يرن

وأفكاري فيهو بيرتعن … دمعاتي شانو بينزلن

واتذكر يا يمه في الدغش النسايمو يهبهبن

قايمي الصباح متكفلتي شايلي الحليلي علي المراح

والساعة ديك يا دوب ديكنا بدأ الصياح

والطير صغاروا يغردن

جبتي اللبن بي انشراح

واتذكر يا يمه في وكت الهجير

صالياك نار الدوكي عستيلنا الفطير

رشيتي قلتي أكلوهو خير

واتذكر يا يمه يا بسمة الطفل الغرير

وكت الخلوق ترقد تنوم وأسهر براي

أرعي النجوم

والشوق يرف جنحيهو بي فوق لي يحوم

وأهتف باسمك في الخيال

طيفك كمان بي فوقي جال

وأتمني لو لحظات يدوم لكني فجأة ألقاهو زال

واتذكر يا يمه ساعة الناس يجونا من البلد

ناعم ترابه علي جسيماتن رقد

ريحة التمر فوق الهدوم

ولون الخضار خانس لبد

والشوق أوارو بيشتعل

كان ظني فيهو يكون خمد

واتذكر يا يمة والناس قالوا راجعين البلد

رصوا الهديمات عدلوا ركبوا اللواري وقبلوا

خلونى وحيدى بلا انيس

كيف إنفرادى إتحملوا

شالوا السلام من عندى ليك

وإن شاءالله عندك يوصلو

يايمه ساعت يوصلوا ويقولو ليك

شفناه فى بلد فى بلد الأمان

انبسطى يا نبع الحنان

وانا حالى يشهدبوا الزمان

يايمه رسلى لى عفوك

ينجينى من جور الزمان

.................................................. ..................................................

ابو مازن
07-22-2008, 05:15 AM
حليل الفارقتهم
ـــــــــــــــــــــــــــ
علاء عبد الرحيم
صديق احمد
ــــــــــــــــــــــــــ

انا في منامي اذكرتهم يا حليل حليل الفارتهم

المعز ومعاذ وامهم

خالد وابوي وابوي انا كيفنهم

انا أي طير بسألو منهم

انا قالي لي قاعدين في ضلهم

قاعدين يلعبو جنب عمهم

انا عارفوا ما بقصر منهم

قول لي يا عمي وضوهم هي

قمت لي منو عاد خالهم

بالله يا ادم طلهم وانت اقرب زول منهم

ود السيد عمي التلب المعز اوعا من الضرب

في العقاب خليك مستند والعقاب اوعك يتخرب

الجيلي خل بالك للصغير عمر الجا بيك مستجير

لا تغيبوا من البيت كتير يبقوا زي صابر والزبير

قسم السيد شوف البضربو للوليدات خليك ابو
اوعك الاولاد يتعبوا والبيعد ليهم قربوا

عايز اقوم انا اكتب جواب عنوانو عثمان عبد الوهاب

انا عارفو ياهو البجري العقاب يبقى في بدل الابو الغاب

عمي عبد الله تراك قريب والجواب مكتوب لي حبيب

يا هارون اصلا لا يغيب خالد من بالكم لا يغيب

قولي لي دفع السيد انا عارفوا عارف فرق الجنا
بالله اغشى ام زين طمنا اوعك الاولاد من عنا
ود ارباب يا عبد الرحمن اطرى لي خوتنا الزمان

انت لا تغيب من المكان شوف اليبكي وشوف الجعان

يا مدثر وفتحي وابزيد انا قولي لي جيران البريد

انت يا قيوم ماك بعيد وخلوا بالكم لابن الوليد

يا المبحر يا المقبل يا سائق العربية اتمهل

انت من السرعة قلل اوع قدام الحوش طفل

يا شباب حلتنا اجمعين يا الكبار ابقو لي سامعين

اه انا اه انا اه انا الكاتلني الحنين

للشمال الوطن البلد واهلي الطيبين
.................................................. .......................................

ابو مازن
07-22-2008, 05:15 AM
إليك ... أم الحسن او رسالة ..
ــــــــــــــــــــــــــــ
الشاعر/ خالد شقوري

محمد النصرى
ـــــــــــــــــــــــــــــ
وقفت بعد حلبت لبينة الشاي تكورك يا الحسن

يا ام الحسن وينو الحسن

ولامن صفت رغوة شخيبات اللبن

في حلتا المبني من طبق السكن

وواقفه في حوش البهايم ولسع تكورك يا الحسن

جاها حسا من بعيد مارق من القاطوع ورا

قال ليها خير يا الحاجي خير

قالتلو خير تعال لي جاي

دايراك تعنون لي جواب يا الراسي لي ولدي الخدير

ولا تبقي زي شافع السرير يقول لي زين آيمة زين

وزين تبقي بعد شهير

وان جاني يكتب فد سطير

اقولو يا سجم السجم انا زي قرايتك ما قريت

لكن عويناتي بيفرزن الوريقة البيضاء من لون القلم

بعد المغيرب بي شوي جاها الحسن تعبان يسير

دا العشى غنمو من الدرب وسرقت ندي وشو الهجير

سوتلو شاياَ بي لبن قرض معاهو حرف فطير

قالتلو بسم الله قول واكتب وصيتي انا للخدير

الزمن يا ولدي ماحقاهو السنين

البعيش في الدنيا ما بعيش مرتين

العمير فاضلي بس منو اليقين

وانت طول في البنادر يا الحبيب لا متين

تعال اوريك حق ابوك الجم حقيق حاج اللمين

ان عرفتو بلا عمار يقولو ولدا عندو طين

العلاج لا تنسي رسلو لي دحين

العوينات آجناي شوفن ضنين

سلامنا ليك مطرز للبنيات والبنين

ولو الارض يا ولدي تنشال في الايدين انا كت برسلا ليكا

في لوري الخزين
.................................................. .................................................. ..........

ابو مازن
07-22-2008, 05:16 AM
قبــــلة غُنـــاي ..
الفاتح إبراهيم بشير

احترت كيفن اوصفك .. والله يا قبلة غناي

لو كان بحور الكون مداد بتجف قبل ما تنصفك

حاولت اكتب ليك واقول * واوصف ملامحك بالشعر

لكن حروفي تذوب عديل * قدام عيونك تنصهر

يا عايشة في دمي وغناي * يا ديدن الروح والفكر

خلدت اسمك بي حروف * قطرات دماي كانت حبر

يا غنوة في وتري الحزين * يا ضحكة في الزمن الصعب

يا واحة في عز الهجير * يا راحة من بعد التعب

يا نسمة هبت في الدغيش * عزفت علي وتر العصب

يا رحمة من رب العباد * مكبوبة فوق خلق الله كب

سافرت في عينيك سنين * زادي المعاي ابيات غنا

مكتوبة بي دمي الصبح * شلال من الهم والعنا

صورت احساسي الدفين * بي قافية ليك معنونة

بتقول بلا كلفة ورتوش * يا انتي يا الموت والفنا

احترت في وصفك انا * وحارت معاي كل الحروف

مرات بشوفك يا مناي * ياقوتة في قلبي الولوف

مرات بشوفك ضي امل * دبج خطاي رغم الظروف

مرات بشوفك جارية نيل * امواجو عانقت الجروف
..................................................

ابو مازن
07-22-2008, 05:16 AM
سافر
جعفر السقيد
ــــــــــــــــــــــــــ
سافر

عليك الله سافر عليك الله

شيل الاماني معاك

وشوف البيبكي عليك او حتى يترجك

انا تعتب خلاص من جورك انت على

تزعل بدون اسباب وتاني ترجع لي

خليك معاي واضح لا يبقى قولك نيء

يا انت ابقي معاي يا انت ما ليك بي

رغم الحصل والكان ياما صبرت عليك

كان العشم جواي تصدق معاي عينيك

لكن غرورك فاض كتل البراءة الفيك

خلاك تقول مجبور انا بكرة برجع ليك

اوعك تظن في يوم انا قلبي برضى الذل

او يستكين هيمان ويرجاك عند الضل

انت الفتحت الباب وقلت للخصام ادخل

وانت الزرعت الشوك وقلعت شجر الفل

انا في النهاية انسان مرهف رقيق حساس

وداير اعيش في امان واصافي كل الناس

لكن اذا جريت فوق الكرامة وداس

مجبور اقول القول القالو بو فراس

في شعروا قالو كلام مدهش جميل يسبي

لا تملك الحسناء مهما تكون قلبي

انا برضي زيو كمان اعلنت لي حربي

وعايش قليبي يقول يا اخوانا ايه ذنبي

والله ياالمريود خليتني فيك محتار

مرات بشوفك نور مرات بحسك نار

مرسالي وقتين جاك قابلتو باستهتار

وما تنسى أي حديث دائما بدايتو شرار

يا قلبي اصبر قلبي اصبر قلبي اصبر

اصلو الظروف قاصداك

معليش اذا جا الليل وخيم على دنياك

عذرا اذا الاحلام اكبر من الادراك

وعفوا اذا حبيت زول ما عرف معناك
..................................................

ابو مازن
07-22-2008, 05:17 AM
طير الرهو
ـــــــــــــــــــــــــ
والله يا طير الرهو

قسما عديل ما فيهو لو

دمع الحبايب زي دموع السارية في الوادي البعيد بتسوى جو

والله يا طير الرهو

ما كت مصدق أني ألقاك يا رهو

أشكو ليك من جور زماني كيف رماني

شوف وراك شوف الزمن كيفن يسو

حتى باقي الزاد كمل والليل طويل طولا غريب ما فيهو ضو

والريح تنوح فوق الدروب واخوفي من صوت الرياح وكتين تنوح وتسوي أو

زيك غريب والغربة طالت يا مسكين زي يا طير الرهو

التراب ملينه عيشتو

أريتني زيك كل يوم يحضني جو

في بحور الريد نسافر والمراكب كاسحة ما دام ريحنا نو

نمشي لي أرض الحبايب يا حلاتي

في الدغيش والدنيا ضو

يا سلام لمن نسالم نبقى شوق طائر معربد

نستحيل شلال عواطف في قليب عاشق

زي تميرا في الشمال لمن يفيض النيل يفرهد

تنتشي الدنيا وتزغرد

بالنسيمة الحلوة تستقبلنا

Abdelazim
07-22-2008, 09:39 AM
شكرا أبو مازن علي الإبداع