المساعد الشخصي الرقمي

مشاهدة النسخة كاملة : حبوبات القرن الالفية الخامسة؟؟؟



ولد هندسة
06-30-2009, 12:00 PM
يااااا ذلك الزمن سيتغير كل شيء .... ستبلغ حبوباتنا درجة عالية من التشرب بمعطيات التكنولوجيا ... فهيا لندخل في عالم حبوبات الألفية الخامسة

قالت حبوبة (اية) مخاطبة حاجة "تبيان" التي كانت منهمكة في فرك البامية المحورة جينياً
- والله يا تبيان أنا ما عارفاك بتفركي كيف بي (مفراكة الليزر) دي الناس بقو يفركو بي (المفراكة الكهرومغناطيسية ..
ردت عليها حبوبة (اية) وهي تطفئ البوتجاز الذي يعمل بنظرية الأوتار الفائقة
- نسوي شنو يا بت أمي نحنا لسه ما دخلنا في عصر الصرخة العلمية لكن أسكتي ساي ما وريتك
أمس حاجة هيام بت هيثم ود لؤي عملت شنو؟! ..

نططت حاجة تبيان عيونها تهيؤاً لاستقبال الشمار وقالت:
- مالا ؟! .. أنا عارفاها دي زولة عندها (ضلالات عدمية) تلقاها سوت ليها عملة كبيرة!!

أجابتها حبوبة اية:
- أمس مشيت ليها البيت كنت دايرة لي (ثالث كرومات السايكوبالتيك) عشان ألون الخبيز .. لقيتا ليكي ماسكة (اللاب توب) بتاعا وعاملة (شات) مع واحد عجوز من (هضبة التبت) .. تصوري المرا الما بتخجل دي! ..

ومواصلة لهذه (القطيعة الإلكترونية) قالت حاجة تبيان:
أنا زاتي المره دي (كجنتها) من ما سوت لينا القهوة في الجبنة الصانعنها من (معدن التيتانوم) ، يعني ما سمعت بي (جبنة الألياف الضوئية

أضافت حاجةاية في استيهجان:
والله صحي (الماوس ما بزيل بلم) .. العالم بتقدم وديل لسع في التخلف لكن إنتي أمس مالك ما مشيتي معانا لي الاحتفال بالذكرى السنوية لـ (جولدن جلاشو) عالم الفيزياء المشهور

أجابتها حاجة تبيان:




أمس بعيد عنك مشيت أفحص (الجينات) بتاعتي .. أصلو عندي (جين) كده مغلبني قلت أقلعو أرتاح منو مرة واحدة .. وبالمرة غشيت الصائغ غيرت غوايشي بي معدن نفيس جديد إسمو (الزرانكلينيوم) جابوه من كوكب ما متذكراهو لكن بدور حول نجم اسمو (لالاند) مننا زي تمانية سنة ضوئية.!

هزت حبوبة اية رأسها وقالت:


والله بقيتي خطيرة عديييل .. غوايش البتاع القلتيهو ده أنا زاتي ما سمعت بيها .. كدي وريني واحدة

قالت لها حبوبة اية:
ديل يا اختى للمناسبات بس ما بطلعو بيهن ساي ثم رفعت حاجبها الأيسر باندهاش مفتعل وأضافت
وبعدين إنت الظاهر عليكي برضو ما سمعتي بي شنطة اليد الجديدة العاملنها من (رقائق السيلكون)

سحبت حاجة تبيان نفساً عميقاً وهي تجهز عبارات مناسبة لترد بها هذه الهجمة الشرسة لترد لها البوبار بمثله ثم قالت:

حاجاتك القلتيها دي أنا صاح ما مرت علي .. لكن إنتي برضو ما سمعتي بي الكفتيرات الجديدة البتعمل بي (موجات ألفا) و لا بـ (الكمشة الاستقطابية) .. ودي كمشة بتغرف الملاح براها وبتكبو في الصحن ..
وعندك كمان (الحلة الفوتونية) ودي بتنجض الملاح بـ (الطاقة القمرية.....)

وفي هذه اللحظة دخل عليهن (حاج رامي) زوج حبوبة اية وهو في الثمانينات .. وتوقف من وراء الباب ليتصنت على هذا (البوباريشن) المعتق، سمع حاجة تبيان تواصل حديثها لزوجته حبوبة اية وهي تقول: وبعدين أنا ولدي المغترب في (كوكب نبتون) جاب ليهو (ولد آلي) صغيروني يساعد مرتو في تقطيع السلطة وغسيل العـدة .. وفي هذه اللحظة دخل حاج رامي وقال:
قومن يا نسوان سون لينا الغدا وخلن (الفشخرة) الفاضية دي .. وأضاف في سره بغضب وان شاء الله تقوم بيكن قنبلة (بوزوترونية)

تريحنا من نقتكن الكتيرة دي


لكم ودي ولد هندسة

غريب
06-30-2009, 01:48 PM
حبوبات القرن 21 .. اختلاف عن حبوباتنا البعرفوا التكل والمفراكه والقرقريبه ..........

ولد اعلام
06-30-2009, 04:36 PM
زمن يا حبوبة

عادل القاسم
06-30-2009, 06:41 PM
يعني الشمار ده في اي زمن موجود..

ولد هندسة
07-08-2009, 04:46 PM
هو الشمار دا يا عادل كان ما نهي الجنس البشري دا برتاح

سيف الاسلام
07-08-2009, 06:10 PM
حبوبات اخر زمن
ناس حبوبة سوسن وحبوبة يسري وحبوبة ندي وما عارف ايه
وين نحنا من زمن حبوبة كلتوم وحبوبة ست النفور وحبوبة حواء والكلام الغلاد داك

غريب
07-09-2009, 11:01 PM
حبوبه حواء اوع تكون بتاعك عمك الهادى؟؟؟؟