المساعد الشخصي الرقمي

مشاهدة النسخة كاملة : حب (tive+)



وطواط
05-02-2011, 11:47 AM
انا....
انا ياني من ذات الفصيلة
وكل خلية في دمي تهتف ....
بي غرامك يا جميلة
يا دعاش في سماي رشّــا ...
يا فراش زار الخميله
يا أمل في بقّـه اشرق ....
نوّر الظلمه الطويلة
الورد بلل خدودك...
والزهر عطّـر اسيلا
زي ودع مرسوم خشيمها...
والعيون ناعسة وكحيلة
وزي فريع البان قوامها....
تمشي تتنّـى ومهيلا
الجبين من نورها ضاوي ....
عز شمس فرّت اصيلا
دا القمر ياخد بهاهو ...
لما يتمطّق سبيلا
السحاب ينجمّ فيها ...
في رموش عينيك مقيلا
ديسها مردوم لي كتيفها ...
دوحة اغصانها الظليلة
جيدها محزوم عالي صدرو...
والضمير غالبو يشيلا
ربي يا مولاي يصونها....
ويحفظ العشرة النبيلة

سمراء
05-02-2011, 12:24 PM
الحب ال +tive عندك يا وطواط
وين يا زول والله مشتاقين

وطواط
05-02-2011, 02:06 PM
الحب ال +tive عندك يا وطواط
وين يا زول والله مشتاقين
عزيزتي سمراء
شكلك بتنتمي للفصيلة النادرة دي
شكرا لمرورك الأنيق
الأشواق من هنا لعندك

حبوبة
05-02-2011, 07:46 PM
ربي يا وطواط يصونا ويحفظ العشرة الجميلة
وتربى ريدتكم تخضِّر ونستظل نحن بخميلا
نعيش الود معاك لوعة وتنتشي كمان المخيلة
زيد في عشقك يابا واتهنى بالريدة النبيلة ..

وطواط
05-02-2011, 07:53 PM
ربي يا وطواط يصونا ويحفظ العشرة الجميلة
وتربى ريدتكم تخضِّر ونستظل نحن بخميلا
نعيش الود معاك لوعة وتنتشي كمان المخيلة
زيد في عشقك يابا واتهنى بالريدة النبيلة ..
شكرا كتيرشكرا لي حبوبة
كلماتك السمحة جابت رطوبة
زينتي البوست وزودتي الخصوبة
وانشاء تجينا كمان في الخطوبة
كــــــع
انتو دحين دا ركن المجادعة؟؟؟؟