المساعد الشخصي الرقمي

مشاهدة النسخة كاملة : ذكرياتي الفنية



محمد نعيم
03-21-2011, 07:12 PM
احب ادوّن بعض من ذكرياتي الفنية منذ طفولتي الى الان واتمنى ان اتذكرها كلها ولكن هل حاقدر بعد كل هذا العمر ساحاول..............

في طفولتي كنت محاط بالنفس الصوفي والدتي ربنا يمتعها بالصحه والعافية متصوفة وكذلك اخوي الكبير نجم الدين متصوف كنا نذهب الى حلة الشيخ الامين في منطقة الحلاوين كل خميس لزيارة ابونا الشيخ الامين وكان وقتها مقيم فيها قبل ان ينتقل الى قريتنا ابو فروع كنت احسب ايام الاسبوع منتظراً يوم الخميس حتى نركب لوري عمر ود ابو طعم ونذهب الى الشيخ الامين وكنت استمع الى المادحين شيخ علي ود جبجب والشيخ عبدالله محمد نور تاجر حتى حفظت بعض من المدايح متل مدحة جل جلاله وغيرها من المدايح الكتيره رغم صغري كنت احفظ جزء من المديح وعندما نعود برضو بسمع اخوي يمدح في البيت اتشربت من هذه المدايح الصوفيه..............

نوااااااصل

Abdelazim
03-21-2011, 07:29 PM
وفي انتظار المواصلة يا ابو الفاتح

محمد نعيم
03-22-2011, 10:19 AM
وفي انتظار المواصلة يا ابو الفاتح



شكراً على المرور والتشجيع

ان شاء الله حاواصل

محمد نعيم
03-22-2011, 10:19 AM
بعد هذه المرحله جات مرحلة المدرسة طبعاً زمان مافي روضه كل اولاد الفريق قبلوهم في المدرسة الا انا قالوا الولد صغير باقي ليهو كم شهر يعني لازم السنة الجديده وطبعاً القرار من مدير المدرسه كان بالنسبه لي متل الصاعقه طبعا من رفضوني في المدرسه انا من الصبح بجي اقعد جنب المدرسه ما برجع الا مع وقت الفطور مع الطلبه واجي راجع تاني معاهم الى ان ينتهي اليوم وكنت مجهز ملابس المدرسه والملابس عبارة عن رداء كحلي معمول من الدموريه وقميص ابيض تقريبا برضو من الدموريه وشدّه بيضاء بتاعت بلاستيك طبعا دا زمنا كان كدا اسبوع كامل انا لافي في المدرسه وابكي باعلى صوت علشان المدرسين يسمعوني ورغم ذلك كنت مستمتع بالنشيد بتاع الصباح في الطابور ( نحن جند الله جند الوطن )طبعاً خلال الاسبوع حفظت النشيد كاملاً , وكنت معذب امي تقوم من الصباح ما بتلقاني تجي جاريه لي المدرسه في النهاية الامر صعب عليها وبدت تدور في الواسطه لما لقينا استاذ بشير حنين رحمه الله وامي حكت ليهو الحاصل كامل وفي النهاية طبعاً قبلوني في المدرسه وخشيت مع الجماعه وهمي كلو كان عايز احفظ الاناشيد................

نوااااااصل

بشير ود تهامي
03-22-2011, 11:03 AM
لقينا استاذ بشير حنين رحمه الله وامي حكت ليهو الحاصل كامل وفي النهاية طبعاً قبلوني في المدرسه وخشيت مع الجماعه وهمي كلو كان عايز احفظ الاناشيد................

نوااااااصل



شفتا يا محمد نعيم استاذ بشير حنين وأمين
(رحمه الله)




هبشه:
طبعاً علشان (عربي جزيرة) ما بتم بيت الشعر الفوق داك... (بس انا جعلي بتمو ليك) وأرجو أن تكمل البيت ليكون واضحا..
ما نمر الشدِّر حاضن فروعو مقيل.. ده النمر البضاير الصف محل ما يميل ...

بشير ود تهامي
03-22-2011, 11:04 AM
لقينا استاذ بشير حنين رحمه الله وامي حكت ليهو الحاصل كامل وفي النهاية طبعاً قبلوني في المدرسه وخشيت مع الجماعه وهمي كلو كان عايز احفظ الاناشيد................

نوااااااصل




شفتا يا محمد نعيم استاذ بشير حنين وأمين
(رحمه الله)




هبشه:
طبعاً علشان (عربي جزيرة) ما بتم بيت الشعر الفوق داك...

محمد نعيم
04-24-2011, 10:18 AM
شفتا يا محمد نعيم استاذ بشير حنين وأمين
(رحمه الله)




هبشه:
طبعاً علشان (عربي جزيرة) ما بتم بيت الشعر الفوق داك... (بس انا جعلي بتمو ليك) وأرجو أن تكمل البيت ليكون واضحا..
ما نمر الشدِّر حاضن فروعو مقيل.. ده النمر البضاير الصف محل ما يميل ...




فعلا انسان حنين وامين رحمة الله عليه
مشكور يا تهامي

ام صبا
04-24-2011, 12:18 PM
محمد نعيم طابت اوقاتك بكل خير

فى الانتظار

محمد نعيم
07-26-2012, 08:54 AM
محمد نعيم طابت اوقاتك بكل خير

فى الانتظار


ان شاء الله بحاول اواصل في الذكريات

محمد نعيم
07-26-2012, 08:56 AM
لحسن حظي مادة اللغة العربية بدينا ليها استاذ بشرى الدافوري وما اروع هذا الاستاذ الرائع صوت جهور كان يلحن الاناشيد بطريقته الخاصه الرائعه كنت استمتع لحصة الاناشيد ومن تلك الاناشيد الخالده الى هذه اللحظه نشيد اشرقت شمس الضحى..................

أشرقت شمس الضحى في السماء الصافية
وهي تؤتنا الصحة صحة وعافية

وقصيدة تانية بتقول
اثناء طلوع الفجري يقوم ديكي بدري يقوم في نشاطٍ يقول كيكيكيكي.........

نعم انها ذكريات جميله وهي التي اثرت فينا الى هذه اللحظه عشقنا للاناشيد وترديدها جعلنا نبدع اكثر واكثر ..
كنا ناخد النشيده في الصبح وتاني يوم نقوم بتسميعها ملحنه بصوت جماعي رائع وكان الفصل مقسوم لقسمين طبعاً القسم اليمين وبه تقريبا سبعه كنبات والقسم الايسر به نفس العدد فمن روعة تلحين واداء النشيده ان القسم اليمين يقول شطر البيت في القصيده والقسم الايسر يقوم باداء عجز البيت كنا طبعاً صغار وصوتنا قريب بعض .

هذه بعض من ذكريات الصف الاول الابتدائي ........

نوااااصل

محمد نعيم
02-22-2013, 03:19 AM
في الصف الثاني الابتدائي زاد ابداعنا وموهبتنا عندما دخلنا في تمثيل القصص الموجوده في المنهج متل الدجاجه الصغيرة الحمراء ولا انسى هنا استاذ سيد كان مبدعاً في تدريس مادة اللغه العربيه وكانت قصة الدجاجه الصغيره الحمراء حلمنا منذ الصف الاول مثلنا هذه القصه بكل ابداع كان طلاب الفصول التانية يتفرجوا علينا ويستمتعوا بالاداء الرائع واذكر هنا اخونا محمد الامين علي مثل دور الدجاجه والى الان اسم الدجاجه مقرون باسمه يعني مافي حد بتذكر اسمو الا تقول الدجاجه ذكريات جميله .

وايضاً نشيد نحن البنون يااااااااه ما اجمل هذا النشيد لكن الذاكره تعبانه ما حافظ منو حاجه وايضاً نشيد ...

دجاجي يلقط الحبه ويجري وهو فرحان كان عيونه خرز لها في الشمس الوان ...

ولا انسى حصة الفنون كنا نرسم بالطين نمشي كلنا البياره ونجيب كمية بتاعت طين ونبدأ في الرسم رسم الطيور والحيوانات والعربات.

اذن المواهب نمت فينا من الابتدائي من الصف الاول والثاني وبقية الفصول ..............

نوااااااصل

محمد نعيم
02-22-2013, 03:20 AM
في الصف الثالث الابتدائي كانت في اناشيد جميله متل ...

لي قطة صغيرة سميتها سميرة
تنام في الليل معي وتلعب بأصابعي
بشعرها الجميل وذيلها الطويل
لأنني أحبها ولا أريد ضربها

وايضاً الالعاب كانت ممتعه متل لعبة الفات الفات كانت تصاحبها كلمات جميله ولحن جميل كنا نجلس في شكل دائره طبعاً كل الفصل عدى العيانين كان الاول بيقلع قميصه ويلف حول الدائره ونحن نغني الفات الفات في ديلو سبعة لفات في ديلو طبعاً لازم يختار واحد يضربو والتاني يسك الاول الى ان يجلس في مكانه وهكذا لما تنتهي اللعبه واليكم الكلمات التي كانت في اللعبة

الفات الفات وفى ديلو وسبعة لفات وفى ديلو
وعم على بياع الزيت طلق مرتو وداها البيت
وفي البيت عامل زعلان وفي القهوة شارب فنجان
والجبة وقعت فى البئروصاحبها واحد جنزير

والهون ضرب التلفون.........

وتاني لعبة شليل

وشليل وينو أكلو الدودو
وشليل وين راح أكلو التمساح
وشليل عبارة لعبة يتم اختار احد الطلاب وهو الذى يكون معه العضم ويبدأ بقول
شليل وينو ويردد الجماعة اكلو الدودو
وشليل وين راح اكلو التمساح
ثم يقوم برمى العضم والبقيه يبحثوا عنه


يا سلام على ايام زماااان والزمن الجميل كل هذه الاناشيد والالعاب التي تحمل الحاناً جميله عشعشت فينا الى اليوم...



نواااااااااص

محمد نعيم
02-22-2013, 03:21 AM
اما الصف الرابع دا حكاية تانية والصف الرابع اسمه الفرامل يعني لو ما كنت مؤهل تماماً ما حتمشي الصف الخامس يعني لازم تجتهد في الصف الرابع وكان وضع الفصل غير بقية الفصول تشعر برهبة وخوف شديد حتى وضع الكنب يختلف عن بقية الفصول كانت الكنبه صغيره وعدد الطلاب فيها أربعه تقريباً انا اذكر كان معي المشاغب امين ابراهيم الدافوري والكباشي الشيخ جبران ومحمد صلاح عبد الرحمن .. امين رغم شطارته لكن يميل للهزليه احياناً بتذكر يوم من الايام امين وسوس للكباشي وانا كنت في النص قال ليهو محمد دا ضعيف تعال نكسرو النص النص وبدأ الضغط علي من الجانبين وما شاء الله عليهم صحتهم كانت كويسه وبدا الضغط من الجانبين وانا في النص اتالم وخوفاً من الاساتذه ومن الجلد لم اتكلم فضلت صامتاً مستحمل ضغطه من امين وضغطه من الكباشي وفي الاخر امين شدّ شويه لما الكنبه اتكسرت ودونا لاستاذنا ومربينا الرائع بشرى الذين ادم واخدنا علقه محترمه وتم تغريم الكباش وامين للكنبه ............

نرجع للذكريات الفنيه الجميله في كل الفصول الاولى كنا نحب مادة الاناشيد ومادة الفنون ولكن في الصف الرابع حبينا مادة الجغرافيا لماذا ؟؟....................

حاتابع في المره القادمة باذن الله

نواااااااااااااص