المساعد الشخصي الرقمي

مشاهدة النسخة كاملة : سافرتي لية ؟؟؟



ابراهيم العمده
08-27-2009, 12:21 PM
قصيدة :سافرتي لية ؟؟؟
كلمات : إبراهيم عثمان محمد عبدالحميد ( ودالعمدة)
أحبتي كما أخبرتكم قبل اليوم بأني لستُ بشاعر ولكني أحياناً أحاول الشعر وأحياناً
تجبرني الحياة علي التحدث بكلماتٍ أشبة بالشعر وأخبرتكم قبل أيام بسفر زوجتي
الحبيبة إلي الخرطوم ثاني أيام هذا الشهر المبارك وهي التي كانت دوماً كلما هطلت
أمطار بالخرطوم تذكرني ببيتها وطفولتها وأهلها وكيف الخريف عندهم وكم حبها له
وتعيب لي موطنها الجديد بمروي بجفافة مما حدا بي دعوة الرحمن الرحيم بهطول
ولو مطرة واحدة تطفئ عطشها للأمطار وتسكت لسانها عن سيرة السفر وأستجاب
الله لي ولكن بأمطارٍ غزيرة لم يصمد أمامها منزلنا المتواضع ولم يسلم شئ من أساس
المنزل سواي وهذا علي لسان أخونا ساداتكو ورحلت ثانيها ومنذ ذلك الحين وفارقني
المنام وليلة أمس راودتني نفسي بهذة الخاطرة التي أتمني أن تنال إعجابكم وأخبركم بأن أول
يوم رأيت في زوجتي العزيزة كان في مناسبة تخص أهلها ولمحتها بالشباك مجرد لمحة
وأنتظر نقدكم ورأيكم الذي يهمني أكثر





فُتِّيني وحيد بقيت مأسور هواك
رحلتي بعيد وشلتي الريد معاك
خليتيني واقف على باب الهلاك
مشيتي لي بيتك وأهلك وصباك
***
حرمتيني قُربك وآه من بُعدك ياملاك
كتلتي الفرحة رغم الزهرِ بالاشواك
رحلتِّيني من بيتي قبُل ساعة الإمساك
أخدتي الود الكان عايش زمن جواك
***
حلفتيني بالخلقك أبداً مستحيل أنساك
رحلتي بعيد هناك وأنا الطول عمري بستناك
هجرتيني في شهر الصوم و السبحة والمسواك
شردتي من زولاً حنين بالخير دوام يطراك
***
سبتيني في مروي يا روعة ومشيتي براك
وإنتي القبيل بتقُولي أنا شن بساوي بلاك
تركتيني معلّق في الهواء ما بين برج وأسلاك
رجعتي تقولي تاني أنا المشتاقة كيف أنساك
***
خبَّرتيني حُبِّك دون نضم تحريك شفاك
شتّتي أفكاري قبل ألمس أوتار هواك
جبرتيني أناقشك بي سكينة بدون عراك
سلبتي عقلي أصبحت بعدك بدون إدراك
***
عومتيني في البر ما لاقي وين مرساك
عديتي لي ضفة حرمتني من رؤياك
غرّقتيني في داخلك كمان جوّاك
إتربعتي في داخلي بدون إشراك
***
آلمتيني ليه باعدت خطايا عن ممشاك
سافرتي بعيد وفكّرتَ أمشي على خُطاك
وصلتيني لي نفقاً مُظلم أكيد ما زي مداك
غادرتي مكاني وسبتي هواي حائر وراك
***
حّلمتيني بي شرق شمسك وبي بهاك
وغبتي قبُل أملا عيني بي نور ضياك
خليتيني أتأمل أسباب جمالك وسِر حلاك
مشيتي وسبتيني سارح ليلي في ذكراك
***
سهَّرتيني أحسب كم نجوم في سماك
نمتي وحرمتي النوم عيون كتير حاباك
عذَّبتيني وما إرتحتي ودة كلو ماهمَّاك
سافرتي ليه يا زينة بس شنو الخلاك
***
حدَّثتيني يوماتي بي زمناً قبُل ألقاك
شلتي اللوم رميتي علي بدون مسَّاك
ختَّيتيني في مطباً سببو الخريف الجاك
قلتي محرومة من أُمك ووالدك الربَّاك
***
علقتيني بالخريف والمطرة والشكشاك
رجعتي في أول مطرة جات بي هناك
ذكَّرتيني يومي الشفتك كُنتَ بالشباك
جيتي مارة وقلبي رادك من يومو داك


تحياتي وأشواقي ودالعمدة

ولد هندسة
08-27-2009, 01:07 PM
ود العمدة يا جااااااااااااااااااااااااااامد
لك التحية يا رائع وتسلم
وبالجد حاجة روعة

هناء
08-27-2009, 01:30 PM
رائع رائع رائع
اخي/ ابراهيم

احب الرجل الذي يظهر عواطفه لزوجته
ولا يكابر او يخجل من ذلك

لك التحية
وانشاءالله ربنا ما يحرمكم من بعض

فاطمة ميرغني
08-27-2009, 04:00 PM
ود العمدة الله اجمعكم بالسلامة
تخريمة: ادخل بوست الهادي بتاع الريدة والحنان
حننتني والله

ابراهيم العمده
08-27-2009, 06:16 PM
ودهندسة
ود العمدة يا جااااااااااااااااااااااااااامد
لك التحية يا رائع وتسلم
وبالجد حاجة روعة

...
تسلم يا ودهندسة وليك التحية للمرور السريع
وكم أفرحني إشادتك بالتجربة المتواضعة
...

ابراهيم العمده
08-27-2009, 06:20 PM
رائع رائع رائع

اخي/ ابراهيم


احب الرجل الذي يظهر عواطفه لزوجته
ولا يكابر او يخجل من ذلك


لك التحية

وانشاءالله ربنا ما يحرمكم من بعض


...
الروعة تأتي منكم وبكم والحقيقة أجمل وأكبر من نكابر أو نستحي
ولكِ التحية وشكراً جميلاً للتواصل وربنا ما يحرمك كمان مننا
...

ابراهيم العمده
08-27-2009, 06:59 PM
ود العمدة الله اجمعكم بالسلامة
تخريمة: ادخل بوست الهادي بتاع الريدة والحنان
حننتني والله

..
تسلمي ياروح المنتدي وربنا يجمعنا بيك وبيهم

وشكراً علي التخريمة وعمو الهادي فصيلة دمو
زي دمي وهو أستاذي وأنا من إشاراتو بتعلم
...

امير الشايقي
08-27-2009, 08:15 PM
اخي ود العمده
قصيده معبره جدا
نسجت بكلمات ذهبيه
ومعانيها رقيقه
بوح قلب رائع
ارجو ان لاتطيل عليك الغياب
واستسمحك في ان اكتب لك ردا

امير الشايقي
08-27-2009, 08:26 PM
لا تطالبني بالبقاء
فقد كتب علي الشقاء
قدر لي ان اكون عنك بعيده
اسافر قبل المعاد
قدر لي العناء
اسافر وابعد عن هواك
مجبرة على البعاد
ليس بيدي اي قرار
ولكن هي الامطار
قدري ان اشقى بهواك
احمله بقلبي
اجوب به الطرقات
لكن تاكد
انك بسويداء القلب والعيون

Abdelazim
08-28-2009, 01:48 AM
الله يجمعكم يا ود العمده
حالتك في سنة اولي زواج
غايتو جنس غايتو

بسطاوى
08-29-2009, 12:11 AM
والعمدة سلام

لقد جسدت الشوق حرفاً وصدحت بكلمات الغرام
ادام الله لك حبك وسقاك من راحه كاسات المدام

فاطمة ميرغني
08-29-2009, 03:07 PM
..

تسلمي ياروح المنتدي وربنا يجمعنا بيك وبيهم


وشكراً علي التخريمة وعمو الهادي فصيلة دمو
زي دمي وهو أستاذي وأنا من إشاراتو بتعلم

...


اها تعال شوف عمك بي هناك عليهو جنس بشتنه وكشيفة حال ...:rofl::rofl::rofl:

ساداتكو
08-30-2009, 06:51 PM
...

بالرغم من أني قرأتها قبل تثبيتها في المنتدى يا ود العُمدة

لكن في المنتدى ليها طعم خاص جداً
وبعد التعديل حا تكون أحلى
...

ابراهيم العمده
08-31-2009, 09:53 AM
اخي ود العمده
قصيده معبره جدا
نسجت بكلمات ذهبيه
ومعانيها رقيقه
بوح قلب رائع
ارجو ان لاتطيل عليك الغياب
واستسمحك في ان اكتب لك ردا

ليس بيدي اي قرار
ولكن هي الامطار

أمير يامُرهف الإحساس
لك مني باقاتُ الزهرِ أُهديها
ولك مني كل الشكر علي المرور الجميل
والرد الأجمل

ابراهيم العمده
08-31-2009, 09:56 AM
الله يجمعكم يا ود العمده
حالتك في سنة اولي زواج
غايتو جنس غايتو

آمين يارب العالمين
ولو جيت لي رأيي الزواج دة سنينو كلها واحدة
أو بمعني أصح مستوياتو واحدة يعني أولي لمن تتخرج
أو تتخارج من الحياة تانية مافي
وتقبل تحياتي

ابراهيم العمده
08-31-2009, 10:04 AM
والعمدة سلام

لقد جسدت الشوق حرفاً وصدحت بكلمات الغرام
ادام الله لك حبك وسقاك من راحه كاسات المدام

بسطاوي الحبوب وعليكم السلام
أنتم أساتذتنا ونحن لكم تلاميذ فمنكم نستفيد
ولاننسي صمتك يا رائع
تحياتي وأشواقي

ابراهيم العمده
08-31-2009, 10:07 AM
اها تعال شوف عمك بي هناك عليهو جنس بشتنه وكشيفة حال ...:rofl::rofl::rofl:

إنتي ياخالتو تقوليلي تعال بي هناك لمن أجي تقوليلي أركز
حيرتي أفكاري معاك إنتني .. إنتي ويــــــــــن وين ياخالتو ؟

ابراهيم العمده
08-31-2009, 10:10 AM
...

بالرغم من أني قرأتها قبل تثبيتها في المنتدى يا ود العُمدة

لكن في المنتدى ليها طعم خاص جداً
وبعد التعديل حا تكون أحلى
...

ساداتكو الجمال
بالرغم من كل هذا فهي جميلةٌ بكم فيه أو خارجه
وإنشاء الله بعد التعديل تكون أجمل
شكري وعرفاني

فاطمة ميرغني
08-31-2009, 02:26 PM
إنتي ياخالتو تقوليلي تعال بي هناك لمن أجي تقوليلي أركز


حيرتي أفكاري معاك إنتني .. إنتي ويــــــــــن وين ياخالتو ؟


انا قلت ليك امش شوف بشتنة عمك ما قلت ليك اتبشتن زيو :shok::shok:

ابراهيم العمده
09-03-2009, 03:07 AM
انا قلت ليك امش شوف بشتنة عمك ما قلت ليك اتبشتن زيو :shok::shok:

...
لو كان الشوق والريد بشتنة فليشهد التاريخ أني مُبهدلُ
...

هناء
09-03-2009, 01:01 PM
...
لو كان الشوق والريد بشتنة فليشهد التاريخ أني مُبهدلُ
...


شهد التاريخ في مثل هذا اليوم
بأن المشرف العام مبشتن ومبهدل بسبب الشوق والريد


الشوق والريد والحب البان في لمسة ايد

ولد هندسة
09-03-2009, 03:11 PM
لك التحية ايها المبهدل الكبير وربنا ما يوريك بشتنة شديدة
لك تحياتي ايها الرائع والغالي

امير الشايقي
09-17-2009, 08:25 AM
...
لو كان الشوق والريد بشتنة فليشهد التاريخ أني مُبهدلُ
...

ايهـــــــــــا المبهدل ..
ارينـــــــــــا بعض تبهدلاتك

وطواط
09-28-2009, 09:42 PM
ما قلنا ليك
العرس طريق
قاسي وصعيب
من اولو
ما سمعت كلامنا
ومشيت براك
اهو دا العزاب اتحملو
اتحملو

ابراهيم العمده
10-04-2009, 02:05 PM
...
وطواط الجميل عذاب الريد بتحملو إنت ياريت عزوبيتك تتحملا
وشكراً ليك علي المرور ومشتاقين
...

جبر الدار محمد جبر الدار
10-05-2009, 03:59 PM
سلامات ود العمده
يا راجل يا راقى
ربنا ما يوريك عذاب الفرقه

ابو الملكات
10-11-2009, 07:00 PM
اعاد الله محبوبة قلبك وجمع بينكم بسعاده والهناء
كلمات صادقة خارجة من الاعماق كن بخير يارائع
الامانى الطيبة

ابراهيم العمده
10-20-2009, 11:54 AM
سلامات ود العمده
يا راجل يا راقى
ربنا ما يوريك عذاب الفرقه

...
سلامات ليك أستاذنا جبر الدار
ومنكم عرفنا معني الرُقي
ومايوريك ياهو يارب
...

ابراهيم العمده
10-20-2009, 11:56 AM
اعاد الله محبوبة قلبك وجمع بينكم بسعاده والهناء
كلمات صادقة خارجة من الاعماق كن بخير يارائع
الامانى الطيبة

...
أبوالملكات تحيةً وسلام
وأنت دُم بخير ولك مني خالص الأمنيات
بالتوفيق دوماً
...

الدمهشري
10-20-2009, 12:12 PM
ود العمدة الله اجمعكم بالسلامة
تخريمة: ادخل بوست الهادي بتاع الريدة والحنان
حننتني والله

قصيده بكايه ياود العمده اظهرت كظرك الكبير للجميع والله كذاب واحد يجي يقراها ما يحس الريده والحناااااااااااااااااااااااااااااااااااااااان
احيك بوضوح الاحساس والكلمات

ابراهيم العمده
11-02-2009, 04:19 PM
قصيده بكايه ياود العمده اظهرت كظرك الكبير للجميع والله كذاب واحد يجي يقراها ما يحس الريده والحناااااااااااااااااااااااااااااااااااااااان
احيك بوضوح الاحساس والكلمات

...
الدمهشري يا صاحب الكظر الأكبر فينا
تسلم ياراقي الإحساس علي عذب كلماتك
وإنشاء الله هي محاولة ناتجة عن واقع
والبقية تأتي فبوقفتكم معنا نأخذً دوافعنا
فكونوا رموزاً للجمالِ دوماً كما عهدناكم
...

الدمهشري
11-03-2009, 08:08 PM
http://abeermahmoud.jeeran.com/page%205/380-MissU.gif

ابراهيم العمده
12-12-2009, 03:54 PM
http://abeermahmoud.jeeran.com/page%205/380-missu.gif

...
ما راجين الخريف يجي





شيل الصبر وختوا في قلبك يا صاحب القلب الجميل
وعندها ستجد الجديد يتدفق فياضاً يروي كل السهول
...

منية
12-13-2009, 09:45 PM
هنا فردوس للإحساس

مزاج الحروف نعيم

و خلود في مساحات الغرام

نؤمن أن لكلٍ طريقته في ممارسة عشقه

لا شمس تعلو على ضياء المشاعر هنا

فالعطاء فاتن

و المحظي حتماً جديرُ و يستحق

تحياتى وودى

ابراهيم العمده
07-01-2010, 12:21 PM
هنا فردوس للإحساس



مزاج الحروف نعيم


و خلود في مساحات الغرام


نؤمن أن لكلٍ طريقته في ممارسة عشقه


لا شمس تعلو على ضياء المشاعر هنا


فالعطاء فاتن


و المحظي حتماً جديرُ و يستحق



تحياتى وودى


...
الأخت المدهشة منية
أولاً أستميحك العذر في تأخير الرد عليكِ
فكم تُجبرنا الحياة علي البعد عمن نُحبُ ونهوي
وأنتم هنا جزء أصيل من هذا الحب أُجبرنا علي البعد عنكم
وثانياً أشكر لك جزيل الشكر علي إيضاحك الأجمل للأحساسيس
والمشاعر وكما أسلفتي لكل شيخ طرقتة
ولكِ من كل الود والتحايا والأشواق
...