المساعد الشخصي الرقمي

مشاهدة النسخة كاملة : 9مشاهد من حياتي اليوميه..



وليدادريس
02-03-2009, 02:10 PM
مشهد اول..

الصباح يرسل اشعته.......تغتسل من هموم يوم مضي لتستقبل يوم جديد......ومع تساقط المياه البارده فوق جسدي.....تجول بمخيلتي احداث اليوم السابق...9حالات من السل...11حاله ايدز...27 ملاريا..صوت صراخ...صرير النقالات...رائحه الكلوركس....وسماعه الموبايل في اذنيك...fm95تعلن في اخبارها...(وزاره الصحه تؤكد خلو البلاد من الحمي النزفيه..ودحر الايدز والملاريا.....وقلت نسبه الوفيات...)تبتسم فقط.......

مشهد تاني.......

تقف دقائق ..عربي عربي استاد.....ميه تاني ...طالب...ورينا البطاقه ...مابوريك...توريني...السواق نمشي القسم...وبكل برود انزل اتم الباقي كداري....والحافله ماذالت مشتعله....

مشهد تالت......

في مدخل السوق....يتعلق فيك شافع صغير....ربنا يدينا ويديك...معلم الله ...ياخي فكني.......فايتنك بالصبر...وينتهي النقاش بوعد هذا الصبي ..واقناعه بأن وزاره الصحه حتصرفنا شهر 7وحاجي اديك بدل ميه الف جنيه......

مشهد رابع....
المواصلات مذدحمه..........وووووووووووووو ب علي ..صرخه اطلقتها طالبه جامعيه..في شنو..؟؟...وبدون تجاوبك من منظر الشنطه المفتوحه.تعرف.......موبايلها اتنشل.....واتنسف شعار..(الشرطه في خدمه الشعب..الشرطه عين ساهره..)....

مشهد خامس....

النبق الفارسي ...سم الفار ...زاهي للقحه والنزله..تحويل رصيد...التفاح ..المعجون...3فنايل بي 5الف...و.....والجرجير الصابون...صباع امير 3بي الف.....بسم الله نفر واحد بس فارش سوق مركزي كامل قدامو...سبحان الله...

مشهد سادس...

وفي انتظار الحافله....نظرت يمينا حائط مكسور..بجانبه اخصائي عرديب ..خلف الحائط كتبت عباره ممنوع ال...
وبجوارها مجموعه من الشماسه وكل يحمل قماشه في فمه.....نظرت شمالا في نفس الحائط اعلان ورقي لحفل خيري لصالح اطفال غزه يحييه الفنانون..نجاه غرزه.. ايمن الربع.. حماده بت ..اميمه علب....وهتفت بداخلي عاشت القضيه الفلسطينيه....

مشهد سابع....

بجوار الموقف مصلي صغير....علبه الكريستال مويه للوضوء بميتين جنيه...حلقه من مجموعه من الشيوخ يتناقشون ويحتدون في النقاش ...موضوعه..الجنه فيها جرجير واللا مافيها..واكل الباسطه بقطع الوضوء واللا مابقطع...ويحتد النقاش...وتسللت بعيدا..متجها علي الكافتريا..

مشهد تامن....

كافتريا الاستاد..اديني سندوتش طعميه وكولا...طيب خلي الكولا ..تذكرت اعلان بمنتدي يدعو لمقاطعه الكولا...
وفي ركن قصي من الكافتريا..لمحت شاب وشابه ..ودار بينهم الحوار التالي..ياسوسن انابحبك...ياعماد عارفااااااااك..بس لي متين...سوسن انتي عارفه انابس باقي لي الخدمه الالزاميه وبعديها بشتغل ..يعني ياسوسن انتي انتظرتي..6سنه غلبك تنتظريني 4سنه تاني..طيب اقوليك خلاص نأجل احلامنا دي..وتنهار احلام سوسن..

مشهد تاسع..

داخل الحافله...ممكن تديني الجريده اتصفحها...؟..وراغو عمرو اكبر من 20سنه...طمبل ماسوره ..ماماسوره...
ويميني طالبتين من الثانوي...والله تامر حسني احلي من مهند...لالا مااحلي..رموش مهند احلي ..و...واستغفر الله....
انا بشيل الصرفه الجايه...تاني بخيته دي مابدخل معاها في صندوق....

.وانتبهت للكمساري.بانت ..صيدليه الاربعين...في واحد نازل...طق طق طق..
وصمت بره....وابتسمت.... .

Abdelazim
02-03-2009, 02:56 PM
مشاهد جميلة شديد

الاصيل
02-05-2009, 03:13 AM
وليد سلام
اعجبتني مشاهدك
وجعلتني اضحك كثيرا
لكن ناس حمادة بت احسن من غيرهم ليس في مقدورهم شي سوي الصوت وغيرهم من الدمي لا صوت ولا حس لهم
ودمت

Rahal
02-05-2009, 12:57 PM
يا زووووووول إنت كنت وين ؟؟ يا لهذا الجمال

كلام سر:
عليك الله ما تطول

وليدادريس
02-05-2009, 01:35 PM
العزيز عبدالعظيم...الاصيل..الرحال.واحبتي بالنخبه. انها تراجيديا المتضادات في بلدي......انها واقع يعيشه كل سوداني.......الحافلات اصبحت برلمانات متحركه.......ضاقت افق النقاش...........اصبحنا نهتم بالهوامش والصغائر.........ضاعت معايير الصدق......تغيرت المفاهيم..نجاه غرزه..تدعم غزه..زيف في كل شئ....اصبح الحب لم استطاع اليه سبيلا.....تعلقت بالصمت فقط........لكن لن يصمت قلمي....ليكم التجله اهلي في النخبه.....

وليدادريس
09-29-2009, 02:15 PM
احكي ليك يا طيبة حكوة
ذات زمان من ضيق وقسوة
وكل يوم من بارحو اسوأ
والمراحات قاطي قطْ
فجأة في قلب السماء ... غيمة غيمتين .. غيم ربطْ
كتمة حتى الطين عِرِقْ
والشجر قرب يَبِقْ
إلا يا طيبة الخَلِقْ ... من بدل تفرح تَنِقْ
الشِّكايات ... السخط .. لا السُّحب دارت تَصُبْ
لا الهبوب داير تَهُبْ
نسمة نسمة آ رب هبوبكْ
من شمالك من جنوبكْ
الهبوب يا رب هبوبكْ
من شروقك من غروبكْ
من تحت من فوق هبوبكْ
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خش آ حول في حول ...
ظاهر الحال ماهو مخفي ....... وقولنا فيك ما فيهو قول
نسمة كل راس ساعة تكفي ....... نسمة واحدة لألف زول
ينطلي الجو بالَحمَارْ
فجأة من حر لي غبارْ
الطشاشات الدّوارْ
السبابات النِّقارْ
نقة الضيق تنطلقْ
قلنا فاقت باتت أزحمْ ...
الغبار من كتمة أرحمْ ...
أرحم الحر البيلحم ... لا ده لا ده ولا فرق
طيبة تمي الحكوة قولي
الصّبرُ خلقوهو هولي
الزمن يقسى ويَرِقْ .. وانتي يا كتمات تطولي
اليطول بال الخلق .. طَرِّقْ الغنوات يا زولي
عدّ فات الريح شَرِقْ من بعد ما جاب سحاب
من بعد قشّ التراب ... مشط القش والشجر
رجّع الطير للوكرْ
ها البرق شال البرق .. الرعد ريحة الدعاش
ابشروا بالخير نقطت أي والله المطر

فاطمة ميرغني
09-29-2009, 02:31 PM
الاخ د. وليد .. سلامات .. يومياتك رائعة .. متناقضات بلادي .. كل ضد الاخر ونجاة غرزة تدعم غزة .. والخرطوم تغرق في شبر موية ياوليد ما شفت المطرة عملت شنو في شوارع الخرطوم ..
تخريمة: تاني ما تغيب سمح؟

وليدادريس
09-29-2009, 03:15 PM
الاخ د. وليد .. سلامات .. يومياتك رائعة .. متناقضات بلادي .. كل ضد الاخر ونجاة غرزة تدعم غزة .. والخرطوم تغرق في شبر موية ياوليد ما شفت المطرة عملت شنو في شوارع الخرطوم ..
تخريمة: تاني ما تغيب سمح؟
لا لا تاني مابغيب ايتها الكريمه بت ميرغني فقد طاب المقام بينكم
والمطره ومسلسلها ويامطره صبي صبي ووزكريات كتاب المطالعه بتاع محي الدين صابر الله يرحمو
ووالوالي في عز الامطار يتفقد الاحوال بطائره هيلكوبتر ومسؤول اخر يصرح الوضع تحت السيطره تماما والارواح البريئه تزهق تحت الحوائط وداخل الابار .والوضع تحت السيطره تماما تماما..
نفق عفراء او كبري عفراء اضخم نفق داخل ولايه الخرطوم افتتح في العام 2008 ..تخيلو المهندس نسي ان يعمل تصريف..نسي ان في فصل اسمو الخريف..وكاد هذا النفق ان يتسبب في كارثه انسانيه الالفيه الثالثه ونفق مافيهو تصريف..يتصرف بالتناكر..سبحان الله
وتكوين لجنه الطوارئ..ولجنه الطوارئ تنبثق وتكون لجنه السيول ..وو..لجنه المراه ..ولجنه انقاذ المتضررين ..وشيخ كمال وشيخ ابراهيم ..يتشاكلو في البرأس اللجنه ..اصلو شيخ ابراهيم شغال ببني في عماره ومحتاج لخيم الكويت ..وشيخ كمال يستلم اعانه سمو الشيخ زايد..ونتاجر بالقضيه ..ونتسول بالظرف
والمطره شغاله وقوات الدفاع المدني تنتشل الجثث ..طيب ماكان يسموها قوات الانتشال المدني..
وبرضو يامطره صبي صبي ..فوق راسنا
لك تحياتي واحترامي فاطمه ميرغني والجاتكم من مطرتكم سامحتكم .

الدمهشري
10-16-2009, 10:40 PM
د. وليد تحيه بقامة الكلمات حين ترسم البسمه في وجه المعاناه وتحيل التراجيديا موقف يبكي ضحكا
مشاهد متكرره تمر بنا كل يوم ولكنك بإحسسك أرايتها لنا فلكانما اول مره تمر علي
تحيه حتي الارتواء
قف:
وين باقي المشاهد

المرهف
12-31-2009, 06:41 PM
وجدت خطوتـــي...عند حروفك..

اسعدنــي تعبي الذي اعانيــه باستمرار..

جميل ذلك التعبير

أم إباء
02-16-2010, 12:04 PM
بسم الله الرحمن الرحيم الله ما أحلاه من تصوير لمشاهد واقعية وماإصدق الكلامات عندما تلامس القلوب!!دمت بخير وعافية وليد إدريس