المساعد الشخصي الرقمي

مشاهدة النسخة كاملة : العودة للسودان الحبيب



كورينا
07-28-2008, 01:41 PM
أخوكم مغترب
والله عشت خارج السودان (في دولة عربية) مدة طويلة جدا وعايز اعود بس كل الناس القريبين بيقول لسة الوقت ما مناسب ممكن تشاركوني في المحنة دي ؟؟؟؟؟؟

Abdelazim
07-28-2008, 01:47 PM
أخوكم مغترب
والله عشت خارج السودان (في دولة عربية) مدة طويلة جدا وعايز اعود بس كل الناس القريبين بيقول لسة الوقت ما مناسب ممكن تشاركوني في المحنة دي ؟؟؟؟؟؟


محنة شنو ولا محنة ولا حاجة بس قوي قلبك

MeGaN
07-28-2008, 02:24 PM
كورينا ومن سار رداً على كورينا السلام عليكم ورحمة الله ..

وتحية وتحيات ..

أولاً نسأل الله أن يرد غربتكم والطيور المهاجرة أجمعين ..

الغربه وما أدراك ما الغربة ..

أهلنا الكبار بقولوا الطولة فيها الهُولة .. كلام بسيط وعميق في ذات الوقت ..

الغربة قدر وما قُدر لك لا أحسب أنه سيُخطئك ..
وإنت يا أخوي ضِمناً وصلت حد مفهوم كلام كُبارنا طولت وإتهولت وإستشرت وما خاب من إستشار ولكن ليس في كل الأحوال ..!

سؤال أتمنى أن تسوقه لمستشاريك إن جاز لي القول ..
لماذا الغربة ..؟ بإعتبار أنهم دعوك لتكون فيها ..
وفنط أنت بنفسك هذا السؤال .. ومؤكد ما سوف تتوصل إليه سيكون دافعاً للعودة حبواً في وقت توافرت فيه كل مقومات الوصول .. الوطن يا صاحبي ليس مجرد كلمة نقولها الوطن أمن وأمان الوطن لؤلؤة بحرها عميق وسرها أعمق .. الوطن طمأنينة وهدأة نفس رُغم الإحن والمحن الوطن (ناي) لا يجيد العزف عليه إلا من كان فيه .. وفوق ذلك حدق العين سكن لك ياوطن ..

كورينا أعذرني للإطالة والثرثرة وتعال إلينا هلمّ نستنطق الوطن وناس الوطن وتراب الوطن لماذا هاجرنا أو لماذا هُجرنا .. ولماذا فقدنا الدفء في حضنك وأنت وطن تمرد علي كل مساحات العالم ورُغم هذا التمرد ضاقت بنا بقاعك بما رحبت ؟!.. وحتماً سيستنطقنا الوطن لماذا كل هذا البعد وأنا مازلت ذلك الوطن وبذات الحجم ..

كورينا يا أخوي أرجع أرجع ديارك حلوه أرجع ليها ..
وليل الغربة ما بيرحم ..

وليست هُنالك مِحنة أكبر من الإنسان ..

دعك من الذين قالوا وأحزم أمتعتك وهلم هلم أقبل ..

ودمتم وطن عامر خير وجمال ..

كورينا
07-29-2008, 12:34 PM
هو دا اكلام الفيه الفائدة ...
بس الحساب غير كدة. الواحد يسافر للوطن الحبيب وكله امل يلقاه تمام ويستقر. يلقي الناس تقول كلام تاني ...
والله حاجة تحير
والمشكلة مش الواحد ونفسة وبس كتير من الناس محتاجين للعون والعون معناه لازم تكون بره.

MeGaN
07-29-2008, 02:25 PM
هو دا اكلام الفيه الفائدة ...
بس الحساب غير كدة. الواحد يسافر للوطن الحبيب وكله امل يلقاه تمام ويستقر. يلقي الناس تقول كلام تاني ...
والله حاجة تحير
والمشكلة مش الواحد ونفسة وبس كتير من الناس محتاجين للعون والعون معناه لازم تكون بره.


أري أنك تهتم كثيراً لكلام الناس .. ولأن الأمر كذلك سر في طريقهم .!

تفسيرك للعون دعوة صريحة بأن تكون بره :

بناءً على ما تقول أنصحك بأن تكون حيث أنت ..!!!

وربنا يعينك لعون الآخرين ..

كورينا
07-29-2008, 02:42 PM
أخي megan القصة ما هي كلام الناس وبس المشكلة الكبرى ان الدنيا هناك بقت مختلفة الناس ما هم الناس والدنيا بقت دنيا تانية .
السوق مختلف والناس مختلفة اقص الاخلاقيات بقت حاج تانية غير المنعرفها محل ما تروح يعرفوك مغترب مهما عملت وهاك يا استهبال ما تعرف تتعامل معاهم خاص في البيع والشراء

MeGaN
07-29-2008, 03:07 PM
دي حقيقه .. ورغم ذلك ترانا قاعدين في السودان ..

إنت بس كان علي دي لما تمش تشتري أو تبيع سوق معاك زول ..

وربنا يهون عليك إنت البعيد ونحن القراب .. والبلد بي خيرها ..

عادل القاسم
07-31-2008, 03:38 PM
يازول ارجع..... بلادك حلوة ارجع ليها
والله كلام الناس مابريح ومن اشتغل بالناس مات هما
الغربة تربة.....
والرازق في الغربة رازق في السودان وفي اي مكان
وخليها علي الله
وصلي علي الحبيب

wdballa
08-07-2008, 09:51 AM
كورينا سلام
اديك نصيحه لله اوعك ترجع الناس ديل بضللو فيك احسن ليك ابق محل ما انت والله بعدين تندم انت مفكر الحكاية شنو والله بقت صعبه جدا في ناس خاماها وما جايبه خبر وفي ناس والله ما لاقية حق التمباك بعدين ح يضحكو فيك ساكنت:8_4_126:

Abdelazim
08-07-2008, 11:17 AM
يا ود بلة كلامك دا خطير
يعني اجازة ساي ما نجي والا شنو

wdballa
08-07-2008, 11:55 AM
ود بله من الزهج والقرف كد الحلة ويوم عرسو جات الكتاحة اكان عايز تعمل ذيو تعال وح تسوف براك والسعيد يشوف في غيرو والشقي يشوف في نفسو:36_7_19:

كورينا
08-09-2008, 02:59 PM
من النكت الظريف عن الموضوع دا:
واحد من المغتربين طول جدا لم بقى يضربوا بيه المثل. فجاء بدأ يفكر في العودة وظبط امور وقال هو خلاص رايح بلا عودة.
بعد مدة رجع . الناس سالوه شنو الحكاية ما قلت انك ماراجع ثاني ؟؟
قال والله وصلت هناك لقيت الناس شايلة سنطها وخارج لدول الخليج انا عوير اقعد والناس خارجة:7_2_207:

Abdelazim
08-09-2008, 03:18 PM
من النكت الظريف عن الموضوع دا:
واحد من المغتربين طول جدا لم بقى يضربوا بيه المثل. فجاء بدأ يفكر في العودة وظبط امور وقال هو خلاص رايح بلا عودة.
بعد مدة رجع . الناس سالوه شنو الحكاية ما قلت انك ماراجع ثاني ؟؟
قال والله وصلت هناك لقيت الناس شايلة سنطها وخارج لدول الخليج انا عوير اقعد والناس خارجة:7_2_207:

كورينا يا أخوي انت والله شكلك متضايق
أحسن ليك تمشي اجازة وتجي

كورينا
08-09-2008, 11:39 PM
عزيزي ياعظيم
والله صدقت انا مش بس متضايق انا عايز اطق، وامكن اتفقع مرة واحدة. الواحد شايف السودان الحبيب ماشى تمام ويصل هناك تتقلب عليه الدنيا. والقصة كلها الفلوسز الله يلعنها دنيا واخرة.
وللاسف والوحد فعلا ما عمل حاجة زيو زي كل المغتربين؟؟؟؟
عارف والله طوال 25 عام غربة ماشفت واحد من اخوان كان عنده خطة لحكاية الرجعة دي.
لا لا لا والله في واحد شكلة عربي كدة من الضواحي بتاعت الخرطوم مما وصل اشتري بنطلون جينز وفنلة وجزمة لمواخذة رياضية . وسكن ملح ما بيدفع حاجة السكن اصلا بتاع الشركة تستضيفك فيه كم يوم لما تشوف ليك شقة او ترحل لسكن تاني كويس تدفع فيه فلوس.
اخونا دا رفض الرحول ما كان شائل في زول بس لابس الجينز والجزمة الاددس. وتشوفه تقول دا لسه ما لقي عمل.
بس كمل سنتين قدم الاستقالة كالعادة الناس اتلموا حول شنو الحكاية يازول في حد ضايقك؟ حد زعلك؟
ببساطة قال والله انا جيت بهدف والان تحقق الهدف وعشان كدة انا راجع....
دا اول واخر سوداني اشوفه يعملها... واكيد هو الان سعيد. ياريت الواحد يعرف مكانه عشان يشوفوا عمل شنو....:15_8_212:

wdballa
08-10-2008, 09:13 AM
كورينا انت لسع راكب راسك :15_8_212:احسن ليك فكر كويس :12_7_21:

Musa
08-10-2008, 10:12 AM
الحبيب كورينا
انا والله من انصار انك تمشي السودان اجازة تشوف الحاصل شنو وبعدين الاجازة تكون طويلة شوية عشان تقدر تخش السوق وتداقش مع الناس أو تشوف ليك وظيفة والا اي حاجة بس ما تقعد في البيت.
الموضوع سهل جدا وعاوز حبة عزيمة.
اما بخصوص الهدف انا مثلا جيت السعودية قبل 20 سنة وكان هدفي اني اقعد سنتين عشان اوفر لي قريشات أعرس بيهن، تخيل بعد 15 يوم من سفري جا واحد مغترب خطب جكسويتي وتم الزواج بعد 21 يوم اها انا من ديك وعيك. يعني باختصار الهدف مات في داخلي وآثرت الغربة.

wdballa
08-10-2008, 11:06 AM
الاخ موسي ما تغش الزول والله يدخل السوق ما يطلع الا بي جلابيتو وعصايتو اكان ما دخل السجن ودقوهو بي عصايتو في راسو:36_7_19:. انت عملتها في نفسك عايز تعملها فيهو خليهو ياخ :8_4_126:

Abdelazim
08-10-2008, 11:16 AM
الاخ موسي ما تغش الزول والله يدخل السوق ما يطلع الا بي جلابيتو وعصايتو اكان ما دخل السجن ودقوهو بي عصايتو في راسو:36_7_19:. انت عملتها في نفسك عايز تعملها فيهو خليهو ياخ :8_4_126:

ود بلة الله يديك العافية يا أخوي انت والله شكلك زهجان من البلد شديد بس لا بد مما ليس منه بُد. يعني الزول لو دقو ليه خروج نهائي يمشي وين؟
وبعدين الراجل ما قال انو جا السودان انضرب في السوق
الراجل أخد شاكوش يعني مشكلتو عاطفية وقعد قبلو في الغربة والمسكين يمكن يكون ما أتزوج الي الآن.

هسي كروينا دا ذاتو حيرتوه معاكم يرجع والا ما يرجع.

تحياتي ود بلة

كورينا
08-10-2008, 11:58 AM
انتو سمعتوا برجوع نزار قباني لما قال ورجعت ما احلي الرجوع اليه؟؟؟؟؟؟؟؟؟
انا شكلي برجع رجوع الشعراء دا... كلام وبس ......
الظريفة في حكاية الرجوع دي ان كل الاهل والاصدقاء يقولوها ليك بصراحة كدة ترجع تعمل شنو كها كم يوم العندك تكمل تقعد تطرب السكلوب والناس الكانوا راجنك وانت في الغربة يفتحوا بيت عزاء .....

wdballa
08-10-2008, 12:14 PM
[COLOR=darkorange]انت عارف يا كورينا اكان ما متزوج خليهم يرسلو ليك واحده طرد تكون زهجانه من السودان ح تعيش معاك وتنسيك همومك اسمع كلام اهلك عشان ما تهلك
&w=600&h=400]تشغيل الفلاش من هنا (http://sudanelite.com/vb/flash.php?play=

كورينا
08-10-2008, 10:14 PM
الواحد كان متوقع اقتراحات اقتصادية للعودة.
ليه بس الناس عملتها حاج بس لتقضية الوقت والله انا جاد بس شوفوا معاي مشروع اقتصادي كدة.
بس حاجة تكون مدروسة كويس لان الفشل ممنوع منعا باتا...
طبعا قصدي حاجة كدة يشترك فيها كم مغترب يكون منها فائدة للسودان الحبيب وعائد ربحي يساعد في الاستقرار.

:36_13_13:

كورينا
08-11-2008, 09:59 PM
الأخوة الاعزاء
هي دي خوة شنو اول ما الواحد يجيب سيرة الفلوس الناس تحقص
والله جاد انا لو القى مشروع مشجع ادخل بقوة ويبقى العودة ممكن تبقى حقيقة

Abdelazim
08-12-2008, 07:47 AM
الأخوة الاعزاء

هي دي خوة شنو اول ما الواحد يجيب سيرة الفلوس الناس تحقص

والله جاد انا لو القى مشروع مشجع ادخل بقوة ويبقى العودة ممكن تبقى حقيقة


والله ما حقصنا لكن منتظرينك تأتينا بالأفكار الجديدة عشان نتناقش معاك.

كورينا
08-12-2008, 08:05 AM
أخي عظيم
لك التحية
الافاكر عايزة واحد عارف البلد والمداخل والمخراج.
واحد زينا ابيض اقصد ما عارف حاجة يروح تحت الرجلين.
لو في واحد عندة المواصفات المطلوب وبيعرف يخطط يقول انا هنا وعندي كدة كدة والمطلوب كيت وكيت ...
ونجمع الناس ونبدأ بحول الله وقوته.

ودي ضربة البداية

:36_7_19:

كورينا
08-12-2008, 11:52 AM
أجمل اقتراح في موضوع العودة كان من واحد حبيبنا
قال انت اصلا بقيت مدمن غربة ولو رجعت ما حتعرف احد ولا حد يعرفك والبلد اتغيرت واكيد حاتحس انك في غربة
ارجع ارجع ارجع احسن ليك

كورينا
08-13-2008, 03:06 PM
تصوروا بس القصة
واحد قريبي رجع الخرطوم نهائي بعد غربة تعدت 30 عام
اول اسبوع دخل المستشفى لعملية عيون قالوا بسبب ارتفاع السكر
الاسبوع الثاني بنته في ثانية ابتدائي راجعة من المدرسة قدام البيت صدمتها عربية قتلتها
كله مقدر بس الملابسات تعقد

Abdelazim
08-13-2008, 07:39 PM
كورينا والله انت بتاع مشاكل
يعني ما نرجع؟
الناس الرجعت من الاجازة قالو البلد مولع نار غلاء فاحش

ود الصراف
08-13-2008, 11:34 PM
حبيبنا كورينا و الركب الجليل
كلنا في الهواء سواء ( نار الغربه ما بترحم )
شوف يا اخوي عندي ليك نظريه كدي جربها
اتصل تلفون كم مره كده و شوف لو ما قالوا ليك حول و لا حولت كم
طوالي اعمل خروج و عوده
( اعمل حسابك اوعك تعمل خروج نهايي )
في النهايه و الله بلدنا احلي منها مافي بس الظروف

كورينا
08-16-2008, 03:26 PM
ود الصراف
لكم جميعا المودة
هو انت سموك ود الصراف من شوية
اكيد لو كملت السنة دي والتحويل مستمر سوف يتحول اسمك للصراف نفسه

كورينا
08-16-2008, 03:29 PM
يا عظيم
انت عايز تعملني سبب؟؟؟؟؟
انا ما قلت لزول ما يرجع
بس انا متردد وعايز واحد قلبه قوي يقول انه رجع ويشجعني عشان ارجع
بس انت زغم اني كنت فاكر بتكتب من السودان لكن اهو انت بتقول الاسعار نار
ياخ اثبت وثبتنا معاك

Abdelazim
08-16-2008, 07:09 PM
يا عظيم

انت عايز تعملني سبب؟؟؟؟؟
انا ما قلت لزول ما يرجع
بس انا متردد وعايز واحد قلبه قوي يقول انه رجع ويشجعني عشان ارجع
بس انت زغم اني كنت فاكر بتكتب من السودان لكن اهو انت بتقول الاسعار نار

ياخ اثبت وثبتنا معاك



يا أخوي هوي بطل السلبطة
انا لا عملتك سبب ولا حاجة
انا اولادي هسي في السودان وانا ح الحقهم قريباً
بس والله الصرف تقيل وبيصرفوا في الشهر
قدر البنصرفو هنا اربعة مرات
وبعدين قصة تعمل مشروع دي الا تلقي واحد متمرس يساعدك
والشرط الأساسي انك تشرف علي العمل
وبعدين يا معلم انا عارفك برة السودان الحبيب
انت ناسي انو انا في التحكم بقدر أعرف الناس
بتكتب من وين والا شنو؟

غايتو اصبر لي لما أرجع من السودان عشان
اديك معلومات متكاملة عن الوضع
:23_33_7:

كورينا
08-17-2008, 10:20 AM
يا عظيم
مين بتاع السلبطة؟؟؟؟؟
وانا كما اولادي من زمان في السودان الحبيب
بس للعلم دا ما مؤشر لانهم اطلا بيهربوا من البلد اولا ومنك ثانيا... وطبعا من انا كمان
المهم انهم هم هناك بيكونوا مبسوطين على الاقل يعيشوا في جو صحى ويعرفوا مداخل البلد ومخارجها
لم ترجع يعملوا ليك مرشيدين سياحيين ...
هو انت تبع الكنترول وانا ما عارف؟؟؟؟
يعني الواحد كدة بقى عنده واسطة؟؟؟؟؟
لما ترجع القاك وين؟؟


:23_33_7:

Abdelazim
08-17-2008, 10:27 AM
يا عظيم

مين بتاع السلبطة؟؟؟؟؟
وانا كما اولادي من زمان في السودان الحبيب
بس للعلم دا ما مؤشر لانهم اطلا بيهربوا من البلد اولا ومنك ثانيا... وطبعا من انا كمان
المهم انهم هم هناك بيكونوا مبسوطين على الاقل يعيشوا في جو صحى ويعرفوا مداخل البلد ومخارجها
لم ترجع يعملوا ليك مرشيدين سياحيين ...
هو انت تبع الكنترول وانا ما عارف؟؟؟؟
يعني الواحد كدة بقى عنده واسطة؟؟؟؟؟
لما ترجع القاك وين؟؟




:23_33_7:


والله بالغت عديل يا كورينا
عليك الله زمنك دا كلو معانا في المنتدي ما عارفني بتاع النشرة الجوية
وبعدين اولادك مشو السودان خوفا من نقتك الكتيرة وخرفك المُبكر
انا مدخلني معاك لي شنو
والله انت بتحب الختا
يديك العافية كورينا

كورينا
08-17-2008, 03:12 PM
ياعظيم
نشرة جوية بتاع مين؟؟؟؟
هو نحنا النشرة العديلة بتاعت الاخبار ما بنشوفها عايزنا نشوف النشرة الجوية
بعدين نشرات الاخبار ناس التلفزيون الله يديهم العافية عمها كلها بنات!!!!!!
وله امكن قصدك نشرة الاخبار بتاعت bbc
لك الود

Abdelazim
08-22-2008, 01:40 PM
هسي يا كورينا يا أخوي خليني من نشرة الأحوال الجوية
ناس السودان ديل قاعدين يكسرو في مجاديفنا
عاوزين لينا واحد يجيب لينا فكرة مشروع عشان نفكر جديا في الرجوع
والا يكونو ما عاوزننا نضايقهم في السودان الحبيب

الحفيان
08-22-2008, 04:10 PM
رايكم شنو نعمل مشروع مواصلات تعاوني
يعني نشغل حافلات او باصات للسوق للمساعدة في حل ازمة المواصلات

كورينا
08-23-2008, 06:00 PM
عزيزي الحفيان
لك التحية
وشكرا على اقتراحك
بس انت يعني عشان حفيان عايزنا نجيب حافلات؟؟؟؟؟
مين يعمل دراسة الجدوه.
شوفوا لينا جهة متخصصة تعمل دراسة جدوة .
وبعد الدراسة نبقى نفكر
شنو رايك بالناوين ترجعوا

Abdelazim
08-23-2008, 06:42 PM
تعرف يا كورينا ناس المنتدي ديل بيكسرو المجاديف
ما عاوزننا نرجع

سمير الروح
08-23-2008, 06:51 PM
يا جماعة الموضوع دا مهم جدا لازم تدونا رايكم
عشان نفكر نرجع كفاية غربة

كورينا
08-23-2008, 09:57 PM
ياعظيم
يعني حنقعد ضيوف عن الاغراب لمتين؟؟؟؟
غصب عنهم وعن انفسنا لا بد من العودة......
بس العودة الغير مخطط حتكون نكبه علينا وعلى المحتاجين للعون
وبعدين هو بلاد الغربة لمتين ختكون محتاجة لينا؟؟؟؟؟؟؟
يا أخوانا زمن الغربة في الدول العربية خلاص شطب...
وصدقوني الما يرجع بخاطرة حيرجع غصب عنه
بس الله يستر مارجع مكلبش
لانه شكلهم الناس ديل خلاص قرفوا من الاجانب !!!!

وطواط
08-24-2008, 01:56 PM
هوي اوريكم
اقعدوا قبلكم وشوفوا لينا شغل معاكم
اول شي كان جيتوا ما حتعرفوا تعيشوا هنا
انتوا قايلين السودان زي زمان؟؟
عشان ما تعيش عيشة معقولة في السودان دي عايزا ليها شروط كتيييرة
اول شئ تبيع ضميرك وتنسي حاجة اسمها علاقات انسانية وتاخد ليك كورس كضب ودجل وتتعلم كيف تقبض المواسير
دي اساسيات الزول الناجح
كمان اديكم حاجة
اوعكم من الدين
ولو عايزين تدينوا ليكم زول تخلوهوا يبوس يدكم عشان تدينوهو عشان بعدين حتبوسوا ليهو رجلو عشان يرجع الدين
دي اساسيات بنا اي عمل تجاري في البلد دي
وقيسوا علي كدا

كورينا
08-28-2008, 08:15 PM
وطواط
ليه دا كله يا وطواط؟؟؟؟؟
انت بتتكلم عن السودان الواحد بتاعنا دا ولا حاجة تانية؟؟؟؟؟
والكلام دا بينطبق على كل السودان ولا على ارض الوطاويط (بس اوع تزعل ) بحاول اخفف دمي
صحيح نحنا مغتربين بس عارفين السودان تمام وهو غير الكلام الانت قلته دا
صحيح اننا ما عايشين فيه لكن كل سنة الواحد بيشوفوا
امكن النظر مختلف وامكن انت بتشوف حاجات غير النحنا شايفنها......
معاك عظيم اسألوه
واكيد في كتيرين ممكن تسالهم عن نظرتهم عن السودان الان.....

لك وللجميع التحية والاجلال

:8_4_126:

بنونة بت المك
08-29-2008, 10:13 AM
اخي كورينا السلام عليكم
والله بالشئ الشايفاو هنا دا احسن ليك ما تفكر ترجع
لينا اسبوع هنا وكل يوم بنصرف الشي الفلاني

كورينا
08-29-2008, 12:11 PM
بنونة
تعظيم سلام
نحن واقفين في باب الملك....
دا كلام شنو دا يابنونة؟؟؟؟؟؟؟
اذا انت بت الملك بتقولي الكلام دا امال الناس العاديين يقولوا شنو؟؟؟؟
صحيح الحالة صعبة بس هي دي بلدنا يا نغيرها اقصد نصلحها او نقبل بها وهي كدة
لو عندكم حل اخر قولوا ونحنا معاكم.....
بس ما تخوفونا منها بلدنا!!!
لكم وللسودان الحبيب المودة

سمير الروح
08-29-2008, 05:20 PM
بنونة
تعظيم سلام
نحن واقفين في باب الملك....
دا كلام شنو دا يابنونة؟؟؟؟؟؟؟
اذا انت بت الملك بتقولي الكلام دا امال الناس العاديين يقولوا شنو؟؟؟؟
صحيح الحالة صعبة بس هي دي بلدنا يا نغيرها اقصد نصلحها او نقبل بها وهي كدة
لو عندكم حل اخر قولوا ونحنا معاكم.....
بس ما تخوفونا منها بلدنا!!!
لكم وللسودان الحبيب المودة

كورينا الحبيب والله كلام حاجة بنونة دا يخوف عديل
رايك شنو لو استثمرنا قروشنا دي هنا قبلنا
نفتح لينا مطعم والا ورشة ميكانيكا
والا نفكر نعكل لينا محل انترنت
رايك شنو

كورينا
08-31-2008, 10:56 AM
سمير الروح
لكم التحية
دا كلام شنو دا....
كيف نسيب كلام بنونه دي بت ملاوك كلامها ما بقع واطه؟؟؟؟
كمان سيبونا من حكاية الاكل دي!!!! صحيح انه بدخل فلوس بس
يخوف كل واحد عند مناسبة يجيك واذا الواحد دخل واكل وقال ما عنده فلوس نعمل ليه شنو..
بش شغلة الكمبيوتر دي حلوة خصوصا لو كانت تجميع وبيع وتدريب
التدريب دا فيه فلوس والبلد محتاجة ليه....
هيا شدوا حيلكم وانا اول المشاركين

:23_33_7:

كورينا
09-02-2008, 12:26 PM
الاعزاء
لكم التحية ومبارك علينا وعليكم الشهر الكريم
ان شاء الله ربنا يقدرنا على صيامة وقيامة ويتقبله مننا
شنو الحكاية لا عايزين تسافروا ولا عايزننا نرجع دي معادلة غريبة جدا جدا جدا...

Abdelazim
09-02-2008, 12:57 PM
الاعزاء

لكم التحية ومبارك علينا وعليكم الشهر الكريم
ان شاء الله ربنا يقدرنا على صيامة وقيامة ويتقبله مننا

شنو الحكاية لا عايزين تسافروا ولا عايزننا نرجع دي معادلة غريبة جدا جدا جدا...


كورينا كل سنة وانت طيب ورمضان مبارك عليك
وتصومو وتفطرو علي خير
أها يا كورينا يا أخوي أحسن لينا نقعد قبلنا في غربتنا دي
وانا غايتو بعد الشايفودا الناس ديل معاهم لحدي حق الميز

كورينا
09-02-2008, 03:37 PM
حتى انت يا عظيم؟؟؟؟؟؟
قبل يومين طلعت علينا بنت المك قالت كلام زي كلامك !!!
طبعا ما عجبني بس ديل ناس ملوك وما نقدر نقول ليهم حاجة
وانت مقدور عليك...
ما اقبل الكلام دا ابدا منك...
هي ديل بلد منو ياترى؟؟؟؟
نسيبها ليهم يعني ؟؟؟؟
انا قلت لا والف لا ....
لازم نرجع بالتخطيط والا من غير تخطيط
ونقعد زي ما الناس قاعدين.

وطواط
09-02-2008, 04:36 PM
ياكورينا اخوك عبد العظيم اسي كان معاي
اسألوا قول ليهو السودان كيف
بالله مما وصل كدا الكهرباء قطعت ليك وما جات الا بعد تلاتة ساعات
وتعال شوف بعد داك
جوطة تقيلة
انا قلت ليكم ما بتقدروا تعيشوا معانا هنا
اقعدوا قبلكم
لاكين كلام القصير ما بيتسمع

كورينا
09-02-2008, 11:29 PM
يا وطواط
لك التحية وكل عام وانت والسودان وكل الاحباب بخير
يبدو ان البون بيننا شاسع
القصة ما قصة كهرباء قطعت ومواصلات مافي
ولا حتى مشكلة قطع غيار للعربية ولا دراسة وعلاج
القصة مصدر دخل
هي نعمل حاجة مدروسة كويس
وشوف لو واحد تاني يفضل الغربة ....

وطواط
09-03-2008, 05:07 PM
يا وطواط

لك التحية وكل عام وانت والسودان وكل الاحباب بخير
يبدو ان البون بيننا شاسع
القصة ما قصة كهرباء قطعت ومواصلات مافي
ولا حتى مشكلة قطع غيار للعربية ولا دراسة وعلاج
القصة مصدر دخل
هي نعمل حاجة مدروسة كويس

وشوف لو واحد تاني يفضل الغربة ....

جيب ليك توكيل اي حاجة من هناك وتعال سوّق
الشغل دا هنا راااااشي

كورينا
09-04-2008, 01:06 AM
عزيزي وطواط
لك التحية وللجميع والتهنئة بشهر رمضان الكريم..
هي الحكاية ما بالسهولة دي...
بس تخيل ان الواحد يرجع ويجلس يصرف ما عنده ويقعد يتلفت.
الواحد عايز دراسة جادة للترتيب للعودة
يعني مشروع استثماري مدروس دراسة صحيحة من جهة خبيرة بالمشاريع وبالعمل في السودان
ولا تنسى ان الواحد بقى كبير والشغل العايز مجهود مشكلة كبيرة...
وبلاد العربية (العربية) بقت طاردة
والكثير من السودانية يفكروا في العودة
بس عايزة ترتيب

كورينا
09-06-2008, 01:59 AM
[align=center]

[[align=center]
align=center]
الاسبوع الماضي
اجتمعنا في مناسبة كما يجتمع عادة السوانيين
ودار الحديث في كل المجالات والكل ادلى بما لدية
وانا خرجت ب
انه من بيننا من لهم من السنين في الغربية ما يجعلنني اشك في عودتهم...
بعضهم كان يتحدث عن انه كان هنا من زمن كان السوادنين هم الاثرياء في المنطقة
وكانت جدة تزدهر عن حضور الحجاج السودانيين والسوق يجف بعد ذهابهم
والناس تتسابق نحوهم... لانهم عندهم فلوس وكل الحجاج الاخرين مفلسين !!!!!
طبعا كان الشاغلني في الكلام دا ....
ان الناس ديل لسه جالسين هنا وما عندهم نية للعوده...
شنو يا ترى يقول اخونا وطواط وعبدالعظيم والحاجة ام احمد
نرجع وله لا؟؟؟؟؟؟
افيدونا....

Abdelazim
09-06-2008, 01:19 PM
والله يا كورينا يا أخوي العودة لابد منها
لكن لابد من مشروع من النوع ابو كديس
يعني لازماك قروش بالكوم
عربية فارهة
بيت فخم
جلابية وعمة
عمل تكون انت علي راسه
ولي عودة

كورينا
09-06-2008, 01:29 PM
يا عبدالعظيم
لك التحية
شوف اهي حكاية العمة والجلابية، الفله الفاخرة دي معناها لا شغل
ونحن ناس اتعودنا طول عمرنا نكون شغالين... دي طبعا يقابلاها شغالات بتاعت السعودية
شفنا هنا (في السعودية) ناس فلوسهم لا اول ليها ولا اخر ولم يلاقوك في الشارع ممكن تدخل ايدك في جيبك عشان تديهم صدقة..
برضه مش عايزين نكون زيهم..
كدي شوف لينا حاجة وسط كدة
مشروع ونعمل ليه دراسة او مشروع مدروس جاهز بس عايز واحد يدخل على طول

كورينا
09-09-2008, 01:05 AM
العزيز عبدالعطيم
لك التحية
من مدة ما سمعنا منك
يعني الواحد عشان فكر في العودة للسودان وبقت الحكاية جدة
اختفيت وخربت الاب توب وتاني حصل ليك شنو ما عارف
ياج سيبك من العودة لو دي بعض عواقبها......
ولك التحية ينما كنت ولجميع الاحباب بالمنتدي

كورينا
09-09-2008, 10:43 AM
الاعزاء جميع محبي السودان الحبيب
لسه انا معلق وما عارف ارسى على حل
العقل والقلب يقولوا لازم ترجع رغم تحذير كل الاهل والاحبة.
امس واحد زميلنا رجع بعد غياب طويل بالسودان الحبيب
جريت قلت دا جلس ليه مدة طويلة اكيد عرف البلد ومداخلها ومخارجها...
دي قالوا حاجة مهمة عشان تعرق تستقر...
المهمة وصلت العائد من السودان الحبيب فاذا به يصيح امام الناس :
انا خلاص طلقت السودان مش راجع تاني ابدا...
حتى لو اغترب في بنقلاديش
لن ارجع مرة ثانية
الناس كلهم بقوا حرامية..
حاجة تجنن دا ما السودان البنعرفة...
حيرتونا معاكم يا هو......

:36_13_12:

Abdelazim
09-09-2008, 12:03 PM
العزيز عبدالعطيم

لك التحية
من مدة ما سمعنا منك
يعني الواحد عشان فكر في العودة للسودان وبقت الحكاية جدة
اختفيت وخربت الاب توب وتاني حصل ليك شنو ما عارف
ياج سيبك من العودة لو دي بعض عواقبها......

ولك التحية ينما كنت ولجميع الاحباب بالمنتدي


والله يا كورينا يا أخوي الحالة صعبة شديد
المسألة لا تطاق ولا تحتمل
والعجيبة ناس السودان بيقولو ليك البلد رخيصة
غايتو الله يكون في العون
السودان ما بنطلقو لكن الا اجازات بس

كورينا
09-09-2008, 12:24 PM
عزيزي عظيم
لك التحية والشكر
عارف من اعجب الحاجات انو في ناس جالسين ما عندهم عمل وعايشين
مش عايشين وبس ديل تشوفهم تقول اولاد ملوك....
مثلا واحد جنبنا في الحلة عنده تكس
والله يا عبدالعظيم جلست شهر ما شفته بيدور في الحي
ولا حتى شايل ناس مشوار
وعايش ولابس وتشعر انه تمام التمام...

كورينا
09-10-2008, 05:41 PM
يا ناس النخبة
لكم التحية
الواحد بقى يخرم للحديث في المنتدى دا
الله يسعدكم كما اسعدتونا.
لقيت واحد عائد من السودان بيحكي عن حاجات تخوف
حاجة كدا زي طريقة المعاملة الزمان للمغتبين
في كل مكان يعاملوك زي الحاجة الكعبة....
دي كلام شنوا دا يا اخوانا هل فعلا دا حاصل

كورينا
09-11-2008, 01:43 PM
الراجل كان بشتكي من تعاومل الموظفيين الرسمين مع المغتربين
يحكي عن الدخول عبر الميناء ببورتسودان
عن انهاء الاجراءات والاسلوب الذي ينتهجه الموظفين مع الناس ومع المغتربين بصورة خاصة
والتعامل في كل المرافق الحكومية
معقول الكلام دا؟؟؟ نحن فاكرين الحكاية دي زمنها انتهى!!

كورينا
09-12-2008, 11:11 PM
قبل تقريبا 5شهور كنت في السودان
الواحد بقي فيه زي الغريب
البلد مختلف والشوارع ماهي الشوارع
والناس كمان تغيروا كانهم ما هم الناس الكان الواحد بيعرفهم
حياتي كلها عشتها في الخرطوم بحري
بس الشوارع وجدتها مختلفة والواحد بقى يضيع فيها
والمناطق كلها ليست هي المناطق التي كنا نعرفها....

ابراهيم العمده
09-13-2008, 05:32 PM
الراجل كان بشتكي من تعاومل الموظفيين الرسمين مع المغتربين

يحكي عن الدخول عبر الميناء ببورتسودان
عن انهاء الاجراءات والاسلوب الذي ينتهجه الموظفين مع الناس ومع المغتربين بصورة خاصة
والتعامل في كل المرافق الحكومية

معقول الكلام دا؟؟؟ نحن فاكرين الحكاية دي زمنها انتهى!!



ياكورينا ما وريتنا التغيير للأحسن ولا للأسوأ
والله قصة التعامل دي عامة للمحليين والمغتربين سواء
وكان مامصدقني أسأل أصحابك أو أهلك
ورغم ذلك نري جميعنا سوداننا
في تطور دائم و ملحوظ
لك التحية كوريناً

كورينا
09-14-2008, 02:20 AM
منقول من مداخلة في موقع اخر
بعنوان السودان كما وجدناه بعد سنين من الغياب:

زيارة شئون المغتربين
وهي خطوة ممكن تلخبط الحسابات لهذا حاولنا تخطيها مع بداية الاجازة
اول ما تدخل مبني الجهاز تتجه لنوافذ خارج الصالات (لتشتري ) نموذج معاملتك
لكوني اريد تاشيرة خروج مبلغ النموذج 27 الف جنيه .. للتذكير هذه قيمة ورقة فقط
عليك ان تدفع مثلها رسوم تاشيرة داخل الصالة
ادرة الخدمات تشكو ضعف التحصيل بعد كل هذا وقد وزعت خطابا داخليا بخط اليد تم الصاقه ربما خطأ
علي عدد من نوافذ الصاله فيه تشديد علي العاملين بالجهاز بضرورة زيادة التحصيل خاصة فيما يتعلق
بتحصيل قيم البطاقة الضريبية
موقف محرج .....
احد المغتربين (الواصلين .. من الجماعة ) لم يمر عبر بوابة التقدير والضرائب والزكاة واستلم
تأشيرة الخروج ولكن حينما ذهب ليقدم لاراضي المغتربين اخبره الموظف بانه لابد من احضار تقديراته
الضريبية وهنا حضر لموظفة الضرائب مقدما جوازه ودار الحوار التاي (والله علي ماقول شهيد )
اطلب تقديرات الضرائب الخاصة بي
الموظفة وهي تقلب الجواز وتعثر عل التاشيرة وتساله من اين حصلت علي التاشيرة
الاجابة : من الجهاز من هنا
من الذي عمل ليك هذه التاشيرة
تاج الدين المهدي
يعني تاشيرة استثنائية ولا شنو
والله مش عارف المهم اشرت شوفي لي التقديرات
هنا الموظفة تخاف وتذهب الي مكتب اخر وتستشير من هي اعلي والظاهر هي الاخري خافت لتعود اولاهم
وتبدأ اعداد التقدير علي مضض ولانه لاتوجد بيانات بالراتب تساله عن راتبه يسألها لماذا
بكل ادب عشان تقدير الزكاة
يجيب 300 دولار ... تخيل واستلم تقديراتها تلك واتجه الي الاراضي ...... لا تعليق ..

ابراهيم العمده
09-14-2008, 09:31 AM
والله قصة التعامل دي عامة للمحليين والمغتربين سواء
وكان مامصدقني أسأل أصحابك أو أهلك






وبحلف ليك تاني
والله العظيم
كلنا في الهوي سوي
مغتربين وما مغتربين
ياخ شوف ستات الشاي ببتزوهم كيف؟
شوف بياعين المويه
كل الباعه المتجولين
ستات الكسره
الحلاقين
الصنايعية كلهم
التجار
بتاعين الورنيش
السواقين
الكماسره
بتاعين الركشات والأمجاد والهايس
ياخ ديل الله يكرمكم حتي ستات ال........
إبتزوهم

كورينا
09-14-2008, 03:07 PM
العمدة
وبعدين الحل شنو يا عمدة
اهو انت عمدة ربنا ارسلك لينا تقدر تحل لينا المشكلة دية؟؟؟؟؟

ابراهيم العمده
09-14-2008, 04:13 PM
العمدة

وبعدين الحل شنو يا عمدة

اهو انت عمدة ربنا ارسلك لينا تقدر تحل لينا المشكلة دية؟؟؟؟؟



غير نمسك في الله ماعندنا حل ندعوه ونعبده
حق العباده ونتوكل عليه حق التوكل وهو إنشاء الله
لن يخزلنا (ومن ينصر الله ينصره) وهو الرحمن
الرحيم وإنشاء الله يجي يوم ويتبدل كل هذا
الواقع المر إلي أحلي وكل ظالم يجد
جزاه وكل مظلوم ينصف والصبر
مفتاح الفرج والعاقبة
للمتقين

كورينا
09-15-2008, 11:14 AM
ود العمدة
لك التحية والاجلال
نعمة بالله ودي بيني وبينك فا فيها كلام...
من لنا غير الله ؟؟؟؟؟
بس كمان الله ما قال سبحونوا واجلسوا
قال اعملوا وسيرى الله عملكم
يعني لازم نعمل حاجة بس شنوا هي وكيف نعملها ليتغير وجه السودان.
وتعيش الناس مبسوطة...

ابراهيم العمده
09-15-2008, 11:34 AM
لك التحيه أخونا كورينا
نَعَمْ ونِعْمَ بالله
قل إعملوا وسيري الله عملكم
أخي هناك برنامج يبث في قناة الشروق يومياً عدا الخميس والجمعه
إسمه مع كل الود والتقدير يقدمه الرائع الطيب عبدالماجد
الساعة09:30 م ويعاد 01:30 ص
هذه دعوة لك إن لم تشاهدة
ودعوة للجميع بمشاهدتة
وبعد ذلك نواصل
باقي ما أنقطع
إنشاء الله

كورينا
09-16-2008, 11:37 AM
العزيز العمدة
شكرا ليك
وان شاء الله نشوف الرائع الطيب في برنامجة

Abdelazim
09-16-2008, 11:48 AM
والله يا كورينا ود العمدة ما قصر معانا خالص
وصور لينا الواقع الفعلي للسودان الحبيب

كورينا
09-17-2008, 12:54 PM
يا عظيم
لك التحية في الايام الجميلة القادمة
واقع السودان البقولوه الناس والبنشوفه نحنا غير الفي قلوبنا...

ودي مشكلتنا يالحبيب

بس بأمانه كنا ويون ونحن الان وين؟؟؟؟؟

Abdelazim
09-17-2008, 01:02 PM
يا عظيم

لك التحية في الايام الجميلة القادمة
واقع السودان البقولوه الناس والبنشوفه نحنا غير الفي قلوبنا...
ودي مشكلتنا يالحبيب
بس بأمانه كنا ويون ونحن الان وين؟؟؟؟؟



كلامك مضبوط كنا وين وبقينا وين
تخيل انك تمشي جوازات المغتربين
تعمل التأشيرة والإجراءات في نص ساعة
نعم والله هذا ما حدث معي في نص ساعة
خلصت جميع الإجراءات والدنيا موسم اجازات
زمان كان اسبوع كامل من الإجازة بيكمل مجابدة معاهم

كورينا
09-17-2008, 11:30 PM
يا عظيم
من ينكر التحسن في الاجراءات
اعمى لا يرى او بس مصاب بالداء الانتقاد والنكران
الذي يعاني منه كثير من السودانيين
اقصد السودانين عموما وخصوصا الفي السودان كل شئ عندهم كعب
بس لو الواحد ينظرا لوراء قليل تجد الفرق في كل شئ
الفرق الي الاحسن...
حكاية المغتربين دي ما تكلمني عنها
همها بس كان يهد الحيل ....
دفع وواسطات وكم يوم الاجازة كدة تضيع وانت من الصباح للمساء عند باب المغتربين...

Abdelazim
09-18-2008, 08:48 AM
العزيز كورينا
طالما بدينا نعدد في المحاسن وهي كثيرة جدا
خصوصاً للذين اغتربوا من زماااان زينا كدا
نطلب من الشباب الموجود في السودان المشاركة
بفكرة استثمارية مرة اخري بس مع الفكرة
عاوزنهم يعددوا لينا العقبات التي تواجه المستثمر
لكي نتمكن من ايجاد الحلول لها او تجاوزها لفكرة اخرى

ابراهيم العمده
09-18-2008, 10:06 AM
العزيز العمدة



شكرا ليك


وان شاء الله نشوف الرائع الطيب في برنامجة


أها ياخوي إنشاء الله حضرتو اليومين الفاتو ديل
والشباب إنشاء الله حضروهو؟

ابراهيم العمده
09-18-2008, 10:08 AM
ياكورينا ما وريتنا التغيير للأحسن ولا للأسوأ

والله قصة التعامل دي عامة للمحليين والمغتربين سواء
وكان مامصدقني أسأل أصحابك أو أهلك
ورغم ذلك نري جميعنا سوداننا
في تطور دائم و ملحوظ

لك التحية كوريناً


متذكر السؤال ده ياكورينا أها الحمد لله أخيراً جاوبتو
وشهد شاهد من أهلها


يا عظيم

من ينكر التحسن في الاجراءات
اعمى لا يرى او بس مصاب بالداء الانتقاد والنكران
الذي يعاني منه كثير من السودانيين
اقصد السودانين عموما وخصوصا الفي السودان كل شئ عندهم كعب
بس لو الواحد ينظرا لوراء قليل تجد الفرق في كل شئ
الفرق الي الاحسن...
حكاية المغتربين دي ما تكلمني عنها
همها بس كان يهد الحيل ....

دفع وواسطات وكم يوم الاجازة كدة تضيع وانت من الصباح للمساء عند باب المغتربين...

كورينا
09-18-2008, 01:34 PM
الاخوة الاعزاء
العزيز عظيم
انا لما بديت البوست دا كان الهدف منه مشروع للعودة؟؟؟؟؟
ولم يستجب احد للاسف!!!!!
انا جاهز وعلى استعداد للدخول في اي مشروع
مشروع جدي ومدروس كويس من جهة متخصصة
وطبعا من اول الشروط المشاركين يكونوا ناس ثقة..
الحكاية عيزة جدية واول اقتراح مني انا
1- مشروع معهد للتدريب علي الحاسب الآلي واللغة الانجليزية...

Abdelazim
09-18-2008, 02:59 PM
الاخوة الاعزاء

العزيز عظيم
انا لما بديت البوست دا كان الهدف منه مشروع للعودة؟؟؟؟؟
ولم يستجب احد للاسف!!!!!
انا جاهز وعلى استعداد للدخول في اي مشروع
مشروع جدي ومدروس كويس من جهة متخصصة
وطبعا من اول الشروط المشاركين يكونوا ناس ثقة..
الحكاية عيزة جدية واول اقتراح مني انا
1- مشروع معهد للتدريب علي الحاسب الآلي واللغة الانجليزية...



العزيز كورينا
والله فكرة مشروع المعهد ممتازة جداً
- نحدد المكان
- هل في مشاريع زي دي قائمة
- الشهادة البيقدما المعهد ممكن تكون شنو
والاسئلة كتيرة بس نلقي اجوبة علي ما سبق

ابراهيم العمده
09-18-2008, 03:58 PM
الاخوة الاعزاء

العزيز عظيم
انا لما بديت البوست دا كان الهدف منه مشروع للعودة؟؟؟؟؟
ولم يستجب احد للاسف!!!!!
انا جاهز وعلى استعداد للدخول في اي مشروع
مشروع جدي ومدروس كويس من جهة متخصصة
وطبعا من اول الشروط المشاركين يكونوا ناس ثقة..
الحكاية عيزة جدية واول اقتراح مني انا
1- مشروع معهد للتدريب علي الحاسب الآلي واللغة الانجليزية...


بالنسبة للمعهد والكومبيوتر ده
أنا والسادات كنا بنتكلم عن المشروع قبل فترة قريبة جداَ
ولازالت الدراسة قائمة فهذا تخصصة فيمكنكم الرجوع له

تخريمه
ماقلتو لي حضرتو البرنامج حق الطيب ولا لسه

Abdelazim
09-18-2008, 11:48 PM
بالنسبة للمعهد والكومبيوتر ده

أنا والسادات كنا بنتكلم عن المشروع قبل فترة قريبة جداَ
ولازالت الدراسة قائمة فهذا تخصصة فيمكنكم الرجوع له


تخريمه

ماقلتو لي حضرتو البرنامج حق الطيب ولا لسه



جميل جدا يا ود العمدة
نشوف رأي كورينا شنو

رداً علي تخريمتك: لسة والله ما شفت البرنامج
ما عارف عمك كورينا شافو والا لا

ابراهيم العمده
09-20-2008, 09:07 AM
جميل جدا يا ود العمدة
نشوف رأي كورينا شنو

رداً علي تخريمتك: لسة والله ما شفت البرنامج
ما عارف عمك كورينا شافو والا لا

الليله السبت علييييييكم الله أحضروهو

Abdelazim
09-20-2008, 09:23 AM
الليله السبت علييييييكم الله أحضروهو



نحاول بإذن الله تعالي

ابراهيم العمده
09-20-2008, 09:33 AM
نحاول بإذن الله تعالي

خلاس وكت بتحاولو وبإذن الله تعالي
عفيتكم من الحليفه

كورينا
09-20-2008, 12:17 PM
الاعزاء جميعا والاخ عبدالعظيم والعمدة خصوصا
دي صدفة يعني ولا الحكاية فيها توارد خواطر؟؟؟
ان مستعد بس اشوف الدراسة من ناحية فنية اقصد من شخص متخصص في المجال...
ثم من ناحية اقتصادية من جهة متخصصة ايضا...
ثم بعد كدة الدراسة الميدانية اقصد الموقع وراس المال والعائد المتوقع وتوزيعة والي ..... الاخ
وحقوا ما نحصر نفسن هنا...
عايزين طرح لمواضيع مختلفة للمقارنة وانتقاء الاحسن

كورينا
09-24-2008, 12:17 AM
الاعزاء
لكم التحية والحمد لله على تشغيل المنتدي من جديد....
شكلة موضوع الكمبيوتر ما عجبكم
شنو رايك في صالة رياضية
كل الاجهزة الرياضة
وواحد رياضي عنده خبرة في التدريب على الاجهزة المختلفة
وخبرة في ادارة الصالات الرياضية..
وعايزين اقتراحات اخرى

كورينا
10-02-2008, 01:33 PM
يا ود العمدة
كل عام وانتم وكل النخبة بخير والسودان الحبيب استعاد صحته وبي عال العال...
وين الدراسات القلت عليها دي...
انت نسيت انك ود عمدة وكلامة ما مفروض يقع واطه ولا شنو؟؟

Abdelazim
10-02-2008, 01:56 PM
تعرف يا عمك انا بقترح إننا نعمل صيدلية
والله مشروع الصيدلية دا مشروع رهيب عديل
ومربح جداً.
بس عاوزين لينا صيدلي يعمل الدراسة
رايك شنو يا كورينا

كورينا
10-02-2008, 09:56 PM
يا عظيم
كل عام وانت واهل والسودان الحبيب بخير
شكرا لك على فتح مشروع العودة للسودان الحبيب من جديد...
رغم ان مشروع الصيدلية اعتقد انه صغير وما يحتاج لمشاركة...
إلا اني لا مانع لدي للدخول في اي مشروع على الاقل يصبح خمارة

(خمارة دي بتاعت الخميرة لعجينة الكسرة ما تفكر بعيد)
هذا بالاضافة الى مثل هذه المشاريع عرضة لتدخل الحكومة في اي وقت
لتحديد سعر دواء او تحديد كميات البيع او ترشيدها كما يسموه
انا لي زميل يعمل في المجال دي من زمن طويل واشتغل ايضا بالمدينة المنورة لسنين.
وله صيدلة في الخرطوم مستعد اجيب ليكم كل المعلومات....
بس حددوا المعلومات المطلوبة عايزين شنو....

كورينا
10-08-2008, 01:09 PM
ايه الحكاية يا عظيم
صرفت نظر عن الصيدلية
هي طبعا ممكن بدل صيدلية واحدة ممكن تكون سلسلة زي النهدي كدة
بس شكلكم كدة ما جادين
انا فعلا جاد في العودة للسودان الحبيب...
لو جادين قولوا والا سوف ارجع
وخليكم هنا امكن ربنا يفتحها علينا في البلد الطيب

بنونة بت المك
10-08-2008, 05:49 PM
والله فكرة الصيدلية فكرة ممتازةوما بعرفو النهدي دا منو لكن ممكن تكون زي صيدلية جعفرونفتح فروع كثيرة خدمة 24 ساعةغايتو انا معاكماعملو دراسة الجدوي

كورينا
10-08-2008, 07:57 PM
بت المك
انت وين من زمان
ما نحنا من زمن ندعو الناس وكل واحد عامل ما سامع
امكن في ناس بتخطط تسرق الفكرة وتعمل بيها في صمت..
انا مستعد لاي مشروع...
بس ضروري الدراسة الشاملة
التخطيط السليم

نكمل بعد الصلاة

علوب عبدالشكور
10-11-2008, 08:07 AM
عُذراً لتأخري عن المشاركة
ولكن ما أجمل التفكير في الرجوع للوطن الحبيب
أي مشروع مهما كان كبير أو صغير يتطلب وجود صاحبه في الاشراف عليه
والا ستضيع كل أموالك حتي لو كان المشرف عليها اقرب الاقربين
تعالوا نفكر نعمل خدمة صحية متكاملة
انتو قلتو صيدلية - الصيدلية عاوزة عيادة والعيادة عاوزة معمل
مجمع طبي هو الفكرة الاجمل لنقدم خدمة اشمل ونستفيد اكثر
الراي شنو

كورينا
10-11-2008, 09:24 AM
[quote=علوب عبدالشكور;5456]



عزيزي علوب
والمعمل عاوز عربية العربية عايزة المفتاح والمفتاح ...
شكلها كدة ما بتخلص
مشروعك ممتاز بس كل الناس عايزة ترجع وكل واحد عايز هو يكون المسئول!!!!
مش عشان الشغل... عشان يرجع وبس...
اعتقد مشروع يستحق الدراسة ...
مين عندو امكانية دراسة ....
الموقع العيادات وكافة الملحقات...

الاخطبوط
10-14-2008, 03:43 PM
أخوكم مغترب
والله عشت خارج السودان (في دولة عربية) مدة طويلة جدا وعايز اعود بس كل الناس القريبين بيقول لسة الوقت ما مناسب ممكن تشاركوني في المحنة دي ؟؟؟؟؟؟



والله يا كورينا الغربة ده زي زسجارة اولاها دخان واخيرها لسعان الله يرجعنا للسودان سالمين غانمين والله اعلم

كورينا
10-14-2008, 03:55 PM
العزيز اخطبوط
لك التحية للمرور...
وشكرا على المداخلة
نحن نبحث عن حل للورطة
عايزين افكارك للعودة
مشروع او مشاريع تدفع الناس للعودة للسودان الحبيب
ولك التحية

كورينا
10-18-2008, 09:40 AM
يا علوب
شوقتنا للمشاريع لدرجة الواحد خلاص بقى يعد فلوسو
مشروع ممتاز بس الموقع اهم حاجة
لان الموقع هو البحدد نجاح مشروع مجمع طبي
ممكن حاجة صغيرة في موقع كويس تنجح ...
عايزين واحد يحدد الموقع ويحدد الايجار
والدكاتر مالين البلد وما لا قين شغل...
بالقي معمل ودا ممكن يقوم باقل تكلفة

Abdelazim
10-18-2008, 10:23 AM
تعرف يا كورينا ناس السودان ديل زول فيهم شغال بينا مافي
الظاهر انهم عاوزننا نتلصق في الغربة دي بس
يا جماعة قجمنا ليكم اقتراح اعملو فيهو حاجة

كورينا
10-18-2008, 10:50 AM
هم كدة يا عظيم
بس كيف الواحد يقدر يحركهم؟؟؟
اكيد بفتكروا الحكاية هظار
انا جاد والله...
فعلا عايز مشروع للعودة
احلف وابصم بالعشرة عايز مشروع للعودة
واذا مافي زبائن حاعملة لوحدي...

كورينا
10-19-2008, 10:22 AM
خلاص كجنه المشاريع الربحية
عايزين واحد يساعدنا نبني بيت عشان نرجع السودان الحبيب
حتى لو بس صالون وحمام ومطبخ كفاية...
واحد يتبرع وليه دعواتنا بالتوفيق في حياته...

مينو
10-19-2008, 02:32 PM
الغربه ان شاء الله تعقري ياتعدمي المال الفقري يا تعدمي
الشيك الخضري والله شلتي العيال من بدري والله شلتي


اخي كورينا والله العوده الي الوطن من ناحيه نظريه سهله جدا ولكن من ناحيه واقعيه فيها صعوبه وعايزه شويه تروي وقوه إراده وعزيمه

للاسف نحن البشر دائما اسيرين للمجتمع وهذا الاخر ينظر للمغترب نظره مغايره جدا الكل يعتبر المغتربين مخزن للقروش لذلك لايقبل غير هذا الراي يعني عشان ترجع السودان لازم يكون عندك وعندك وووووووووو لترضي المجتمع وتسلم من نظراتو

او تظل حيث انت وتتنظر حتي تجمع ما يكفيك شر هذا اليوم......
او ترجع وانت لابس قناع القوه والاراده والعزيمه علي البقاء بين اهلك وتعتبر الرجوع الي حضن الوطن الثروه الحقيقيه

:12_7_21:
ايهما تختار؟

كورينا
10-19-2008, 05:03 PM
العزيزة مينو
لك التحية والتقدير...
كلامك 100 مية بس الى متي نظل في الغربة؟؟؟
صحيح الحكاية عايزة تفكير وتخطيط وخمة قروش..
وعشان كدة نحنا فتحنا البوست...
عايزين افاكر للعودة ..
وزيك كدة قلنا العودة ممكن تكون دمار من غير تخطيط...
فعايزين افاكر تجعل العودة سهلة وتمنع شر الاغتراب من جديد...
طبع المقصود افكار اقتصادية
مشاريع دخل تكون مضمونه الى حد كبير
ادينا افاكرك شكلك فاهمة الشغلة ومخططة نمرة 1

مينو
10-21-2008, 06:54 PM
لك المساء بطعم العوده السهله للوطن
في فقره في يرنامج البيت السعيد يبث علي شاشه التلفزيون القومي فيه فقره بتقدم هذه الفكره بيستضيفو خبير اقتصادي وبيقدم ارشاد استثماري وبيدعم من قبل وزاره الاستثمار وبيقدموا ليك الخدمات
وفقك الله ورزقك من نعيمو

:36_13_13:

كورينا
10-22-2008, 09:02 PM
لك المساء بطعم العوده السهله للوطن
في فقره في يرنامج البيت السعيد يبث علي شاشه التلفزيون القومي فيه فقره بتقدم هذه الفكره بيستضيفو خبير اقتصادي وبيقدم ارشاد استثماري وبيدعم من قبل وزاره الاستثمار وبيقدموا ليك الخدمات
وفقك الله ورزقك من نعيمو

:36_13_13:

الله يسعدك يا مينو...
اهو دا البنفتش ليه....
بس للاسف الشديد نادرا الواحد يجد وقت للتلفزيون
طبعا نشرة الساعة 9 في الشروق و10 في السودانية ما بنفوتهم..
بس لو سمحت تحديد اليوم والوقت للمبرنامج المذكور...
وتأكيدي قريبا جدا اكون في السودان الحبيب...
لك الشكر

مينو
10-23-2008, 10:18 PM
سلام ونتمني لك العوده

زمن البرنامج يقدم يوميا عدا الجمعه من الساعه الثانيه ظهرا حتي الخامسه مساء

وانتمني لك التوفيق

كورينا
10-23-2008, 11:07 PM
سلام ونتمني لك العوده

زمن البرنامج يقدم يوميا عدا الجمعه من الساعه الثانيه ظهرا حتي الخامسه مساء

وانتمني لك التوفيق


العزيزة مينو
لك التحية التقدير للاهتمام...
كدة انا عرفت ليه ما بشوف البرنامج المعني (بيت الاسرة)
انا غالبا شغال خلال فترة بث البرنامج للاسف الشديد...
الف شكر