المساعد الشخصي الرقمي

مشاهدة النسخة كاملة : مدني يوسف النخلي



ابوشهدولينا
07-12-2009, 04:12 PM
صديقي الشاعر مدني يوسف النخلي شاعرا مجيد امتلك ناصية الكلمة الرقيقة كتب للعديد من الفنانين
المعروفين .

منهم الفنان الراحل مصطفي سيد احمد
الفنان الراحل هاشم ميرغني
والفنان الجميل جدا سيف الجامعه
وصديقي الفنان عادل التجاني

والكثير من الفنانين لقد حالفني الحظ ان التقيت به في الدوحة عاصمة دولة قطر منذ اكثر من عشرين عام خلت ووجدته انسان خلوق وودود جعلي ابن بلد كريم وظريف ووناس

تعاملت معه في اعمال كثيره جدا لم يجد علي الزمان بفرصه لطرحها على المستمعين ولكن يبقى امل ان نجد مساحه خلال الايام القادمه لطرح هذه الاعمال .

ساحاول خلال هذه السانحه ان اطرح بعض النماذج لاشعاره التي تغنى بها مطربين تعامل معهم شاعرنا مدني وايضا سوف احاول اطرح تجربتي معه الانسانيه والعمليه ..


خلونا نمشي حبه حبه

ابوشهدولينا
07-12-2009, 04:26 PM
علِّـمي عيوني السفر
مدني يوسف النخلي

علمي عيوني السفر ..
ما البسافر في عيونك ..
سكتو تبقى السلامة ..
بنسى أحزانو ..
وبعرف الدنيا جنبك إبتسامة ..
ضللي الناس بي حنانك ..
أبقي ليهم ضُل غمامة ..
الشقا اللازمني مدة ..
يوم إفوت ، والفرحة تبدأ ..
ما بقول فارقني عدَّا ..
عشان بخاف ترحل عيونك ..
وتنهزم فيني الأماني ..
وبي أساهو وبي شقاهو ..
تاني إتوشح زماني ..
أصلو غير عينيك وحاتك ..
ما في للأفراح معاني ..
جينا ليك .. شوق في عيونا ..
وفي عيونك شوق إناغم ..
الشجون باكر بترحل ..
والزمن يصحى ويسالم ..
الحلم يصبح حقيقة ..
وتنسجم في الحب ظروفه ..
والحنين تزهر غصونه ..
والعشم دانيات قطوفه ..
شوفي كيف يوم بكرة عامر ..
هاتي إيدك شان نشوفه ..

ابوشهدولينا
07-12-2009, 04:28 PM
واقـــف بــــراك
مدني يوسف النخلي

واقف براك والهم عصف ..
ريحاً كََسَح زهرة صباك ..
ليلاً فتح شُرفة وَجَع ..
قمراً رحل فارق سماك ..
مطر الحزن عاود هطل ..
جدد عذاب الأرصفة ..
ضي المصابيح البعيدة ..
أتعب عيونك وإنطفأ ..
لمتين مواعيدك سراب ..
والريد شقا وحرقة جفا ..
واقف براك ..
بعد المشاوير البقت ..
ممدودة في نبض التعب ..
بتعود وتلقى رجاكا زول ..
حفظ الوداد زمنا صعب ..
والباقي من ليل الهوى ..
وعطر الصبابة الما إنسكب ..
والباقي من كل الغنا ..
وسيل الكتابة الما نضب ..
واقف براك ..
واقف براك ..

ابوشهدولينا
07-12-2009, 04:30 PM
إحساس بالأمل
مدني يوسف النخلي

أديني إحساس بالأمل ..
مع كل رحلة شوق تطول ..
وأدي الخطاوي الراجعة ليك ..
في سكتك وهم الوصول ..
ما الدنيا كلها إنتظار ..
والإرتحال قدر الفصول ..
الموجة تحلم بالضفاف ..
والغيمة تحلم بالهطول ..
راحل معاي ضي الأماني ..
وذكرى للأيام هناك ..
لحظات بتذخر بالمعاني ..
وكيف أنسى تذكارات هواك ..
تتخلل الغربة ونعاني ..
ونصبر عشان نكسب رضاك ..
ونغني لو زار الحنين ..
يا ريتو كان سفراً معاك ..
شايف مداينك في البعيد ..
وبيناتنا ممدود الطريق ..
كيف الخيول بدت الرحيل ..
جوانا كم جرحك عميق ..
جفت حدايق الروح وراك ..
والزهرة عدمانة الرحيق ..
أدينا إحساس بالندى ..
في سكة الضنا والحريق ..
وأدي الخطاوي الراجعة ليك ..
في سكتك عشم الوصول ..

عادل القاسم
07-13-2009, 07:42 PM
مدني من اروع الشعراء المعاصرين...
ارجو ان تمدنا بالمزيد...

اركمانيه
10-06-2009, 03:12 AM
في انتظار الكثير