المساعد الشخصي الرقمي

مشاهدة النسخة كاملة : مسادير



وطواط
08-06-2008, 04:00 PM
أ
خضراء
ويانعه
وحزنك سبيب
كأنك هلال البنات الخصيب
أحبك إذا ما ترجى الحليب
وتسقى كأنك ولدتى الحبيب
عيونك سماء
ورمشك قريب
يفج في الغمامه
ويخزلو النحيب
بلاد أنجبتنى وقالت غريب
بلاد أنجبتنى
عطشتَ وسقتنى
رحتَ ولقتنى
فيكف علقتنى
بذاك الصليب



ب
قبر الحبي ضيّق
كتمه وضُلمه
لكنو مات بحلم
تبقى القبور أوسع
أوسع شبه وطنو
و أنا شفتو ساعة مات
ماسك طرف كفنو
طرّز عليه منديل
منديل لمن دفنو
كأنو كان بسمع
ناضمتو وين النيل
قال لي مشي وبرجع
لكنو كان ضيق
كتمه وضلمه
سألتو
قول يا حبيب
هل في الممات جمَّه
دنقّر لمحت َ الشيب
فوق حاجبو إتلمَّ
قال الحياة أحلي
والموت
وجع كاتمو ، بس قلتو لي الله
ويا الله شفتك وين
قبل النظر يبلى
وقبال ما ابقى جنين
وعضامي تتَّبل
ورينى شفتك وين
قول ليّ عليك الله


ج
باب الروح متاكا
إنسربى
صاحيات الحدائق أرعى
قُبال منجنيق الخوف
يعاود ضربي
قبل الطير وصعلوك النحل منكبي
هشِّي العافه
من تمري المخمّر وعبَّى
وزى ما النيل طبق
مركوبو
مارق للبحر مدبى
أدخلي فى الجسد محمومه
بالمرض اليحيّر طبي
وأفتحى باب ضريحك
يدخل الدرويش مغبي
وأدبغى جلدي
بى قطران مهيّج لُبّي
زى أتَر النعال فوق الرمال متربى
كان بهل الجمر
منقد سماى شن ذنبى
ما دام الرماد
وسط الشرار متخبى
لا بد من فضيحة النار
تولع جنبي
تهدي الليل
يهز ضنبو المشاكس
كلبى


د
أقراك مره صاح
عكس إحتشادك في الحضور
هل غاب معاك وعى الطريق
أم بيكي زكانى الزمن!
ماشيك وعرفك يا حريق
في غماماتك بجن
فرهد غيابك أغنيات
ظلت أراضي اللقبا بور
وبلقاكى يا كل الطيور
مسجونه
والحريه سور
وبلقاكي بيناتنا الثبات
وبيناتنا شمس البكرة
في لحظة مخاض
طول الوجع رشّح
مواطن العافيه فيك
خلانى أرجع وأبتديك
وأقراكي من كل الجهات
وما بين أقابلك ومشتهيك
كان حلمك الأول ترف
وكنتى الصبيه الغايبه في زحمة حُجا
وكلمة شرف
وكنتى الزوايا الميته
في متحف خزف
وكنتي الوصايا العشره ، واللون الشحيح
سميّت مساحتك حِكر
كل البيحلمو بالشمس
هجّرتَ من واقعك عبث
سكنّتَ فيك ضد السكون
كل الي كان ممكن يكون
طارت
ضفيرتك ليك غُنا
جدلة صبر
وطولة نفس
وما بين أقابلك وجيت عليك
كان عندي ليك
بس نحن
والجرح الثري
وخيبة أمل أم الشهيد
فى الكلمة والوجه الجديد
وكان إحتقان نبض الزمن
نومة طفل
فوق الدّمن
يا صاحيه بالحاصل علي
يا نايمه
عن فقرى البليد
سميت منافيك الوطن
صارت مناحاتِك نشيد


هـ
نتقابل
حقيقه بقولها ما بحلم
غصباً عن عيون الهم
وعن كل الضباب الجايي
والمبهم
وعن زمنى الصِبح جاسوس
يهّرب للحزن خبرى حنتقابل
وأشيلك في العمر وأجرى
أحبك ينقطع نفسى
وأضمِك نتفرق واحد
نتقسّم على العاشقين
ونتقابل بدون ندرى
القاك والأّ تلقينى
لا دايرك معايا عروس
ولا بيك ينجبر دينى
ولا شايلك معاى واجهه
حنتقابل وترسم
فى حشا الأيام تصاويرنا
نضيع فى زحمة الفرقة
تحس بالألفة ناس غيرنا
مع ضو الشمس تشرق
ملامحنا وتعابيرنا
صحى الأيام مشت
لكن
نحن الليله موجودين
لا بنتعب ولا واقفين
ولا كملت مشاويرنا
..........................
.........................
تعالي
تعالي نأدب الأيام
تعالى نلجّم الوحشه
عشان خاطر عيون طفلين
فى أعماقنا ما كبروا
وكبرت فيهم الدهشه
تعالى مفاصل اللقيا
بكت مشتاقه للرعشه
تعالى حسب مواقيتك
عقارب الساعه مشدوهه
تفتش عن مواعيدك
تعالى خلاصنا فى إيدك
.................
عاطف خيري

ابراهيم العمده
09-21-2008, 05:06 PM
الشكر كل الشكر للرائع وطواط
والمبدع عاطف خيري