المساعد الشخصي الرقمي

مشاهدة النسخة كاملة : قصيدة



العوض شمس الدين
03-18-2009, 10:40 AM
بعد ما اترقدن بي مطبق الوديان
يكتب لي لماهن ربنا المنان
******
كلبي الشارعو فيهن جا منقلب هقلان
واتحير قعد ساكت بقيت محنان
تيسن ديمة من حر الرحيح كملان
وجاهن من قفر بلدا بعيد ضبلان
*****
من الفجخاء هبر خـــلاهن
لا من دور أمات رميلة وجاهن
عند المتني فوق عاجبا جديد لماهن
ختمن بيلا فوق ميع البقر دلاهن
*******
المعزي البجازن ديمة فوق في خلاهن
بالغات النصاب أنصاري ما زكاهن
من ود البصير جايب إذن بغناهن
شوفن يا الزبير في لساني ديل ما احلاهن
******
جفلن من زوال شوفا بعيد باداهن
عرقن ود عول وادن قليلة قفاهن
ناس ابن الذريح ضربو المثل بي غناهن
من كاف السوام الميرغني بينجاهن
*******
من عوج الوكت ما بتركن وانساهن
فوق حيا فوق محل دايما بكوسو رضاهن
ملزوم بي مراتعهن وخبرة ماهن
وصلنو المصب واتوكرن في خلاهن

العوض شمس الدين
03-18-2009, 11:04 AM
يوم امس السحاب فوق البطانة منيل
وحكم القلب على دمعة عيونى تسيل
طريت العزو ثابت وماهو قليل
ربيع قامة ادعج مو التخين متفيل
** **

الفرجونى قال:-
يوم امس السحاب فوق البطانة مميل
وهب قبليهو واتسرعف هواه عديل
رزم قلبى خلى العين تفيض وتكيل
طريت اريل تقاقة الشارفة ماها غزيل

يوسف البناقال؛-
لماع البروق مس الهبج متكيل
وولع شمعة القلب القبيل متحيل
طريت ست الصبا الما بجالسوها العيل
جمالها يفوق على قدر العقل ما يخيل

وهنا قام الشاعر يوسف البنا بقفل المجادعة بقولة جمالها يفوق على قدر العقل ما يخيل وكما علمت من شيخ احمد الفرجونى شخصيا بانه فكر كثيرا فى الرد على اخيه الشاعر يوسف البناوبعد (1 ثمانية عشر سنة حتى جاء بالرد التالى الذى اعتقد _بل اكاد اجرم _بانه (فات القدامو والورا ه)واليكم الرد واترك لكم التمتع به والتمعن فيه

سماحا سيدو يغرف فى السماح ويهيل
مكتوب ليهو تصباه النفوس وتميل
سماحا كل سماحا دونو يبقى قليل
كونو حقيقة مو تشبيه ظنون وتخيل

قطر الانقليز الماقطر فلاته
كلك قرمصيص والباقي خلو رحاطه
شوف البنيه كيف تتني فوق اخواتها
كل الشافها جنّ وصلى الرقيبة تلاته

العوض شمس الدين
03-18-2009, 11:07 AM
الخَـبَرَ اللَّكِـيد قـالوا البُطـانَةْ اِتْرَشَّــتْ
سـاريةً تَّبَقْبــقْ لـي الصَّبـاحْ ما انْفَشَّتْ
هـاجْ فَحَـلْ أُمْ صـريصِـر والمِمَانِحْ بَشَّـتْ
وبـتْ أُمْ سَـاق على حَـدَب الفريق اتْعَشّـتْ

شوف نور الجيه لمن لمع ضواي
وشوف فرع الفريد وقتين قدل تناي
شوف نهد الظبي المن طبعو مو حناي
شن المتلو غير المدفع الدواي

الزول المتل موز الجنينه خدورتو
فوزر منى يالاخوان قدر مادرتو
قالوا العاقل طبيب نفسو البدوروسترتو
والزو ل مايتشابا للحاجه امبقت مى قدرتو

أنا جنيت والجن من جناني جنيتو .......
مجنون ليلى عند قاضي الغرام جانيتو ..........
والشي المجنني لو شفتوهو كان جنيتو

يافقير ماتعزم تقول جنيت
وما شفت القبيل رفعت ستار البيت
إن رقصت عديله وإن مشت ختخيت
وكان وقفت قنديلاً يضوي البيت

أول باب سلام يا ملكة الجيل الأبوك الشيخ ...............
تاني الباب سلام يا السادة مربوع مشيك مليخ ...................
تالت الباب سلام يا العندكم قوانين الأدب تاريخ ............
رابع الباب سلام البعدك الجيل كلوعندي مسيخ

الحوش المزين ياخلي كيف أوصافو ........
الداخلنو جوة وبرة ما بنشافوا ........
كان ما حكم الإله وربنا البنخافو ........
نعبد بالسبح لي الديسو هاطل أكتافو

العوض شمس الدين
03-18-2009, 11:09 AM
مازيني السحي الما شال رماد وأترمد
ومازيني القنايتو عديله ماهو مكمّد
وحات رب العباد بجاه نبينا محمد
بقّ شعاعو في ود عيني لمن غمّد

الليلة الصعيد أمسى بروقو يبرقاً .................
وما قايل الأيام من البريدو يفرقاً ...................
أبكن باعيوني وياكبادي إتحرقاً .................
وا مرض العقول بعد الوجوه يفترقاً

خب وقام نتر من الرتوع زي صوفه
للزول السمح والزين مشيتو ولوفه
ما استنانا نعدل حالنا والمخلوفه
قال باكر نبيت عند البيطرب شوفا
...

العوض شمس الدين
03-18-2009, 11:11 AM
مسدار الصيد
الشاعر / محمد أحمد بك أبوسن ( الحاردلو )
--------
الشم خوخت بردن ليالي الحرة
والبراق برق من منا جاب القرة
شوف عيني الصقير بي جناحو كفت الفرة
تلقاها أم خدود الليلة مرقت برة
******
تعرف لي مشاهيد الرقاد والفرة
فلاخ المصب بيه بتبين تتورى
فوق حيا فوق محل من الصعيد منجرة
ويا باسط النعم تسقيها في ها المرة
*****
أب عراق فتق قرنو المبادر شره
والباشندي عمت مهششيب الدره
من النقرة كل حين فوق عليو منصره
وها الأيام محاريها القليعة أم غرة
*****
قدمت من هنا وبي أضانا سمعت كره
وفوق كرتوت شخيتيرا تخين خر
قلاتو الوهاط بي لشقة قبلو محري
يا باسط النعم ما تلقى فيهو مضرة
****
بت المن قرين مرقن علي الجبال
وفوق (بيه وبلوس) مابرجن الوبال
صفرا درعتن تتدلى لا البهال
وبيضة شاش قرابيبن تريع البال
*****
مرقن يا مجيب لي جملة السؤال
شاحدك تجمعن من مطبق الحلال
ما ينقص حساب الدرج ولو بي عجال
ونحن نجيب لهن في كل يوم موال
********
من (بيلا) الصباح إتسربقن همال

Abdelazim
03-18-2009, 11:14 AM
شـكــ وبارك الله فيك ـــرا لك ... لك مني أجمل تحية .
عليك الله صغِـر توقيعك شوية

باسل
03-18-2009, 12:07 PM
شكراً يا جنى على الجدع
من شابه أخاه فما ظلم

محمدحمزة
03-18-2009, 01:57 PM
والله يا العوض يا اخوى بسطنا انبساطة شديدة خلاص
ادينا من الذى دا كتير منتظرنك

ابراهيم العمده
03-20-2009, 09:42 AM
الشكر لك أيها القادم الصغير أخو القائد الكبير
فذاك الشبل أخاً لذاك الأسد
وننتظر المزيد