المساعد الشخصي الرقمي

مشاهدة النسخة كاملة : درب الصد



ايمن عثمان
09-19-2011, 01:46 AM
لو مرة درب الصد سرق
مخزون شقاك وهددك
وتهمشت فى الناس ملامح إلفتك
وتجاوز الفرح القبيل شرفات هواك
وتمددت فيك الجراح
وبقيت براك..........
منك وليك
برجع وجع حرف السموم يتقمسك
بدخل مسامات جتتك
ما فكرتك.....
تشقى وتسافر فى الهموم
رغمك بيندس الوجع
دربك معتق باللدموع
مرات بتسرح بالخيال
مرات تغازل فى الغيوم
مرات تجوع... شبعك كلام
حرفك بقطّع فى لهاك
شمسك بتسطع للوراك
وقفاك حموم...
وجهك ملامحو تبدلت
ما بشبهك.
ما عرفتك............
سويته ما قصرت يود
مصلوب وتتقد حداك فى خوتك
مغلوب وبتصفق براك للبصرعك
مشدوه وبتاوق وراك
معروف وما عارف تكون
محبوب وما قادر تسوقه محبتك
فى خاطرك المكسور تلوك
عينيك مكفنة بالدموع
متعارضة بينك
وبين حنينك ولهفتك
عاين معاى.............
لو مرة درب الصد سرق
مخزون هواك
عوّد خطاك تعرف زقاقات الرجوع
عشان ما يغافلك ويلفحك
سارق حنينك وإتكى
والف صرير الضجة
وتفادى السكون ما يعطلك
وتجاوز الاسف البهد حيل همتك
كوّن خياراتك براك
حدد صراعاتك براك
قلص مساحات الاسف والضد جواك
ما تننكسر...
خلى الحروف تنداح جسور
ما تننحصر فى كونك انت بتستحى
وما تندهش....
انك للقيت وسط الفراغ
عز الصراع البفهمك

اركمانيه
09-19-2011, 06:16 PM
قلص مساحات الضد جواك
ما تنكسر



افرد جناحك للعشم البشيل
وتر النغم
اهمس فى كل جنبات الرحيل
ميقات إقام
اتوسد الامل الكبير
ميقات عشم
تلقى المستحيل
فى بابك ركوع
والحزن والوجع التقيل
جالسين خضوع
ما قصر كتر البكاء
عمر الشموع.






مراحب بيك
اليراع أيمن

ايمن عثمان
09-20-2011, 04:21 PM
وانا اصلى فاردك يا جناع


والريح تجهجه فى النغم


اه يا انا


واه يارحيل جنباتو ميقات


وانتظار


واخر قطار


اتوسد الواطة وسدر


كان العشم نتلاقى بس

صار مستحيل

ام صبا
09-20-2011, 06:04 PM
العشم محال ينكسر
او فى يوم يصبح مستحيل
والليل مصيره يصبح
مهما كان الليل طويل
وكل اول ليه آخر
حتى لو كان الشيل تقيل
بنعيش على باكر امل
والامل يكون لينا الدليل

ايمن عثمان
09-20-2011, 09:25 PM
فى ملامح زول قدل فى الغربة
لامن ذاتو اصبح لا بوالف
لا بشوف الناس قرايبو
وفى عيون انسان موسر بالمخاوف
وما هو عارف وين نهايتو
وغايتو ساير
يا امساير
شاقى دربك من بدايتو