المساعد الشخصي الرقمي

مشاهدة النسخة كاملة : نخب وبريق



وطواط
03-02-2013, 02:09 PM
دراسة متأنية لأقلام بعض الأعضاء نستنشق منها بعض العبق وكل البريق

علي التجاني
03-02-2013, 02:17 PM
دراسة متأنية لأقلام بعض الأعضاء نستنشق منها بعض العبق وكل البريق

واصل متابع لك

وطواط
03-02-2013, 02:20 PM
والله انا داير ادعو الناس عشان تشوف الحالة الحاصلة للكنداكة لما كتبت الكلام دا


محتارة فيك أنا من زماااان
قبل ألقاك قبل أجيك
لمن أعاين فى عيونك بشوف شعاع مامر بي يحملنى فى أسفار طويلة وانتهي مبهورة فيك واسير فى ذات السكة أتبع خطاويك
كل خطوة عليهابصمة تحكى عنك وعن حكاويك
ولمن اقيف فى قيف حناك بي كل ثقة أرمى نفسي واغوص فى موج غرامك وبعدها أملع الملم أطراف جوانحى إندسا فيك .تحتوينى واحتويك

كل التوجس والحيره
الشوق
التململ بعمق
حالة من الأختلاج افضت بالكاتب للغوص في عمق معاني دراماتيكية واخساس لا ينطفي
انا غايتو عجبتني فقرة المواجهه بالعيون دي
تديك احساس الدهشة البعدها والأنقياد والتسليم لي شخص وفقد القدرة على المقاومة الاّ من رغبة يملؤها الشوق
برافو كنداكة

الكنداكة
03-02-2013, 03:04 PM
وطواط يا وطواط خلينا اول نشيل نفسنا بى فرحة بوستاتك المذنبية .البتطلع كل ألف سنة
قبل تلاتة سنة ياوطواط سطورى البسيطة دى ماكان ممكن اصدق أنى خطيتا بي نفسى .لأنو دى ماحاجة بنتعلما فى المناهج والبحوث ولابناخدا مع الماجستير والدكتوراة .دى نمت لمن التقيت بالنخبة وهنا اعجبنى تمرد وطواط واشواقه التى يبثها للبحر .وضجيج صمت بسطاوى وغموض ايمن ومرارة الاحاسيس لدى ام صبا .ومن هنا تعلمت الكثير ومازلت اتعلم.تسلم واطواط على الطرح والنقد الجميل .ومتابعين

علي التجاني
03-02-2013, 03:29 PM
وطواط لاشك ان الكنداكة امراة مبدعة في كل المجالات السياسية والاجتماعية وتتمني بان تقراء كل مواضيعها التي تلامس الواقع وبالذات السياسية

ثم ثانيا انت قايله هينة ولا لينة دي معها ماجستير في علم الاثار عشان كدا ماتستغرب لمن تجيك بكلام منمق ذات بعد يعرفه اهل الذوق

دمتي الكنداكة

أم إباء
03-02-2013, 03:49 PM
http://sudanelite.com/vb/mwaextraedit6/extra/92.gif




يا سلام علي هذه الفكرة الرائعة

مشكور واطواط و بالجد في أقلام لها بريق يخطف الابصار

عندما تبدأ في التعبير بصدق عن الدواخل وما أوردته عن الغالية الكنداكة
واحدة من تجلياتها التي أدهشتنا بروعتها ,,,واصل ونحن معك متابعين

وطواط
03-03-2013, 08:59 AM
وطواط يا وطواط خلينا اول نشيل نفسنا بى فرحة بوستاتك المذنبية .البتطلع كل ألف سنة
قبل تلاتة سنة ياوطواط سطورى البسيطة دى ماكان ممكن اصدق أنى خطيتا بي نفسى .لأنو دى ماحاجة بنتعلما فى المناهج والبحوث ولابناخدا مع الماجستير والدكتوراة .دى نمت لمن التقيت بالنخبة وهنا اعجبنى تمرد وطواط واشواقه التى يبثها للبحر .وضجيج صمت بسطاوى وغموض ايمن ومرارة الاحاسيس لدى ام صبا .ومن هنا تعلمت الكثير ومازلت اتعلم.تسلم واطواط على الطرح والنقد الجميل .ومتابعين

شكرا كنداكة لكل ما اتحفتنا به
شكرا على الأطراء وهذه هي النخبة
فقط كوني بخير

جبر الدار محمد جبر الدار
03-03-2013, 11:32 AM
لله دركم
المادح والممدوح
الغوص فى دواخل الكنداكه يحتاج لمؤهلات لا نمتلكها
ولهذا سنكون من المتابعين فقط
حتى نتعلم منكم

وطواط
03-03-2013, 04:50 PM
عمنا ابراهيم ود المبارك جسد كل اشكال الطفولة البريئة في عشوش تلك الطفلة التي سرحنا معه نتأمل في ضفائرها الطائشة في حزن عميق. رغم البساطة في المفردات الا انها اطفت جمالا يتناسب والمناسبة ويا حليلك يا عشوش نسأل الله لها الرحمة


حزن الفصول/ مبارك إبراهيم الأمين


يا حلاتك يا عشوش
يا حلاتك يا نسمة هبًت
بعد الهجير
وفرًحتْ كل النفوس
يا حلاتك يا عشوش
واقفة زي سعف النخيل
ودالة لي بيت العروس
وشايله من لون القمح
ولابسة زي عيش التروس
وأنا فيك بطالع يا بلاغة
إنت فيك أصعب دروس
قيام زيد وجلوس عمرو
والحساب ..والمثلث
ونصف قطر فوق قوس
وأنا كل عام أقرأ وأعيد
أنا ما بليد
بس بنسي أرقام الجلوس
الله أبدع فيك وصور
رسمك جميلة روح ومنظر
لا دايرة مكياج لا رتوش
بس داير أشوفك
لابسة زي أمي الحبيبة
رابطة في جيدها تيلة
ولابسة في الأذنين خروس
أنا داير أشوفك وكت أشوفك
أشوفك أجمل من عروس
لكن إرادة المولي أقوي
وكان فراقك
درس واحد مش دروس
كان درس واحد
لكنه إحتوي كل الدروس
الوداع ياقمرة غابت
حزًَنت كل النفوس
حتي الفصول حزنت عليك
والأناشيد والطقوس
والزميلات زي طِوِيراً
فارق العش يا عشوش
والمدير حالو زي حال الخفير
لا سيجارة ولا كدوس.
,,,,,,,,,,,,,,,,,,,,,,,,,,,,

عادل القاسم
03-03-2013, 04:54 PM
وطو ياخ في ناس بصراحة لمن يردو علي انا بفرح ..
لانو بصراحة كتاباتهم قمة الابداع..
والكنداكة واحدة منهم.. لكن ياخ مكجناني كدي..

وطواط
03-03-2013, 05:09 PM
وها هو ظل الأركمان يراوغنا
ويتوه بنا في عوالم تجعنا ننشطر الف مرة
وفي امنية الا نستفيق


يراوغني ظل
ينده الشمس
وتستفيق نهاراتي
اسابق الريح
لنيل انفاس الصباح
ويراوغني الظل
ادير ظهري
وافتح عين البصيرة
واتنفس انا
وانشطر
على صهوة
شريان شوق

وطواط
03-03-2013, 05:15 PM
وطو ياخ في ناس بصراحة لمن يردو علي انا بفرح ..
لانو بصراحة كتاباتهم قمة الابداع..
والكنداكة واحدة منهم.. لكن ياخ مكجناني كدي..

مالا ما بتكجنك؟
بعدين انت زاتك حقو تفرح لو كجنتك
قال ليك دي عالمة آثار
يعني بتحب الحاجات القديمة والكراكات والرواكيب
انت زول ما شاءالله عليك مالك ومال دقوهو وسرقوا ركشتو؟

وطواط
03-03-2013, 05:30 PM
كمان اروع ما يمكن ان يكتب حالة العتاب التي يمر بها مامون بكري هلال وهو يرتب اوراقه لرحيل مر وشجن كثيف وحزن شفيف

(أوهام رجوعك)
قبل ارحل.
وامشي منك ...
كنت بكتب...
فيك قوافئ
أنسج الكلمات وادون...
عن مراكب...
تايه تبحث...
عن مرافئ
وعن مداين...
ضامه احزان الغلابه...
ضاجه بي اوجاع...
حزينه...
وفارده للافراح جرابه
وفيكي..
أكتب يا عذابي ...
قبل ارحل من ديارك...
كنت حاسس...
قبل اعرفك...
إني لابد...
ليك مفارق...
وكنت بحلم...
بي مداين ...
عامره بالافراح...
تشارك...
بيني بينك....
قصه قاسيه....
مُره أبعد...
من مدارك...
مهما اترجيتي...فيني
مابفيد اصلو اعتزارك...
مانسيت...
لحظات عذابك..
واوهام رجوعك...
وانتظارك
ومانسيت...
يوم جيت ازورك...
جاي كان..قاصدك ابارك
لا تقول...
شفتيني اصلك....
ولا الفؤاد...
حباكي دارك
الغرور انسيه مره...
خوفي بكره...
يزيل نضارك...
كفكفي الدمعات وعدي...
دي الدموع...
مابتطفي نارك
الدموع ...
عشناها قبلك..
قبل ما تبدي
أعتزارك
والحنين التشكي منو...
ومن خيال ...
في الظلمه زارك...
ما زمان ..
قبال رجوعك...
وقبل ما تبدي اعتزارك
كان معشعش...
في قلوبنا ...
لما تسأل ...
من خبارك...
والفراق الشايفاه انت...
ما زمان ..
كان بي اختيارك

حبوبة
03-03-2013, 06:02 PM
وطواط ياروعة ازيك وخبارك يا جنا

كنت عايزة استمتع بالقراءة وبس .. علة غلبني :icon10:

أخيتك جات من البلد قريب وطول ما أنا هناك في مقطع بتاع هلال كان بيمشي وبجيني
منو السرق حلمك ..
وقطع شجر حنّك .. سُدى

ياخ الحتة دي هلال اتقطع فيها وقطّع مصاريني .. وبالذات لم تشوف المفارقة الغريبة الحاصلة ف البلد غصبا عنك تكورك قطعناه نحن ب ايدينا يا هلال

بالجنبة: تمشي بنفس الاسلوب البديت بيه مع الكنداكة {تأمل}

سيف الاسلام
03-03-2013, 06:06 PM
سحر ليل وجمال وطواط الحرف البريق
وطواط كلماتك شفا للعقل وللالم العميق
أشجيني بي راح الكلام داوي فيني العشق الدفيق
حبيت أمر وأسجلها فيك كلمات وانت فيني حرفي البريق

سيف الاسلام
03-03-2013, 06:08 PM
وطواط تسجيل حضور وإعجاب وتغيير من جو الشورابات بتاعي
تدفق فينا يا جميل عبير وحرف ملئ بالنغم

Rahal
03-03-2013, 11:53 PM
وطواط بركه الجيت

نحن هنا

متابعيين . . .

ما تطول الغياب . . .

وطواط
03-04-2013, 10:15 AM
وطواط لاشك ان الكنداكة امراة مبدعة في كل المجالات السياسية والاجتماعية وتتمني بان تقراء كل مواضيعها التي تلامس الواقع وبالذات السياسية

ثم ثانيا انت قايله هينة ولا لينة دي معها ماجستير في علم الاثار عشان كدا ماتستغرب لمن تجيك بكلام منمق ذات بعد يعرفه اهل الذوق

دمتي الكنداكة




علي التيجاني والله اديتنا معلومة
انا اقول يا ربي الشي الشاديني لي كتابات الكنداكة دا شنو؟
خلي بالك علماء الآثار ديل عندهم علاقة وطيدة بالكهوف والمغارات والوطاويط
عشان كاد
يا زول حبابك وخليك معانا في كهوف النخبة دي نحن بنفتش في الأثار الحلوة وننقب عن الشجن

وطواط
03-04-2013, 10:18 AM
لله دركم
المادح والممدوح
الغوص فى دواخل الكنداكه يحتاج لمؤهلات لا نمتلكها
ولهذا سنكون من المتابعين فقط
حتى نتعلم منكم

جبرا يا رائع
انت زاتك مادح كويس
عليك الله تعال امدح لينا هنا برضو
عندنا ليليه :rolleyes:

وطواط
03-04-2013, 10:23 AM
http://sudanelite.com/vb/mwaextraedit6/extra/92.gif




يا سلام علي هذه الفكرة الرائعة

مشكور واطواط و بالجد في أقلام لها بريق يخطف الابصار

عندما تبدأ في التعبير بصدق عن الدواخل وما أوردته عن الغالية الكنداكة
واحدة من تجلياتها التي أدهشتنا بروعتها ,,,واصل ونحن معك متابعين

شكرا ام اباء علي المرور الكريم
والله الواحد زي تقول ياداب عرف الأندهاش
خليك قريبة

وطواط
03-04-2013, 10:47 AM
وطواط ياروعة ازيك وخبارك يا جنا

كنت عايزة استمتع بالقراءة وبس .. علة غلبني :icon10:

أخيتك جات من البلد قريب وطول ما أنا هناك في مقطع بتاع هلال كان بيمشي وبجيني
منو السرق حلمك ..
وقطع شجر حنّك .. سُدى

ياخ الحتة دي هلال اتقطع فيها وقطّع مصاريني .. وبالذات لم تشوف المفارقة الغريبة الحاصلة ف البلد غصبا عنك تكورك قطعناه نحن ب ايدينا يا هلال

بالجنبة: تمشي بنفس الاسلوب البديت بيه مع الكنداكة {تأمل}

حباب حبوبة حمدلله ع السلامة وبركة الوصلتي طيبة
نحن دايرين اي زول عجبتو حته وقطعت مصارينو يجيبها لينا ويورينا الشي السمح الشافو فيها مرات بنمر علي الحاجات السمحة مرور سريع وما بنشوفها
الغرض من البوست دا اننا نجي نفلفل الحاجات دي هنا
عشان نعرف كيف نتأمل
ونناقش الأحساس بتاع الكاتب كلنا
وطالما الكاتب قاعد معانا ممكن يورينا التساؤلات الممكن تحصل وتفسيرها
ودمتي يا حبوبة احسن واحدة ضواقة

وطواط
03-04-2013, 10:57 AM
سحر ليل وجمال وطواط الحرف البريق
وطواط كلماتك شفا للعقل وللالم العميق
أشجيني بي راح الكلام داوي فيني العشق الدفيق
حبيت أمر وأسجلها فيك كلمات وانت فيني حرفي البريق




وطواط تسجيل حضور وإعجاب وتغيير من جو الشورابات بتاعي
تدفق فينا يا جميل عبير وحرف ملئ بالنغم



شراريبو يا رهيب
عارف يا سفة انت براك كدا داير ليك بوست خاص
يعني مثلا شراباتك دي بقت داخلة في اي موضوع كان سياسي ولا اجتماعي ولا رياضي
بالمنحى الرمزي للفكرة الساخرة
بالضبط زي ركشة عادل القاسم
وعيدان طلح عمك الهادي
والفكرة في القالب الفكاهي والمنحى الموحد في تناول القضية
بمعنى الشخصية الواحدة للأدوار المتعددة
ومافي زول يسألني من معنى الكلام دا شنو عشان انا زاتي ما فاهمو
المهم خليك قريب وشاركنا بي شراباتك العفنات ديل
لك الود حتى تستغيث

ام صبا
03-04-2013, 11:29 AM
وطواط نهارك سعيد
بوست جميل وفكرته رائعه واستمتعنا بكل المشاركات ومنتظرين بمزاج عالى

وطواط
03-04-2013, 01:15 PM
وطواط نهارك سعيد
بوست جميل وفكرته رائعه واستمتعنا بكل المشاركات ومنتظرين بمزاج عالى

هلا ام صبا نهارك اسعد
وعليك الله وانت جاية جيبي لينا معاك كم لقطة كدا نضوق ونضوّق الجيران
الحاجات المن بيت الكلاوي ديك
انا شادي الحلة دي عشان نقعد نقزقز فوقها كلنا
طيب؟
ما تتأخري

الكنداكة
03-04-2013, 02:11 PM
ود التجانى ...جبرو .....رمانة انتو المرهفين الاجمل البتستشف الجميل ولو كان بسيط ويبدو يا واطواط انو البساطة لها بريق .وعن الاثار ماذا اقول
من بين حنايا التاريخ
اتيت غدا
ومعى مهجا
تحمل وهجا او قل رمزا
من عصر حجرى
من قبل التاريخ

الكنداكة
03-04-2013, 02:19 PM
انا واطواط بدخل بى موبايل والنسخ عندى موجود لكن معل يلا انا عاجبنى مقطع لى بلقيس مدشدشنى تتلقاه فى الصفحة الاخيرة حق ضجيج الصمت لى بسطاوى المقطع بقول
اعلنى فيك دولة عشق لابتبتدى لا بنتهى .كدى جيب المقطع كلو سمح

وطواط
03-04-2013, 02:34 PM
متعبة والله يا كنداكة
لكن اقول ليك حاجة؟
المقطع يستاهل


أنضم وكت يبقى السكوت حرفين نهي،،
شكل تفاصيل الحلم وابنيهو زي مابتشتهي،،
أعلن بدايات الفرح خلي المواسم تزدهي،،
وأعلني فيك دولة عشق لابتبتدي ولابتنتهي،،
،،،


الزولة دي خلتو يعمل اي حاجة
حتى الأعلان عن تأسيس دولة عشق متمردة عن الزمان المطلق
حالة من الغيبوبة كالتي اصابت الكنداكة
الغيبوبة المغيبة للوعي الأدراكي
تركت لنفسها فقط لذة الوعي الحسي
بلقيس لا تأبه بالزمان والحديث وطقوس الأعلان ومراتع التتويج
وانما فقط يملؤها الأحساس
شكرا بلقيس على غيبوبتك اللطيفة ان كنت قد احسستها فعلا
شكرا كنداكة علي التنبيه بمواطن النجوم
وليتها وضعت بعض البصل حتي نجد من يفيقنا

الكنداكة
03-04-2013, 04:33 PM
الحاجات الحلوة بتستحق التعب يا واتواتى
لكن هسى فى داعى لى سيرة البصل
استمر فى بحثك وتنقيبك
تسلم

وطواط
03-04-2013, 10:10 PM
وطواط بركه الجيت

نحن هنا

متابعيين . . .

ما تطول الغياب . . .

حبيبنا رحال
نحن ان اشرق صبح نترك النوم ونصحو
وان لأشراقك علينا بذرة يوم جديد
وكل ما هو مونع
وبهيج
عليك الله ابقى طمنا عليك
تعودتها منك كثيرا وانت تتفقدني
ابقى طمنا عليك

بسطاوى
03-05-2013, 02:28 AM
وطواط ياوجع الحرف المقدس ,, وانا اتسكع مع وحدتى فى بستان هواك
عند الساعة الثالثة بعد بعد انتصاف الشوق تعثرت فى فى خيوط الضوء العالقة
فى المكان بعد ذهابك وسقطت عمدا فى عمق الدهشة بعدما رايت ما تمنيت ان
يكون تمنيت وحلمت بيوم نتنادى لنتأمل ونستمتع بكتابات مبدعينا فنريهم ما خطت
اقلامهم باعيننا ونترجم اقوالهم بلغة اخرى لم يدركها احساسهم لحظة كتابتهم لها
ولم يطف المعنى بخيالهم فيدهشون مثلنا واكثر ,, هذه المكان خاصتى وسارقص
كيفما شاء الهوى ,, وطواط دى طلة ليل متاخر ولى عودة باذن الله لقول الكثير
عنهم فهم يستحقون منا كل الجمال واجمل لا نهم هم كذلك ,, تسلم يا رائع

وطواط
03-05-2013, 08:30 AM
بسطاوي عليك الله الحقنا
شوف ايمن الجميل دا عليك الله



ولحظة إنك إنتي معايا
وأبدأ أفتش في جوايا
عن باقينا الما لاقنو
وعن ماضينا الما عارفنو
وعن واقعنا الما عايشنو
وعن مستقبل ما إتحدد
لسه مسارو
وخايفين منو
وبرضو نعاين ليوم بكره

توجس
واستفهام وحيرة
وخوف من المجهول
ايمن خلط احساسو دا بي فتيل ريحة وقدم لينا شجن كثيف
رغم ان شعاع الأمل منعقد على المستقبل
الله علي العشم ياخ
سلمت ايمن

وطواط
03-05-2013, 08:45 AM
الأحساس بالغير لا يأتي الا من قلب كبير كقلب تينة
نص في غاية الحزن
انا والله ما عارف اكتب فيهو شنو لشدة ما شابني من حيرة
اقروا النص دا بس وعيشوا الأحساس


حزينة والله من اجلها...

مشاركة الاخرين فيما نملك قد تؤذينا ولكن فيمن يمثلون لنا جانب من حياتنا هو الجانب الاهم ..واثمر ثلاث ثمرات وحان قطاف الرابعة؟؟؟؟؟

فهو لعمري الم لا يضاهيه الم..

وكما قالت اخري...
لا ترقص علي جروح الاخرين....

كانت دموعها تنزل من عينيها وتحرق خدي انا ...فمشاركة من تحب مع اخري امر قاسي...وعندما تفاجأ بأن من حولك يعلم وانك الاخير فهو الالم الاشد عذابا"

مر علي اليوم بكل حزنه ...احاول البحث عن سعادة بمهاتفتها والاطمئنان عليها...اتاني الصوت باك ٍ..

قالت:
الان لا احتمل شيئين...احدهما وجوده معي بنفس المنزل....والاخر رؤية كفاحي معه متمثلا في عملنا سويا"

اغلقت سماعة الهاتف ووعدت بالاتصال غدا حتي لا تسمع صوت نحيبي

بسطاوى
03-06-2013, 10:14 PM
بسطاوي عليك الله الحقنا
شوف ايمن الجميل دا عليك الله



توجس
واستفهام وحيرة
وخوف من المجهول
ايمن خلط احساسو دا بي فتيل ريحة وقدم لينا شجن كثيف
رغم ان شعاع الأمل منعقد على المستقبل
الله علي العشم ياخ
سلمت ايمن


عارف يا وطواط بعضهم لايدع لك مجالاً للكلام او التعليق بل يتركك عالق فى عطر المكان ولا يسعك سوى التأمل وبصمت
هذا الايمن وفى اغلب كتاباته يمزج الاحاسيس ببعضها البعض فتدخل انت كقارى وتخرج مضمخ بالدهشة قد لا تدرى من اين
وكيف ولكن تجدك متلبس بكامل الاحساس بما كتب ,, هذا الايمن كاتب رائع دائما ما يترك لك شواغر لتملاءها انت باحساسك

وطواط
03-06-2013, 11:37 PM
بسمة صاحبة المفردة البسيطة والأنيقة
تجلت في كتابة السطور الجريئة
وخطت بوح عميق
وقسم بولاء
كلامك بخش العروق ياخ


يامن سكن الوجدان ....
واختلط بالدم في الشريان
حدثني واكثر...فشاطئ الشوق..
...عطشان عطشان ..http://www7.0zz0.com/2012/12/08/19/278359843.jpg (http://www.0zz0.com)
فتريث ...يا اغلى انسان
يامن سكنت القلب والوجدان
وادمنتك المشاعر...
وادمنك تشربا الشريان ...
http://www7.0zz0.com/2012/12/08/19/538023467.jpg (http://www.0zz0.com)

>>>>....

وطواط
03-06-2013, 11:53 PM
كردفاني الشفيف
صاغ حزنا نبيلا
وهو يقف على اطلال جرح
ويدفن بقايا الأسي...
لوشاية وأدت قصة
كردفاني دا جنو دفن

أصلو دنيا الشوق حزينة
وحزنك إنت علي كفاية
عشت طول أيامي ليك
واكتفيت إنك معايا
ولمحت كل أحلامي فيك
وماشفت يوم أبداً ورايا
بس انت جرت على هوانا
ورسمت قدامي النهاية
وعشت من دونك معذب
والدروب ملَّت خطايا
والسنين من عمري عدت
ولسه متألم برايا
والفؤاد نزفت جروحو
واجتاحت الجوف والحنايا
والغرام الغاب وودع
كانت أسبابو الوشاية
وقصة الحب الحزينة
صارت خلاص ماضي وحكاية

وطواط
03-07-2013, 12:01 AM
في مقارعة الحاضر والماضي
مقارنات لا تنتهي
شريف حمدي كتب رسائله في الحب والحرية
لمن شابوا صور الحب
واعتقلوا الحرية
يا لجدتك وبرتقالتها
ويا لجمال قلبك الواسع
وحبك الكبير
تبا لمن صادروا الحب والحرية
لك الروعة الشريف الشريف



****


كانت جدتي
تأكل البرتقال
وتقيم الطقوس لأكله
كان زمان جدتي مختلفا
كان البرتقال حلوا
وكان الحب صادقا
وكان الكلام عذبا
كان عدم الحب تسول


*****


زماننا هذا غريبا جدا
وحبنا غريبا جدا
وليالينا تمتد إمامنا مثل جثث هامدة
أصبحنا فيه أغراب
نفتش عن بعضنا البعض
نفتش عن مرافئي نرتاح عليها ولا نجد
عن شواطئي دافئة ولا نجد


******


ما بين سفر الشمس
وميلاد القمر
كانت جدتي تمارس طقوس أكل البرتقال
يا ليتنى كنت مثلها
أقيم حفلات البرتقال
وأمارس الحب مثل جدتي
وابصق في وجه الزمن الأغبر
والعن من صادروا منا الحب والحرية


*******


العن سادة زماننا
من خنقوا القمر .. وبعثروا النجوم
من حجبوا المطر من الهطول
من شردوا من ذاكرتنا كل الفصول
ما عاد الخريف ممطرا
ولا الربيع دافئا حالما
ولا صيفنا حارقا ولا شتائنا باردا
عبثوا في تاريخ الفصول
وحرقوا أشجار البرتقال

وطواط
03-07-2013, 12:14 AM
ما عرفت طبعا انزل حاجة لبلقيس
من قبيل بقرا في مشاركاتها وبوستاتها
جاتني فكرة اجيب البوست كلو
لقيتها كتيرة... ممكن نرحل نقعد هناك؟
بلقيس ما عارف اقول ليك شنو والله
ربنا يحفظك

ام صبا
03-07-2013, 12:16 AM
هلا ام صبا نهارك اسعد
وعليك الله وانت جاية جيبي لينا معاك كم لقطة كدا نضوق ونضوّق الجيران
الحاجات المن بيت الكلاوي ديك
انا شادي الحلة دي عشان نقعد نقزقز فوقها كلنا
طيب؟
ما تتأخري




وطواط ما تنسى في سياحتك بين الحروف تمر على مرافئ وفاء قاسم
وشوف الجمال وادينا منه شوية


ما اظن تصدق قولي ليك
لو قلت ليك
من شوقي شيل
لو مرة شوقك لي نِقِص
ستف عيونك بي الكلام
اكسيني من قلبك لِبِس
او شوفني بس
شوف عمري
من دونك خِلِص
يكفيني بس انا كل هواي
وحنين بتحكيهو القِصص
ما قلتا ليك؟

عاشق الترحال
03-07-2013, 11:08 PM
الرائع وطواط ..
لك تحياتي واتمني ان تكون بخير ..
يعلم الله من أجمل البوستات هذا ..
التعمق والتفكر وتفكيك الحروف وإعادة تركيبها
من أصعب الاشياء وإنها لتحتاج صفاء الاجواء
وهدوء النفس ومخيلة واسعة وكل هذا لقد توفر
لديك لذلك نحن بقربك حتي تكتمل اللوحة
التي بداءت معالمها رائعه ..
ودمت بكل الود ...

وطواط
03-08-2013, 03:28 PM
انثى اشعلت ثورتها
وتمرّدت في جنح شوق
وهي تحاول ترتيق جرح
بكل كبرياء
رغم كل المعاناة... والتعب... والهجر
الحاله الأنفعالية في التحدي والأستفهام في (لو بتقدر)
وازنت بين الشوق الحوجة وبين حالة العتاب
تستحق ان يكون بأسمها ديوان الشعر منو القال ليك
دمتي ام صبا ودام بريقك لا ينطفئ



تـــــصــدق بــس

منو القال ليك
منو القال ليك حارجع ليك
تصدق بس
اكون نسيت عذابك لي
ولا سنين هجرك بدون اسباب
ويوم مسخت الدنيا في عيني
اسامحك كيف
اسامحك كيف تعال قول لي
ولو بتقدر
تعال طمني بقربك
وزيل شقاي البي
تعال دوبني حب وحنين
امكن اشواقي ترجع لي
واحن والقاك ياحالم
واحس بالدنيا تضحك لي
تصدق بس

وطواط
03-10-2013, 11:00 AM
كمان وفاء قاسم جاتكم بي حليفتها
والله جد
والله جد جد روعة اكتست هاتيك الحروف
والحكاية الولولت دي عاملة لي وجع في الحته دي
كانما اصبح حال الحكاية كحال صاحبها
يا جماعة الزول الصادق ما محتاج لي حليفة,لكن بتحدد حالة العاشق واي درجة من الوله وصل ليها
وكل القصيدة عبارة تأكيد للصدق في الصدق
حاله التطمين بالعشق التي تمر بها وفاء قاسم التي انجبت قصيدة في منتهى الصدق منتهى الروعة والشفافية
والله جد





والله جدّ

يا إنت يا نــور الوهـــــج
الريدة في عروقي إرتوت
خلت مسارب روحي ضي
وكــــــــــل القــصص
بيك انتهت وفيك ابتدت

والــلــه جــــــــدّ

يا نجم في كبد السما
واتبارت الغيمات وراك
والشمس من نورك كست
انوارا تتوشح رؤاك
خليني جواك استريح
ما المشاوير الطويلة
أتعبت كل السكك
حتى الطريق شايل خطاك
لا استكان بيهو السفر
او حتى ساكت يوم لقاك
ونقنق فتر

واللــــــــــــه جــــــــــدّ

ما الحكايات ولولـــت
والدواخل في دروب ريدك بكت
والــعـجيبــة كـــمـــان
بـــقت فـــي القـصــة
صابرة وما اشتكت
والدنيا مسدولة بستار
راجياك تزح همي السَكَتْ
البيك تباريحو ازدهت

والـلــــــــه جـــــــدّ

حزني اللي فات فكك
رقم عمري الصحيح
خـــــلاه كــــسور
وأنا شـــن بــدور
مـــا الكان زمان
قفل مسامات الهوى
وخــلى الشعور
يصمت فــتور

والــــلــــه جــــــــدّ

وانا في حضورك بزدهي
وألم القلب بيك ينتهي
بوصيك وفي الذمة الوصية
احتوييني عليك عُــمــر
خليني بيك انا احتمي
خليك جواز سفري وعبور
نفرد شراعات السفن
نسرح بعيد نقطع بحور
ونبلل الشوق العقيم
تتبدد احزان الدهور

والــلـــه جـــــــدّ

والــلـــه جـــــــدّ

وفاء قاسم

25/12/2007

وطواط
03-10-2013, 11:56 AM
هذة هي نوار بمسائها الدامغ العشق
تفضح كل مشاعرها بمنتهى الأنوثة ...والجمال
وتتدثر بكل ما يلزم الشوق
يا لمسائك يا سيدة الحرف
دائما ما يجعلني اشعر انني قابل للأشتعال


هذا المساء
وحدى أنا
أبدو خريفية العشق
والشوق
هذا المساء
وحدى أنا أبدو
متقدة نيران وجدي
وحدي هذا المساء
إذا مسني هواك هلوعة
وإذا آلمني شوقك جذوعة
.
.
.
و لا شوفتن تبل الشوق ولا رداً يطمن

وطواط
03-10-2013, 12:14 PM
رجل بحجم الألم
والفرح
يسمو بفخر فوق معاناته
وينضح حنينا
الراحل المقيم كمبلاوي



الالم الذى بنا ، هو أن يتفتق الستر الذي يحيط بإدراكنا ، ولئن استطعنا أن نجعل قلوبنا تهلل دائما للعجائب التى تتكشف لنا كل يوم ، لرئينا أن ألامنا لا تقل روعة عن أفراحنا .

بلقيس
03-12-2013, 12:47 PM
انا واطواط بدخل بى موبايل والنسخ عندى موجود لكن معل يلا انا عاجبنى مقطع لى بلقيس مدشدشنى تتلقاه فى الصفحة الاخيرة حق ضجيج الصمت لى بسطاوى المقطع بقول
اعلنى فيك دولة عشق لابتبتدى لا بنتهى .كدى جيب المقطع كلو سمح

وأتسائل أنا عن سر الجمال فيك،،
لحين إكتشفت أنك ،،
"شايله الوطن جواك نيلو وترابو وارضو"
لهذا كلما إلتصقنا أكثر بالارض،،
إزددنا علواً،،
الكنداكه،،
قدر ليل الغنا الطوّل،،
يشيل احلامو ويتجوّل،،
بقول شكراً عسى ولعّل،،
تشيل مني الحروف ترحل،،
مستفه بالفرح منك ،،
مجرتقه بيك وليك توصّل،،
،،،

بلقيس
03-12-2013, 01:20 PM
متعبة والله يا كنداكة
لكن اقول ليك حاجة؟
المقطع يستاهل

الزولة دي خلتو يعمل اي حاجة
حتى الأعلان عن تأسيس دولة عشق متمردة عن الزمان المطلق
حالة من الغيبوبة كالتي اصابت الكنداكة
الغيبوبة المغيبة للوعي الأدراكي
تركت لنفسها فقط لذة الوعي الحسي
بلقيس لا تأبه بالزمان والحديث وطقوس الأعلان ومراتع التتويج
وانما فقط يملؤها الأحساس
شكرا بلقيس على غيبوبتك اللطيفة ان كنت قد احسستها فعلا
شكرا كنداكة علي التنبيه بمواطن النجوم
وليتها وضعت بعض البصل حتي نجد من يفيقنا

ياصاحب سمو الاحساس،،
الابجيدة هي التى تكتبني،،
تلقي بي عند مفترق النبض،،
وتعيدني فارغة الا من الصمت،،
عجبت حين قال أحدهم عني ذات بوح،،
" أعتقد أنها لاتملك أهلاً ولا مكان للنوم أظنها أسطوره سقطت من أحدى الكتب القديمه"،،،
وها أنت الان تخبرني كم هو مجنون هذا البوح،،
لست أدرى لاي مدى يواصل حرفي الاحمق هذا الهذيان رغماً عني،،
ويجعلني أنثى بهيئات مختلفة في مرايا عاكسه لدواخل ضبابية الملامح،،
وطواط،،
شكراً بحجم السماء وأكثر،،
،،

بلقيس
03-12-2013, 01:46 PM
ما عرفت طبعا انزل حاجة لبلقيس
من قبيل بقرا في مشاركاتها وبوستاتها
جاتني فكرة اجيب البوست كلو
لقيتها كتيرة... ممكن نرحل نقعد هناك؟
بلقيس ما عارف اقول ليك شنو والله
ربنا يحفظك



يالله،،
حين تملؤني الارواح النقية بالـ فرح،،
تجعل أحرفي تحلق بأجنحة من نور،،
تحملني على جناح غيمة غجرية لاتعترف بـ وطن،،
تلقى بي عند أخر حدود الدهشه،، وتتركني هناك وترحل،،
،،،،
وطواط،،،
فخر يجعلني أتطاول زهواً أن أكون من "النخبجيه"،،
وشهادة روح بـ قامتك الادبية قلادة زرقاء تطوق جيد ابجديتي،،
هل أخبرتك قبلاً عن معني " النُخبّه" ؟؟؟
أرواحٌ صافيةٌ تجمعها في الله محبّه،،
لــاتحمل شراً للناس ولايعنيها إلا الصُحبّه،،
نــورٌ يسطع في أعيننا ينجينا من أي مغبّه،،
خــاليةٌ من زيف القول ناضرةٌ بالحُبِ ورطبّه،،
بـــيتٌ يجمعنا ويقينا من جور الايام الصعبّه،،
هــالةُ عشقٍ لاتتعكر فيها نسعى مثل الكعبّه،،
،،،

بلقيس
03-15-2013, 12:26 PM
أُنثى،، بـ طعم كل الاشياء الجميله،،
البوح عندها إسم آخر لـ الدهشه،،
لايسعك إلا أن تسقط عمداً في شرك أبجديتها،،
وفاء قاسم،،
أنيقة الحضور جميلة الكلمه،،


مستعجلة
مارقة منك جاية ليك
شلت الخطاوي الممكنة
ومَرقتَ جاية عليك وليك
ودروبي سايقة الريد غنى
ماشة ليك
دايراك
تضم الريد حنان
حنية تملاها وامان
لو دقّ بس طار الحنين
دقاتو جاتو معجّلة
ودق القليب
لمن طراك
ضرباتو جات
واشواقو غالبو يأجله
عديت معابر
الشوق ضنى
غنيت براي
سر الهوى
وعزفت ليك
وتراً بدندن
حس غنى
مارق عليك
جاييك مُنى
بقدل فرح
شايل خطاي و محّنه
قبال عيوني تمهّله
رقصّت عشم الامنيات
خليتا بيك ميمّنا
تمرق معاي
وتمش عليك
زغرودة ليك
مجلجلة
لوكنت بس خابر العلي
وكتين اكون
مشتاقة ليك
يا سيدي كنت غفرتا لي
ما كنت ضد
وانا كنت فيك اسقي الحنان
اشتل حروف
الريد ورد
وِردكْ اشيلو علي وشم
والبس حروف إسمك عقد
وعيون تشدّ
تمرق عليك
شايلة الحنين
تهواكا جد
مُستعجله
مارقة منك جاية ليك

وفاء قاسم
25 / 10 / 2008
__

يالله عليك،،
،،

وطواط
03-15-2013, 02:12 PM
بلقيس ممكن تنزلي لينا حاجة لبسطاوي
.....
انا لا اقوى على هذا الهوى وحدي
ولو تقدمت لاحترقت ...
من فرط هذا الشجن

ام صبا
03-17-2013, 01:10 AM
اركمانية ياغاليه حتى في احتياجك رائعه


أحتاجك.......

وأعتذر....
عن كل شيء
الا الهوى
لم أجد له عذر......

وأحتاجك بكل ابجديات الشوق
اعترف بها

اعزفها بكل مزمار

اهمسها ضجيج السكون

ارسمها على جبين الافق

أحتاجك.....

كردفاني
03-23-2013, 05:41 PM
وتوات يا جميل.. انت عارف انا مرات بقرا الحاجات الرائعة دي
وبغلبني الرد.. حقيقة روعة وابداع..
التحية لكم جميعاً..

علي التجاني
03-23-2013, 06:39 PM
بوست جميل جدا جدا مافيش احلي من كدا


مازلت تتالق في مساحة النخبة ياوطواط

فلك التحية والاحترام

بسمة
03-26-2013, 12:07 PM
وطواط يا رائع

يا صائد في القمم بدائع

عايزة انبهل فيك

واقعد قريييب منك واتفرج

واشرب من كوز روعتك

وانت بتسطر لاخوتك

جاياك راجعة.....بمزااااج

بس الصبر

وطواط
03-28-2013, 12:44 AM
كردفاني.. بسمة... ود التيجاني
تعالوا شوفوا ود طه الجميل دا
والله يا ود طه غلبنا النقولوا ليك
الراجل دا لمى كل الأنتماءآت الفي الدنيا كلها عشان يلون بيها المحبوبة وبكل انواع العشق
ياخ بالغت معانا والله


وتلوني في خاطري ..
وطن .. وايحاء .. ونيل
وتسربي ..... في داخلي ..
عشقا.. الهيا ..... نبيل
اني .. وهبتك كل عمري
فأمنحيني ..
بضع لحظات .. لعلي
في خبايا العشق .. ادفن غربة الأيام.. والسفر الطويل

وطواط
03-28-2013, 12:49 AM
دايرك يا حبوبة تشرحي لي الكلام دا تاني
قدر ما حاولت ارد ليك ما عرفت



نعشي انا...
كان له مسمار واحد واخير
دققتَه على قلبي
بمخلبين وسندان
سلطعون بحري يجر علقة
مدية هي احزاننا
بيد النسوة اللائي قطعن
قلوبنا من فرط الهفيف
العقيق لبسك حُـله
البحر سجين العشق
والنهر طريح الجدب
في جيدِك طل...
والقرط يتدلى من اعمدة الكهرباء
فالفنار صار ربانا لسفينة...
وبائعا لكنوز
الليل توخى الحذر
فمنك تأتينا احاجي وخرافة
الغول بسكن غابة اهدابِك
والأشباح تتقافذ فوق شرفتك المطلة على البحر...
ونعشي يرقد في خلاء...
وواد سحيق
هكذا اراد قصابي...
أن يغسل نصله بماء البحر
ويخلع ثيابه من رائحتي الغائرة
دمي...
وفحش ثروته بالعشق
قطّـرته لكِ كي يرد شهيتِك في الأفتراس...!!!



فحْش والا فحَش ( لتأكيد المعنى )

ال بلأحمر تما لكن جيت في النهاية لقيتم ما جايين مع ال بالزهر ؟؟؟

ده نظام جرسة من أول سنة بعيد عن الجكس والا فن تشكيلي بالحروف والا !!
فهمني

وطواط
03-28-2013, 01:03 AM
الحاجة دي عاجباني من اخوكم وطواط حسن وطواط


الحزن ...
ذلك الطويل القاتم
اعتاد التسكع مع ثنايا الوجد
وجميلات الحروف
الحزن كائن مرتب
وامير نبيل
اعتاد ان يلازم الوفاء صدقا
ويصادق خيلاء التربع بحب
الحزن عهدناه صديق
يربت فوق اكتاف الشفاف
ويغزل دكنته على اطراف البنفسج
الحزن علمنا ان نخاف...
على احساسنا بالحب...الشجن...
الحزن علمنا كيف نفرح...
كيف نحتفي...
وكيف نودع

ام صبا
03-28-2013, 01:10 AM
الحاجة دي عاجباني من اخوكم وطواط حسن وطواط



ونحنا يعلم الله كل كتاباتك وطواط عاجبانه وعاجزين عن التعليق
او الاضافه لانها اكبر من حروفنا

وطواط
03-28-2013, 01:36 AM
ونحنا يعلم الله كل كتاباتك وطواط عاجبانه وعاجزين عن التعليق
او الاضافه لانها اكبر من حروفنا

حرفك يتاوق من رقراق
يازولة يا واقفة
بين الدهشة والساساق
في شريان الريد والخاطر
تحت المطرة وقولة السيرة
تلفي دواير..
وحامنديرة
وكل دعاش يجيبك لينا
يملا الدنيا افراح واشواق



انا بقول ليك بعد تديني نسختي

سارة عمر
03-28-2013, 09:12 AM
وطواط متألق كالعادة وفي ناس في النخبة دي ابداع يمشي على الارض
تسلم واكيد مستمتعين معاك :thumbup:

وطواط
03-28-2013, 10:13 AM
سارة عمر يا رائعة
شكرا علي زوقك البتحفنا كل يوم
وكدي تعالي شوفي عاشق الترحال دا والله صعبها عديييييييل
ياخ دي همسة تقوم شعر الجلد
الزول دا عندو وردة وقال ليها كلام في اضانها ونحن الأقشعرينا
جميل والله يا عاشق


حلمت باني احملك علي يدي
واهمس في تلك الاذن الصغيره
باني اريد ان اخطفك
اخطفك الي دنيا اخري
والي عالم بعيـــــــــــد
بعيد عن الضوضاء بعيد عن كل الاشياء

وطواط
03-28-2013, 11:05 AM
وهذة حبوبة تهذي
ثم تهدي
حمى الشجن
وهلوسة البعاد
الله يديك زقاق في كل عثرة شجن
ويتم مرادنا
ونلقاك زادنا


حكالي خوفو من البعاد
وخسمني عاد ..
إن الله راد .. كتب لينا الشقا وهم البعاد
حلفني بالأشواق ..
أكون أبدا علي الميعاد
ماك عارفني كيف توّاق .. جميل نضمك عبير نسمك شايلاه زاد
واكيد في الزحمة بلقى زقاق ..
أقيف وانجمَّ أتذكر يُمة ودعوتا:
[ربنا يتم المراد]

وطواط
03-28-2013, 11:29 AM
بت السرف
تحكي روعة اللقاء
تتأمل بعمق
وتدوزن اعصابنا بالنشوة
وتناضل بحب






شفت الريد .. معشعش فى مدار عينيك ..

ولمست الشوق .. مستوطن فى سلام ايديك ..

ومن الوحشة تحكى براااك.. الباقى عليك ..



شلت عشانك ..كوم الريد..

هديت للدنياا ... فرح وأنين ..


وشلت الزاد كمااان اتنين ...

افرااح واترااح ...

ودموع العين..

ام صبا
03-28-2013, 01:33 PM
طلال الحكيم انسان راقي جميل في كتاباته
ورغم مقتدرته في الوصف والكتابه
الا انه ما قدر يوصف ويعبر عن الحنان
لانه اكبر واعمق من الوصف



كم وصفت للناس فيضان حنانك
بس وين يكون موجك
من ضعيف وصفي
يا صادقة الغرام
مهما قلت فيك أجمل كلام
ما ظنيتو كان يكفي

وطواط
03-29-2013, 12:22 AM
هذا هو صديقي عادل ود الخضر لمن فاتهم لقاء هذا الجمال




الموجة الثائرة
تبتلع لسانها
في لحظة حوار
مع ذاتها الضئيلة
وحلمها الذكي
الساقط تواً من قبعة الموت
ــــــــــــــــــــــــــــــــــــــــــــــــــ ــــــــــــــــ
عادل

وطواط
03-29-2013, 12:28 AM
ابرهيم العمدة في وصف حي
وبوح يعصف دواخلنا بالتصفيق
شكرا جميلا يا عمدة






لو طفتوا الكون وإخترتوا زوله مكمله
لو حتي كان نزلتوا نجمه زاهيه مجمله
لو جات من السماء الحوريه ذاتا منزله
قلبي لا يمكن يبدل لي ريد حبيبه مؤصله
************

************
عن ست البنات ست الحسان ست الحلا
أحكي ليكم قصه وأجمل روايه مفصلا
هي الرزينه الطول حياتي قلبي كان بتخيلا
شفتها ألف مره وكانت معاي قبال عيوني تحصلا
************

************
يوم لقيتا كانت دنيتي ضلمه مليله
شفتها نور وكان نورا شمعه مشعلله
من يوما داك هويتا وصرت بيها موله
وياربي تحفظا لي تصونا من الألم والعله
************

************
زينة الفريق زينة بنات الحله
كان جات في الطريق أو حتي طلت طله
تنقذ زول غريق من الغرق والبله
بي صوتا الرقيق تمد إيدا وتقول بسم الله
************

************
عيونا عيون الريل وكتين تجيك مندله
خدودا دهب عديل لامن تشوفا قبله
رموشا رموش حرير تحلف تقول دي مظله
ويا سلام لو شفتوا إيدا أجمل حاجه ناقصه الدبله
************

************
ست بنات حواء لو مره جات مترجلا
تلقاها قادله علي الأرض ترفع خطاها تبدلا
إن مالت يمين معاها الدنيا تميلا
وإن مالت شمال حتي الغزاله تغازلا
************

************
إن شافا بشر يتمني لو يقدر يشوفا يومي يقابلا
وإن شافا ملاك من السماء لازم يجيها يواصلا
وإن شافا شجر بي كل فروعوا يحتويها يضللا
وإن شافا حجر يتمني ينطق ليها ريدتو يوصلا
************

************
إنتي نخله أعلي من كل الملأ
وإنتي نسمه لطيفه ماره علي الفلا
وإنتي بسمه جميله ماليه الكون حلا
وإنتي ورده عبير رحيقا مجملا

وطواط
03-29-2013, 12:37 AM
وضاحة
الجميلة كنغم
الواضحة كشمس صيفها
ابجديتها مرتبة
كما للحزن طقس عندها
سطرت اروع ما يكون من حزن صامت
ببوح شفيف



عندما يكتنفني الحزن؟؟
ولا زلت أعتزم الصمت...

منذ سنين مضت
سأنصهر بالصمت و للصمت ...
و الرحيل ...من هنا
فقط ما زلت حلماً جميلاً يداعب الواقع بحضوره الشهي. . .
تغسل كل وجعي بهمسة حانية هادرة.
وكم تتعبني صباحاتي القلقة حين لا أملك إلا الاشتياق لكَ ، وحين تخذلني لحظاتي الدامعة في استحضارك

وطواط
03-29-2013, 12:44 AM
الوسيم القلبي رادو
ومالو زي طول بعادو
نفتقدك بشدة
علا ما بنقدر نلومك بعد لومك دا




( اللـــــــــــــــــــوم عــــــــــشم)


الزواج مقدر وصح نصيب وانا برضي قبلان باالقسم
الا في لحظة فـــــــراقك ياغالية عقلي انا اتوهــــم




لحظة فراقك كان صعيبة في جوفي غاصت زي سهم
وكان العتاب من غير شعور في قولي طــــاوعني القلم




كوني الومك في كلامي احساس حــبيب فيك اتظلم
عمرو الملام ما كان جــفا مـا اصلو قالو اللوم عــــشم




الغدر وكــتين فـــــرقـــــنا مـــا حــــنا مـــرة ولا رحــــم
ما قدر احساسنا الـدفين لا حتي عــــــــدا سنينا كــم




سهران بحسب في النجوم والنوم حــــرام يبقالي سم
قــبال اقــــول ليك الــــوداع تاهت خيول افكـاري هـــم




انشاءالله تسعدي في دناك لاتشوفي شينة ولا عــــدم
خليني لي همي وشقـــاي في الدنيا اصــــــــارع للالم

وطواط
03-29-2013, 12:53 AM
مترع انا بك دمهشري
وانت تطوف بنا عبر دوخلك الخريفية
ولحنك الشجئ
عزرا
نحن من سننزوي ونتوارى
في ركن من خلاياك ونتكئ



عفواً.....

وجدتك في كل الخلايا متكئي
وانا انزوي ...
اقتات فتات الذكريات
في ركن قصي وانا انزوي....

عذراً

جهرتني بنور طيفك يا ملاك
وانا قد اعتدت الظلام
فليكن.........

لاتنطفئي

فانا أدمنت طيفك في المساء...........
عند انسراب الروح الي جسد السماء...........
والكون امسي لوحة رمزية به كل الثناء......

زرقاء تسدل شعرهاعلي الجبين
وتمسه بيمينها علي إستحاء
والنجم طرز جيدها وأولاه البهاء
وانا مابين الترقب لهفه ومابين الصبرعلي البلاء
انزوي

لاتنطفيء


كن حريقاً واشتعل اوسق من الشوارد ماتشاء
لا تقف واصل عبورك الي كل المدائن حاملا
ناقوسا وعطرا...... بازلا
كل النفائس والدرر


فانا بغير طيفك لا أري
أملي طفلا مازال مراهقاً يحبو
جنين في رحم الامنيات.........
خذني إليك........لارتوي




مازلت ظمآناً لخمر الوصل عندك والانشراق
مازلت اشكو اليك من فرط الاشتياق
ادرج لي التفاصيل وخذ كل الزبد
وارتق وصوب سلوك الانشقاق

لم تشرق الامآل يوما واقعا
و لم يلد الامل عندي واضعا
لجنين الانتماء
لاتنطفيء
كن كما انت واحترف العطاء

حبوبة
03-30-2013, 02:51 AM
زولا من هو شافع


نجمو ساطع


برقو شالع


من الأول هو الأول وعامل فيها تابع !!


في 2006 حسبما قرأنا شاكوش جميل أطلق العنان للقريحة عندو وشدا كروان الليل {وطواط}

شكراً لأنك خنتني

وهجرتني...
وقتلتني ليلاً...
وصبحي جاء مختلجاً اليك ومنثني
فذبحتني...
ونثرت اعضائي على جيف الطريق
شكراً لأنك قد ذهبت مع صديق
أو فلنقل...عذراً ...عشيق

حبوبة
03-30-2013, 03:02 AM
اول شي...

اول هام...
اولاً بالتبادي
اول.. واول
حقو تعرفي
انت الأول
وما مفروض
اصلاً ترضي
ومن الأول...
يا قبل الأول
وبعد الطيش
في الحد الفاصل
بعد الأبد
جواي بتعيش
كل انفاسك
في جذع تبلدي
مسكون انا بيك
غرقان درويش
وفقير مجنون
كتفني الخاطر
وجالداني الوِردي



كلام ونسة عادي صاح .. سلاسة ماها سلاسة نصاح لعب بالمفردة بالطريقة الصاح يسكت شهرزاد عن الكلام المباح
صحيح إنك بتهمس بس تكنو صياح .. يا زول ما صاح بشويش علينا ..


استخدامك للمفردة هنا عجيييب ياود ابراهيم .. يسلم يراعك

حبوبة
04-06-2013, 03:22 PM
دايرك يا حبوبة تشرحي لي الكلام دا تاني
قدر ما حاولت ارد ليك ما عرفت
[/SIZE][/COLOR]

ما خلاص .. اتفقنا انو لحظة الكتابة استثنائية وفهم النص مسئولية القارئ ..
وكلٌ يفهم ع حسب تجاربو

اركمانيه
04-13-2013, 12:48 AM
كما درويش فى حلقة
تدوزن به حتى انفلات
خيوط الجاذبية
حين يرتحل إلى
براح اوسع
من ضيق الوساع


سوف أنتظر
الى ان تمارس
الجاذبية طقوسها
ونعود ادراجنا

وطواط
04-29-2013, 02:42 PM
جبر الدار ابدع في وصف الجمال السوداني
والثوب السوداني
حواء السودان

مسكين يا غشيم المتلك ما بعرف اوصافه
السودانيه عفه وحشمه و زوق وتوبا قيافه
السودانيه عز .....جمال وادب معاهو ظرافه
ما بيكفينى كل مداد الدنيا لو اردت بس انصافه
................
مسكين يا عاشق المساحيق ولمعة الكضابا
البلوزه والبنطلون الضيق ..اريتو لبس التابا
مكشوفه للبيعاين واضحات حتى معالم .....
دى الما معروف اصلها ..غاشّاك موية رهابا
...............
اسمع يا غشيم كفاك سخافا
واوزن كلامك خلى فيهو حصافا
السودانيه ريحتا حاشا ما بتتعافا
دى المعروف عطورها طلحّا وشافا
..............
اه يا غشيم انت وقعت ما سميت
واتوهدبت دابك وفكيتو راس الخيت
السودانيه تكرم ذويك حتى ان ما جيت
وزولتك باكر نسمع حرّمت ناس ابوك البيت
............
حقيقه ...السودانيه انت لا بدورك ولاكا نباها
تدور راجل الستره...... ...تدورو يبقى كساها
تدور راجلا زى ابوها.... .بعطفو وحنانو يتولاها
وتدور راجلا كلس فى قومو ..ما بتدور اشباها
...............
اسكت يا غشيم الليله توّر جنى
ولبانك البتلوك فيهو ....دا المجننى
السودانيه عاجبانا نقول فيها كمان ونغنى
وعليك الله شن ناقصك منها غير تسوى الحنّى

وطواط
08-29-2013, 04:25 PM
دا نص للجراري

[1:35:08 am] أميرة النيل: مابسامح

يا الكلامك كلو جارح
يا البصارحك وما بتصارح
كم قعدت معاك احكي
بكل مشاعري وانت سارح
______________
كان ظني فيك انك بتجمع
في كلامي الريدو واضح
الا خاب الظن في تيهك
ماكان بتجمع كنت طارح
______________
وكنت عن الحب بقول ليك
وانت بتقول في المصالح
ماخفت تخسر زول بريدك
يا الهواك في عمقو طافح
______________
وطيفك الشال كل زمانو
كان بماسيهو وبصابح
سبتو فت تشوف مصالحك
وجيتو راجع دون مصالح
______________
بعدما داويت جراحي
جاي تتعذر يافالح
اني اغفر ليك واسامحك
ما بسامح ما بسامح

دا نص للجراري

وطواط
08-29-2013, 04:28 PM
والعجبني اكتر النقد والقراءة الحظى بيها نص الجراري من اختنا الواثقة


مساء الخير الجراري

بداية من هي ( أميرة النيل )

اقصد هل هي كاتبة القصيدة ؟

وان كانت ... وان كنت انت

فهي قصيدة جميلة
امتزج فيها احساس خيبة الامل بحب محتضر
طغت المصالح على شكله الظاهر حتى فقد رغبته في التسامح الذي هو من شيم المحبين
عدم الوضوح من قبل من نحب وعدم الصراحة يفقدنا الثقة فيه وفي انفسنا
وغالبا نشعر بانه لا يحس بمقدار حبنا له مما يؤدي لانحسار مشاعرنا بعيدا


من حيث القافية
موفقة , موزونة لحد مناسب
واضحة , سهلة المفردة



اقعد عافية
مافي كلام

شفق
08-29-2013, 05:16 PM
يا وطواط بالله عليك لا تكتب شيئا

اتعبتني القراءة في هذا المنتدى

ففيه الكثير الجميل المبدع ومنذ دخلت وانا

اسرق وقتي فقط لاقرا ولم انتهي بعد

كم هو جميل الاحاسيس هنا وكم هي جميلة اقلامكم

وكم تتلون احاسيسكم المرهفة

يبدوا اني ساترك كل الديار واسكن هنا

فما زال هناك الكثير الكثير لاقرا

ولا استطيع سوى ان اقول لكم شكرا وشكرا

الواثقة بالله
08-29-2013, 08:39 PM
وطواط

مساءك موشح بالفرح

بوست يجب ان نطلق عليه /صيد الفوائد من أقلام الأعضاء


تحية لك مني
ومؤكد عودتي باذن الله

أم إباء
08-30-2013, 01:43 AM
http://sudanelite.com/vb/mwaextraedit6/extra/15.gif







وطواط يا بحر لا تدع البريق يخبو وأنت تستطيع أن تعكس تلألؤه هنا:smilie14: