المساعد الشخصي الرقمي

مشاهدة النسخة كاملة : قصيدة زول من السودان



بت بحرى
08-07-2009, 03:19 PM
مناسبة القصيدة إن كاتبها رد على أحد منسوبي الدول العربية بعبارة:

( نعم يا زول )



فجاء رد ذلك العربي عليه مستاءً :

((بتقول زول !!؟.. ليه شايفني لافي بتاعة على دماغي؟؟))



((يقصد عِمة))













أنا الغلطان

تقول لي زول؟!

بقول ليك زول !!

مالو الزول؟

و انت بتعرف إيه للزول ؟

سخيف وجهول

كمان زعلان

خلاص يا سيدي أنا غلطان

شطحت وكنت فاكرك زول

زول الماهو عاجبك ده

الله الخلقو خلقو كده

سمرة لونو من لون طينو

يبقى الفرق بينك و بينو

إنو نضيف و ابيض قلبو

عارف قدرو شاكر ربو

ساتر عرضو ماسك دينو

مخلص أمين وديع و رزين

حشيم القول بديعو رصينو

لطيف وعفيف و كاتلو حنينو

أسد في الحاره

لابختاك و لابرجاك تجيو في عرينو

أكان بى حدره بادرتو

بيتلقاك بى عتره

وبستناك تقول الروب

قبل ما يشممك سكينو

يا بتوب يا بيوسدوك الطوب

والراجل يحمر عينو

كمان بى كلمه بتخاويهو

وبى بسمه بجيك خيرو

لا بتقدر تعيش من دونو

لا بتختاهو لى غيرو

زول الماهو عاجبك ده

بلا توجيه ولا تعليم

أديب و فهيم

هميم وكريم

و فطرة ربو من يوم خلقو

لا فتان و لا خوان

أخو أخوان

بكفي الألف و الألفين من الضيفان

و لو اضطر يرهن ولدو

و ان ما كفى

باع بيت أهلو و الجيران

زول الماهو عاجبك ده

يوم تحتاجلو بتلاقيهو

أكان ورطان وكان جيعان

و كان وجعان و كان سجمان

قبل تتأوه و تناديهو

يمين في أقل من برهه

و بين مد الألف و الها

قبل ناسك بجيك حفيان

بضمد جرحك و بداويهو

بكتل أبدرقه بى إيديهو

بطفي الواقده بى رجليهو

ما بتغباههو

لما تدورو بتلاقيو مكان حاريهو

اللافيبا راسو الزول

و متباهيبه إسمها عمه

سنة سيد الأسياد

المعصوم شفيع الأمه

و سيما الأوليا الزهاد

قلال الزاد كبار الهمه

و تاج العزة و الجبره

و رمز الطيبه و الحكمه

و الملفوف على المبروكه

إسمو التوب

لباس العفه و الحشمه

أزيدك من فضول القول

ولا خلاص عرفت الزول

ده جمل الشيل

دخري الحوبه

فارس العتمه ساري الليل

لبيب و زكي و نجيب بلحيل

فهيم فهماً يهد الحيل

تقول لي ما فهمت عليك عيد القتو لي تاني !

واجيب فهامه عاد من وين

كلامي القتو ألماني؟

أخير ليك تمشي تختاني

وتنسى الزول و تنساني

وفوت قبال تعاديني

و اقول اللوح ده عاداني

و يكفي الزول و يكفيني

إني وإنو سوداني



*****

:king::king:

امير الشايقي
08-07-2009, 04:23 PM
شكرا ليك يابت بحري علي القصيده الجميله
وبتخلينا نعتزا بالزي السوداني العمه والتوب.
ونفخر بسودانيتنا
واقول سلام يازول لكل سوداني

ولد هندسة
08-07-2009, 10:38 PM
بت بحري لك الود
وتسلمي علي القصيدة
وتخيل كيف يكون الحال لو ما كنت سوداني
واهل الحارة ما اهلي

ود الصراف
08-08-2009, 11:31 AM
شكر آ بت بحري
قصيده في محلها تمام التمام
و اخفتر بكوننا سودانيين المزيج الافريقي العربي رجوله و كرم وشهامه

بت بحرى
08-08-2009, 09:33 PM
تسلموا كلكم انشاء الله

فاطمة ميرغني
08-09-2009, 11:28 AM
جميل جدا بت بحري
وشفتي التوب... وسيد التوب يكون كيفينو

ابراهيم العمده
08-09-2009, 06:40 PM
...
بت بحري شكري لروعة القصيدة يازولة
والله ماقصرتي وأخونا القالا ماقصر
وكان كتر كان تكاهو وضبحو بالخنجر

وسلامات يازول يارائع ياخلاصة الخير الفي الناس
...

عادل القاسم
08-10-2009, 09:14 AM
اقيف للدنيا واقول للناس انا سوداني....

فاطمة عبدالوهاب
08-12-2009, 10:57 AM
السوداني دائما مرفوع الرأس000 وسليط اللسان اذا مسه أحد بكلمة00
غيور على سودانيته000ولو ماكان رده بهذه الطريقة ماكان حايكون سوداني00
التحية لك بنت بحري000والتقدير لصاحب الكلمات0

الدمهشري
10-16-2009, 11:56 PM
بت بحري
بس....

مافي اي كلام
اي حاجه بتتقال جات في القصيده
احيـــــــــــــــــــــــــــــــــــــــــــــــ ــك