المساعد الشخصي الرقمي

مشاهدة النسخة كاملة : في ضل الضحي .



ابوحسام
11-09-2009, 03:08 PM
وجيتي لي..
يا وعدي في عز الهجير..
لما الشمس..
تلفح وجوه الخلق بي لهب السعير
وكتين دروبي اتقفلت ..
واتراكم الإحباط جبال
طول الطريق..
هدفن سراب..
ومعاهو كيف يبقى المسير؟
زي زول بصارع في الفراغ
عطشان وسط سحب الغبار..
ومناهو لو يصل الغدير
# #
وجيتي زي موكب غمام
برَّد حرارات اللهيب..
الهجير.. غاب واستحى
والخدار سكن الدروب
الكون كمان فرهد صحى
وانزاحت أستار القنوط
والبشرى حلت مطرحا
إنتي وينك من زمان؟
لو كنتي ليَّ حلم في ليل..
يا الله لي ما تصبِّحا
خليني أحياهو الحلم
أحكيلا عن عمري اللي فات..
وآمال جميلة ومفرحة..
بيتن صغير يضمنا..
راكوبة معروشة بحصير
والنيمة جنبها بالطيور في مهرجان..
عاملة الغصون بس مسرحا
أرقد أنوم يا وعدي مرتاح الفؤاد
بعد الهجير..
بعد التعب..
وأتَّاكى في ضل الضحي
# #
حطَّمتي أقنعة الصرامة
الكنت بندس بوراها..
ياما ياما..
جواي طفلن بس كبير
ترضيهو منك ابتسامة
إنسان موله بي عيونك
سلسلبيل روحي وغراما
نظرة حانية عليَّ تكفي
فيها أشعر..
بي أمان دنياي.. سلاما
# #
ولما أرجع..
بحكي ليكي..
عن تصاويري وتهاويلي..
وخيالات التلاقي
عن هروب الكلمة مني ..
لما أشرح اشتياقي
وعن شعورن فيني سافر..
فيني روَّح..
فيني عشعش ..
فيني باقي..
وبعدو كيف يصبح فراقي؟,,,



كلمات رائعة لشاعر المسعودية الرائع عمار الخضر .