المساعد الشخصي الرقمي

مشاهدة النسخة كاملة : نواره - بقلم/ أم حلا



بلقيس
09-20-2014, 02:37 PM
هوي يا فاطنه يا بت اخوي ناوليني صورة نواره بتي بدور اناضما نضمي سر .. نضميا من القلب للقب يمكن يتحرك قليبا وبينا يحس ..
- هي ياعمتي البتول شيلي الصبر كل يوم تنضمي مع نوراه في الصور وتبكي لمن حسيسك اتقرش..
- كدي آآبتي اديني.. الكلام واقف لي في حلقي ساديهو سد
- هاكي آ عمتي اتفضلي
- ماشاءالله .. نواره بتي .. نوارة بيتي .. ونوارة الفريق لاحدو
كدا يا نواره تفوتي ولوارك ما تتلفتي ؟ دا ما كان وعدك لي ..
تتذكري يا نواره لمان جانا عمك حاج المبارك وقال بدورك عروس لوليدو الليهو سنين في بلد اللغتراب ..يوم داك انا نجضت واتحرقت وقلت بتي مااا بتسافر تفوتني .. علا كبارنا غصب جبروني وقالو لي : ما اصلهن البنات ضيفات مهما قعدن في النهايه فايتات .. وقالو لي : يا البتول ما تكفي سعد بتك سعدا سعد البنات اريتن كلهن بعيدات وسعيدات ..
- علا انا بخاف بعادا يطول ..ماشفتو ود المبارك كيفن في البعاد بقى جسور ؟
وجاني حسيسك الحنين من جوه .. قلتي لي : يمه انا ما زي ود المبارك انحنا قليبنا حنين شايلين حنيتك يمه ما بنعرف نقسى وما بنصبر على عدم شوفة عينك يوم ..معقول نصبر شهور؟.. اطمنت بعد كلامك وقلت الف خير .
وسوينالك عرسا ما خمج .. كل شيتا فوقو .. حتى شكلة اهل العريس والعروس فوقو.. ما اصلو الشكله دي بقت طقوس ولازمن يظهر زولا ليها يكوس ...
تتذكري يا نواره لمن خالتك صفيه وقفت في نص اهل العريس وقالت نواره زي البنات ومافي منها اتنين .. ود المبارك الله اداهو هو اكان ما الاغتراب دا نضفو كان بمسك يد بتنا .. ما كان اغبش ودشن .. والشكله دورت .. اهل العريس يقولو ولدنا وخالاتك وعماتك يقولن بتنا .. بس أكان ما اهل الخير رجعونا من الغلت وقالو لينا آناس انتو بقيتو اهل وتاني ما بفرقكم علا الاجل .. في النهايه العروس للعريس والجري واللوم للمتاعيس .. واتصافينا ودخلنا معاك في الداره ورقصنا لمن ديكنا للفجر عوعا .. وحاج مبارك نادى من جوه العوضه .. يا حروم امرقن لينا العروس شان نلفا بص العوض باكر البنيه دي طيارتا قايمه دغش اسرعن امرقنها خلونا نتسهل نمش .. سريع سريع ناس فاطنه سريعات الهمه جرن شنيطك أم ارقامن سر .. وسرهن عندك بتعرفي كيف تلميهن يقفلن وتفرقيهن يفتحن .. ما أصلك آبنيتي فاهمه كل شي حت حاجات الخواجات بتعرفيها ..
تتذكري يانواره خالتك الساره لمان جات تنادي هوي يا فاطنه ياوزيرة العروس جري كرتونة الطلح والحلو مر دي ما تنسيها دي هديتي لنواره .. كنت شايلاهو ندر هديتا طلح وحلو مر والله حروم البلد ديك مابعرفن يعوسن ابري زي حق الساره ام بدر .. ومحل مايسري يمري يانواره ياست الكل ..
وتاني جانا حسيس حاج المبارك من ورا الضرا .. هوي يا نسوان اسرعن اهو داك العوض يزمر لنا في بوري باصو امرقن البنيه دي لا بره ..ومرقتي يا نواره زي الشمش تسوي بق .. وصوت بلعان ريق شباب الفريق يسوي جق .. جق..
ويفركو في ايديهم حسره وندم وعيونم تقول القسمه سوت سواتا فينا ومرقتك يا نواره من يدينا ..
وجاتك عمتك العازه وايدا بعجينا تصيح ..هوي يا بت ما تسافري على الريق هاك اكلي زلابية عمتك العازه تبقالك زاد طريق ..وسافري على العديله يا الطيبه واصيله ..
وقلنا للبكي جااااك .. كبير وسغير بكينا .. وكلهم قالو ليك ما تنسينا .. وانا الساعه ديك غلبني الوقوف اتحكرت في الواطه وبكيت وقلت ليك يا نواره غالبني الصبر .. وفوتك مني في قلبي مولعه جمر.. وجيتي يا نوارة قلبي وحضنتي امك وقلتي وعبرة دموعك سدت حلقك .. ما تبكي يا امي قومي من الواطه دا ما بكانك بكانك فوق راسنا ..وقلت ليك روحي بتدور تطلع من وريدا وترجع عند سيدا ..فراقك حار علي علا يا بتي اياهو حال الدنيا وكل بنيه بتعمر بيتا بس خوفي اموت بحسرتي لو ما رجعتي لي ..

وقلتي يا امي سلامتك من الموت .. صحي البلد بعيد لكن العام الجاي بجيك .. وكواريك حاج المبارك من جوه الباص هوي يا ناس زمنا جا خلونا نمش .. وكلام كبار الفريق .. فكيها يا البتول خليها تتسهل بس ادعيلا شان بالسلامه توصل .. قطعو وداعي ليك .. كنت بدور اودعك شديييد .. اكان علي اوادعك لمن الشمش تغيب علا حكم القوي على الضعيف .. وفكيتك آحبيبة قساي وكأني فكيت روحي المربوطه في حلقي .. ودموعي جرن بلن سدري .. ولوحتي لي بيدك ساعة جروك مني ..ومشيتي مني بعيد توادعي في الناس وانا اتفنت في الواطه شان يا بنيتي الشلهته قدام النسابه عيب .. وكتر خير حاجه خادم الله نادتني وحسيسا مبحوح قومي آالبتول شيلي تراب قدم بتك اكشحيهو جوه البيت شان ترجع تعود .. وجريت وانا اقول اي والله دي نسيتيها كيف آالبتول .. وفجيت ناس الفريق فج .. ودنقرت اخم في اتر رجليك المابغباني ما اصلو باااين .هو العندو زي نعالك منو والبمشي زيك منو .. وحاجه خادم الله تلم بوراي وتنشد بحسيس زي الناي .. اها شلنا اترك يا نواره وكشحناهو في البيت شان زي ما مرقتي مننا شمش ترجعي قمره تضوي تاني فوق الفريق ..
واتقالدنا انا وخالتك وبكينا لمن سمعنا بوري بص العوض زمر لينا .وجرينا وراهو ولوحنا ليك بإيدينا .ورجعت بيتي وحرست اتر رجليك من عام الفين راجياك لمن جن فوقو عشره سنين وجبتي مرام ومقام وميسره .وكل يوم خبر جيتك بمر عليه سنه ..ودموعي كملتهن وشبعت في الهمله والبشتنه .. خلاص آنواره نسيتي امك؟ دا ماكان وعدك لي .. بتذكر كلامك كانو امس .. نسيت احدسك ..انا من يوم داك قاعده الم في اترك واوديهو البيت واقول شان نواره ترجع قمره زي ما مشت شمش .. وكل ما يقولو في زولا جا من اللغتراب ليهو امش ..اسالمو وابكي واسعلو .. ماشفت نواره بت حشاي نور الشمش؟؟؟

بلقيس
09-20-2014, 02:41 PM
سامحك الله على كم الوجع المخزون هُنا..
والمُرتب بفوضى عارمه..
هكذا هي المُدن البعيده..
تستهويهم حد إنغلاق بوابات الحنين..
فقط..
يبقى أمر الصبر بين الدواخل خوف التسرب..
فرض واجب الأداء..
وتبقى نوافذ الأمل دوماً مُشرعه للقادم من بعيد..
..