المساعد الشخصي الرقمي

مشاهدة النسخة كاملة : الما بتصفق إنشا الله ما يعرسوها



عارف احمد عبدالله
03-17-2011, 01:22 PM
فرح المحزون

01-10-2011 01:16 pm

الما بتصفق إنشا الله ما يعرسوها

عارف احمد عبدالله



كنت بالأمس أحاول أن أغمض جفني عسي أن يزورني طيفها في منامي بعد أن فقدتها في صحوي ...

إلا أن صوت المايكرفونات بتاعت الجيران أعلنت عن حفلة في الجوار أخترقت أضاني وحمتني لنوم عديييل كدا ...

وانا بي طبعي مابحب الازعاج لكن قلت اتصنت وأشوف الفنانة دي بتقول في شنو .... لاني حفلاتهم دي ماقاعد أمشي ليها ...

بعد شوية دورت الموسيقي والفنانة تكورك النبق النبق النبق ...

ياربي دي حفلة ولا سوق نبق وقنقليز ...

غايتو مشيتها وقلت اشوف البحصل شنو في الاغنية البعديها لقيتها برضها النبق النبق فسألت واحد ماشي الحفلة دي شنو الكلمة دي ... قال لي دي رقصة برفعو فيها اليدين لكن مافيها شدرة سدر بس بنلقط من الهواء ساي ... غايتو جنس محن .

الغريبة البعديها قلبت من النبق للقرد وهاك ياتشتري قرد والحكاية بقت حديقة حيوان والشباب كلهم بقو قرود تنطط ...

ياجماعة الخير الود بتاع نظرية أنو الانسان كان قرد دا شافها عندنا هنا وقال كلامو دا ولاشنو ... برضو فهم والله اننا نعزز النظريات العلمية في حفلاتنا ودي حاجة جميلة حسب نظريتهم طبعا ...

... دا ما كلامي عشان مابعدين تبقو لي في رقبتي ...

... المهم الحفلة اتقدمت والاورغن سخن والعازف نزل كلو عرق زي الزير الجديد ...

.. يازول انت بتعزف في موسيقي ولا سايق مركب عرقان كدا ... وتتري ترت وادروب تت ...

والشباب ماخلو نبقة في الهواء ما لقطوها ..

كملو كل النبق الاخضر والناشف ...

بعد كدا الموضوع قلب صفقة ... والمابتصفق انشا الله مايعرسوها- طبعاً الفنانة بايركسي والقطر فاتها - ...

قلت ليها في سري يابت الناس مالك دايرة تبوري بنات الناس معاك .. انتي عرفناك عندك أورغن وميكرفون وبتلمي العداد ... لكن هم المساكين يعملو شنو ... غايتو جنس حسادة..

المشكلة ماهنا ... الموضوع جاب المابتصفق أكان معرسة يطلقوها...

-- الله الله الله كمان جابت ليها طلاق .. هي انتي بتغني في حفلة عرس عشان واحدة حاتتزوج تقومي تطلقي الباقيات ...

-- والله احتمال دايراهن يعرسن تاني عشان تلقي زبائن تغني ليهم .. لانو الشباب الصغار كلهم خلو العرس وقالو ما دايرين عديل وقدو سلك بدري بدري ... وكلو البتسالو يقول ليك أجيب بلوي تاكل وتشرب معاي لي شنو ... والعرسو ذاتهم سوو شنو .. المرأة عيانة ... ياراجل قوم شوف الولد دا مسخن مالو ... أرح وديني بيت أمي أختي الصغيرة جاييها عريس وجايب اهلو الليلة ...

... المهم الساعة حداشر قربت ... قلت بعد دا الحفلة تنتهي وانوم مرتاح من الازعاج دا ...

لكن أتفاجات بي الفنانة تغني - انا بريد البواليس يا.. وبموت في ضابط الجيش يا - ضحكت طبعاً وفهمت إنو دي رشوة لي ناس الشرطة عشان مايوقفو الحفلة ويخلوها تستمر شوية لي قدام ... لانو الفنانة والشباب ياداب اندمجو , وفي مزة حلوة ورقاصة نزلت الدارة وخلت البرة كلهم نزلو الدارة .. حتي العريس باراها بالجبجبة جب جب - وجب جب ... يااااا ناس دا شنو دا

المهم يوم وانتهي علي سلام ...

ما تقولي علي بتاع حفلات ... انا حضرتها عشان أكتب ليكم عنها بس ...

هسة ماشي علي الصيدلية اجيب منظف للاضنين عشان افضي منها الحشو الدخلها أمس دا ...

وقلت أشتري سبحة بالمرة عشان استغفر بيها وأعد لحدي الف احتمال ربنا يغفر لينا ...

الغريبة إني صحيت ولقيتو دا كلو حلم بس .. لا في حفلة ولا حاجة ...

استغفرو ياشباب ... قرد شنو ونبق شنو في البرد دا ..

أستغفر الله العظيم

محمد نعيم
03-17-2011, 04:15 PM
كان تكتب هنا تقول الما برد ان شاء الله ما يعرس...

كع

في النبق النبق

والقسم القسم

الركشة الركشة

وحاجات تانية

الله يستر

عارف احمد عبدالله
03-17-2011, 05:25 PM
مشكور ود نعيم نحن منتظرين ردودهم عشان عشان نكتر ليهم من الركشات والنبق الجائي لي قدام ....