المساعد الشخصي الرقمي

مشاهدة النسخة كاملة : بيني وسكاتك ودهشتك



خالد علوني
07-09-2012, 10:42 AM
بيني وسكاتك ودهشتك
واقف انا
بسال عليك وانا عارف انك مني
زي كل الشهب مامارقه من تالاه سماي
بتطلي مني كما الحزن
وتسكني قلبي كما النسيم
وانا بيني بينك كم سؤال
عن ظلمه الليل وكت اغيب
او انتي فيني تغيبي
كل المسامات والصدف
اسال عليك وانا عارف انك مني هم
حبة دموع مرميه في وش
الفرح نجمات تسهر ليلي
وقت افقد ملامحك وانتحب
والقاك حضور
زي كل مواسم الارتحال
بتمدي ايدك لي عشم
واصحاك يا حلمي الجميل
اغشاك ياوجع المسافات والدروب
اتمسي بي صبحك صباح
واصبح علي ليلك مسا
وارسم بدل وجهك خيال
واقف بنقر في الحصي
وانا اصلي جيتك
قبل ميلاد الفرح
املت تبقيلي النهار
او تبقي ميلاد الهموم
املت فيك قدر الحزن
ماعدي فيني وغيبك
قدر المسافه
البين خطاي وسكتك
ووقفت انادي عليك زمن
تاريني انادي فقسوتك
يا مارقه مني ملاك ونور
وداخلاني اوجاع تشتبك
مع كل مساحات الفرح
الطايره منك شان ترك
وياباب متاكا علي الشمس
ابقيلي منك ضل ضحي
غتيني من ريحه الشرود
ما تبقي لي جنه ورحا
انا فيك
زي كل المهاجرين في الضباب
ماسكين حبال الظار حجا
ومادين علي النيل مشرعين
واقفين قبالك في رجا
وراجين شروق شمسك عصير
شان تبقي مقطوعة رجا
وانا زيي زيهم اتلهيت
بي حكمه منسية سنين
محبوسه في ساقيه جحا
مطحونه زي كل الكلام الفيني ليك
وممدوده فيني عروش مستفه بالاسي
مديت عليها القول ركاب
شان ابقي منك
زي مسافه ما يحس الماشي
بي وجع التراب
او زي مسافه خوفي
من وهجك يغيب
وانا ياسكنتك زي شعاع القمرا
ياضلت خطاي نورسكتك
وانا ياعشقتك زي مواعيدك معاي
ياقلت احسن اعشقك
وانا يا بكيت وبكت معاي
كل الرمال الانه من طول وقفتك
يا بكيتي انتي براك
مباخر الكلمه لما تشد
خيوط النار
علي كل المسامات البتفضح سكتتك
وانا ما بقيف من تاني واستناك
يا منسوبه لي حلال عشان اتفقدك
يا سقت منك خطوتي
يا جيت عديل متوجهك

جبر الدار محمد جبر الدار
07-09-2012, 12:49 PM
خالد علونى
متعك الله بالصحه والعافيه
فى انتظار المزيد
من الدرر

عاشق الترحال
07-09-2012, 06:07 PM
وهكذا عهدناك يا علوني ،،دائماً تاتي لنا بالروائع يارائع ..
يا اخوي اعناها عديييييييل واتوجها ماتسوق خطاويك وترحل في عز الضحا ..
تسلم يا حبيب وفي انتظار المزيد يا رائع .ودمت بكل الود والاشواق ..

ام صبا
07-10-2012, 10:17 AM
خالد طابت اوقاتك

بوح جميل ومفردات رائعه وابداع وابقى واصل

خالد علوني
07-10-2012, 01:06 PM
خالد علونى
متعك الله بالصحه والعافيه
فى انتظار المزيد
من الدرر

أستاذي جبر الدار ...
سعيد أنا حد الثمالة بك ....
كن بالقرب دوماً فنحن بكم نسمو .....

خالد علوني
07-10-2012, 01:09 PM
وهكذا عهدناك يا علوني ،،دائماً تاتي لنا بالروائع يارائع ..
يا اخوي اعناها عديييييييل واتوجها ماتسوق خطاويك وترحل في عز الضحا ..
تسلم يا حبيب وفي انتظار المزيد يا رائع .ودمت بكل الود والاشواق ..

عاشق يا جميل المحيا ...
انا زاتي قلت اعناها إلا خايف من عيونا ....
............
وكن انت دوماً كما تود

خالد علوني
07-10-2012, 01:14 PM
خالد طابت اوقاتك

بوح جميل ومفردات رائعه وابداع وابقى واصل

أم صبا ...

نهارك رضا

مشكورة علي المرور الأنيق ...


لغتنا العامية جميلة جداً .. ومفرداتا حلوة ....





كوني دوماً بكل الخير

حبوبة
07-13-2012, 04:25 PM
بيني وسكاتك ودهشتك
واقف انا

يا مارقه مني ملاك ونور
وداخلاني اوجاع تشتبك


بس قول لي من وين أبتديك هسع ؟
المشاعر البين سطورك تخلع ..
حرفاً بسيط سويت منو البدع
كلَماً عديل نقّط من فاهك وجع
حرفي في حضورك عني امتنع ..